¹ Cho bije bathemunwina bya Lubeni na Ngandi byakele na mabutanga a bimuna akama. Omu bamwene lije lifuti lya Njaza na Ngilandi, lyakele lifuti lyachili ku bimuna. ² Cho bithemunwina ba Ngandi na Lubeni bethzile nakwendeka kuli Mosesa, kuli Eliyaza uje kapilisitu, nakuli bakakutwamwnena ba ije ndandanga. Bendekele ngwabo, ³ "Awa akeo mathzina abyela twatondethetha: Ataroti, Ndimboni, Njaza, Nimula, Heshimboni, Eliyale, Sembamu, Nembo, na Mbiyoni. ⁴ Awa akeo mafuti awa Njambi alukukile thimbu kanda ndandanga ya Isalela, cho binapu byela byabibwa ku bimuna. Yetu, bingamba bobe, tuli na bimuna babengi." ⁵ Bendekele ngwabo, "Oshe ngwe tunawana kutetela mumesho obe, echela eli lifuti batwanelyo, bingamba bobe, kukala bufuko bwetu. Kethi utulingithe tujabuke Yondau." ⁶ Cho Mosesa wakumbulwile chije chithemunwina cha Ndandi na Lubeni ngwendi, "Nkuma watabela bandolome bobe baye kunthzita thimbu yobe uthale nakutunga kuno? ⁷ Bikajo njonowethela bimbunge bya banu ba Isalela kuya mulifuti eli Njambi nabana? ⁸ Baishweni balingile byuma bimolika omu njabatumine kutunda ku Kandeshi Mbaniya kuya nakutala lifuti. ⁹ Baile nakweta kumingulunga ya Eshiko. Bamwene lije lifuti cho bathzeyethele bimbunge bya banu ba Isalela mukulinga ngechi babyanene kukobela mulifuti eli Njambi wabanene. ¹⁰ Cho bendwile butenu bwa Njambi halitangwa lije. Walithingile nakwendeka ngwendi, ¹¹ 'Chili bene nabamo banalume bahi batuhukile mu Ingitu, namyaka kutunda makumi abali nakuya helu, bakamona lifuti lije njalithingile kuli Abilahama, kuli Isake, nakuli Yakobo, mwafwa kubathele kunjikabangeya mukushula, kubanga ¹² Kalembu muna Jefani uje ka Kenizite, na Yoshuwa muna Nune. Kalembu na Yoshuwa lika bakebo bananjikabangeya mukushula.' ¹³ Cho butenu bwa Njambi hali ba Isalela babwindwile. Wabalingithile kwendangana mumambo ha myaka makumi awana kweta nomu chikola choshe chije chalingile bubi kumeshe endi bachingongethele. ¹⁴ Kenga, mumwela wabaisho unakolethamo, ngwe banalume babubi manene, bakwakela kukwenya cha butenu bwa Njambi hali ba Isalela. ¹⁵ Oshe ngwe utenguluka kutunda kukumukabangeya, akathethza lalo Isalela mu mambo cho ukanyongetha aba banu boshe." ¹⁶ Cho bethzile kuyeyi na Mosesa nakwendeka ngwabo, "Tutabethe tutunge bipatanga kuno bya bimuna betu na membo a binanga byetu. ¹⁷ Nambengocho, yetu tulibwahetha nakulithzika bitwa tuye na mashwalale ba Isalela kweta nomu tubatwamenene mu mwela wabo. Oloni binanga byetu biyoyela mu binganda mukukikiya na bimpaka hamulonga wabaje banu bakwabo bachili nakuyoyela muli eli lifuti. ¹⁸ Kutwiluka ku binjubo byetu kweta nomu boshe banu ba Isalela batambula buswana bwabo. ¹⁹ Kutukaswana lifuti nabakebo hathambwela likwabo lya Yondau, mwafwa buswana bwetu buli kuno kumwela wa ngangela ya Yondau." ²⁰ Cho Mosesa wabakumbulwile ngwendi, "Oshe mujlinga ebi mwendeka, oshe mulitwika yeni babenya nakuya ku nthzita ya Njambi, ²¹ Cho munu woshe wamuli banu beni banthzita atela kujabukila kuthambwa ya Yondau thimbu kanda Njambi, kweta nomu akatundithako baka n'ole kutunda kuli ikeye ²² cho nalifuti balifunulwila kuli ikeye. Cho hanima yobyo watha kwiluka. ku ukakala namulonga kuli Njambi naba Isalela. Lifuti eli likakala bufuko bwobe kumesho a Njambi. ²³ Oloni oshe ku ulinga ngocho, kenga, ukabulumuna kuli Njambi. Mona ngwobe bubi bwobe bukutundithamo. ²⁴ Tunga membo a binanga byobe namalimba abimanga byobe; cho linga obyo unendeka." ²⁵ Chithemunwina cha Ngamdi na Lubeni bendekele kuli Mosesa ngwabo, "Bingamba bobe balinga ngwe omu yobe, shukwanana, unakambeya. ²⁶ Bana betu, banakathzi betu, mabutanga etu, na bimuna byetu byoshe bikatumbama kuje ku membo a Ngilandi. ²⁷ Nambengocho, yetu, bingamba bobe, tujabuka thimbu kanda Njambi kuyaku nthzita, munalume woshe ou nalibwahethele nthzita, ngwe yobe, shukwanana, wendekele." ²⁸ Cho Mosesa wabalongethele hali bakebo kuli Eliyaza uje kapilisitu, kuli Yoshuwa muna Nune, nakubantwama ba shoko ya bakulu mumiyati ya banu ba Isalela. ²⁹ Cho Mosesa wendekele kuli bakebo ngwendi, "Oshe chithemunwina cha Ngandi na Lubeni bakajabuka nobe Yondau, munu woshe ou nalibwahethela kulwa kumesho a Njambi, cho oshe uje lifuti banalifungulula hali yeni, cho ukabana lije lifuti lya Ngilandi kukala lyabo. ³⁰ Oloni oshe kubajabuka nobe nabitwa, cho bakatambula byela byabo mukati keni mulifuti lya Kanana." ³¹ Cho chithemunwina cha Ngandi na Lubeni bakumbulwile ngwabo, "Ngwe omu Njambi nendeka kuli yetu, bingamba bobe, ebi bikebyo tukalinga. ³² Tukajabuka mukuli bwahethela kumesho a Njambi kukobela mu lifuti lya Kanana, oloni bikwata byabuswana bwetu bikathala netu thambwela lino lya Yondau." ³³ Cho ku chithemunwina cha Ngandi na Lubeni, cho lalo nakumbathzubwila ya muyati wa Manase muna Yosefa. Mosesa wanene bu mwene bwa Sihoni mwene waba Amolite, nobu bwa Og, mwene wa Mbashani. Wabanene lifuti, nakubapangela nganda oshe nabinginga byawo, nganda a mulifuti aje abathzengulika. ³⁴ Chije chithemunwina cha Ngandi cha tungulwile Ndimboni, Ataroti, Aroya, ³⁵ Atiloti Shofan, Njaza, Njongumbeha, ³⁶ Mbeti Nimula, na Mbeti Halani kukala binganda bya kukikiya na mulimba a bimanga. ³⁷ Chije chithemunwina cha Lubeni chatungulwile Heshimboni, Eleyale, Kiliataimu, ³⁸ Nembo, Mbaa Meoni--cho mathzina awo bawatengulwile, na Simbuma. Banene mathzina eka ku binganda bije batungulwile. ³⁹ Chije chithemunwina cha Makiya nuna Manase chaile ku Ngilandi nakuchitambula kutunda kuli ba Amolite baje bakelemo. ⁴⁰ Cho Mosesa wanene Ngilandi kuli ba Makilite, chithemunwina cha Manase, nabanu bendi batungile kujebene. ⁴¹ Njaya, chithemunwina cha Mnase, baile nakutambula bimbaka byalyo nakubathana ngwabo Havoti Njaya. ⁴² Nomba waile nakutambula Kenati na binganda byalyo, nakulithana ngwabo Nomba, kuluka lithzina lyendi ibenya.