¹ Omo mwetile matangwa atatu, kwakele chilika chabulo kuje kulifuti lya Kena ku Ngalileya, cho bayina ya Shukulu kwakele. ² Yesu na miluwa bendi babathzanene kuchilika chabulo. ³ Omo binyu byawile bayina ya Yesu bendekele kuli ekeye ngwendi, "Kubethi na binyu." ⁴ Yesu wendekele kuli ikeye ngwabo, ''Munakathzi, mwafwa bika unethzila kuli yange? Thimbu yange kanda yete." ⁵ Cho ina wendekele kuli baje bangamba ngwendi, "obyo byoshe endeka kuli yeni, bilingeni." ⁶ Choni kwakele bindeho byamema byaku tunnga namamanya bije bapangethele kuchilika cha ba Yunda kukushilamo, imo ndeho yakele bibali bimo bitatu mukulaha. Yesu wendekele kuli bakebo ngwendi, ⁷ "shulitheni ebi bindeho namema." Mukulinga ngocho bindeho babishulithile mbee. ⁸ Lalo walekele bangamba, "Tundithenimo amo nakutwala kuli uje mukulunu wabipange." Cho omu mukeko balingile' ⁹ Uje mukulunu wabaka kupanga athibile mema aje anethile mukukala binyu, oloni kathubukile oku yatundile (olojo baje bangamba batekwile mema bathzibukile). Cho wathzanene chombolwa ¹⁰ nakwendeka kuli ikeye ngwabo, "Munu woshe akana binyu byabibwa hakulibanga cho binyu bya kwona ndando yanima aje boshe bana pende. Oloni yobe una tumbika binyu byabibwa nakulelo lino." ¹¹ Echi chikeko chimwetho chakulibanga Yesu walingile mu Kana ku Ngalileya, cho nakusholola bumpaho bwendi, na bandogethi bendi bamukulalehele. ¹² Hanima yechi Yesu, bayina bendi, bandolome bendi, naba ndonhgethzi bendi bayile kwithi ya Kapinauma cho bakakeleko matangwa amandondo. ¹³ Oloni omo chetele chilika cha Paseka cha ba Yunda kuyehi, na Yesu wayile nakweta ku Yelusalema. ¹⁴ Awanene bakakulandetha bingombe na bimango na tutela mu tembele, na baje baka kutoma bimbongo bana tumama mu tembele. ¹⁵ Waba kwapwile bibanthzi na kubatundithamo boshe muje mutembele, kwakelaho na bamanga na bangombe. washandwele bimbongo byabikungo byabaje bakakulandulula bimbongo na kumbila bimesa byabo. ¹⁶ Kuli baje bakakulandetha tutela wendekele ngwabo, "Bitunditheni ebi byuma byoshe muno. Echeleni kulinga njubo ya Tate kukala mwela wakulandethela." ¹⁷ Bandongethzi bendi banukile ngwabo bachitoneka echi, "Chashu cha njubo yobe chikecho chikanjilya yange." ¹⁸ Choni bakulunu baba Yunda bakumbulwile nakumuleka ngwabo, "Chimwetho muka utulekethako, akulinga unakubilinga byuma byoshe ebi?" ¹⁹ Yesu wakumbulwile ngwendi, "Onongeni tembele ino, cho mumatangwa atatu chiyitunga cheka." ²⁰ Athinoni bakulunu baba Yunda bendekele ngwabo, "Eyi tembele bayitungile mumyaka makumi awana na bitatu naumo, cho yobe ukayitonga mu matangwa atatu?" ²¹ Chipwe ngocho, akele nakwendeka ha tembele ya mubila wendi. ²² Hanima yakumwindula kufuma kubathsi, ba ndongethzi bendi ba kumbukile ngwabo anendekele ebi, cho bakulahelele mulibulu na mumajwi aje endekele Yesu. ²³ Omu akele mu Yelusalema hachilika cha Paseka, banu babengi bakulahelele muli thina lyendi omu bamwene bimwetho byalingile. ²⁴ Oloni Yesu kabakulahelele mwafwa habathubukile boshe, ²⁵ mwafwa kashakele munu nambe umo kwandekayo kuli ikeye ali munu oshe, mwafwa hathibuka byuma byakala muli munu.