¹ Paulu,muluwa wa Kilisitu Yesu kwitila mu chithzango cha Njambi,Timoteo ndolome yetu, ² kubanu ba Njambi bakuthzila na kukulahela muli Yesu Kilisitu baje bali ku Kolose.Echeleni ngothzi ikale neni,na kwoloka kwa kutunda kuli Njambi Tate yetu. ³ Twana kukandelela kuli Njambi, Ishe ya Mwene Yesu Kilisitu,cho tukamilombelela thimbu yoshe. ⁴ wathzibi by likulahelo lyeni limuli nalyo muli Kilisitu Yesu na bije bya chithzemo chije mulinalwo kuli banu boshe ba Njambi bakuthzila. ⁵ Muli na chithzemo echi mwafwa wa chinyangabili chije banaminyungila mwilu. Mwathzibile laja chino chinyangabili thimbu kanda muthzibe lijwi lya buthunga,lya muthzimbu wa ubwa. ⁶ Uje uneja kuli yeni. Ou muthzimbu wa ubwa uli na kwima bushuka cho uli nakokola mukaye koshe. Binakala nakulinga ngechi muli yeni lalo kutunda ku litangwa mwathzibile na kulilongetha bya ngothzi ya Njambi mu buthunga. ⁷ Ou ukewo muthzimbu wa ubwa uwamwalilongethele kutunda kuli Epafalasi.mukachithzemo mukwetu ngamba,Ngamba wa kukulahela Ngamba ya Kilisitu ou natwimanenako. ⁸ Epafalasi natulingitha tuthzubuke chithzemo cheni mu muthzithzime. ⁹ Mwafwa wa chithzemo echi,kutunda litangwa twathzebile bino kutwechelele kumilombelako. Tukalombo ngwetu bamishulithe na mangana a kushaka kwendi mu mana oshe na kuthzibithitha kwa kutunda ku muthzithzime. ¹⁰ Tunakala nakumilombelela linga mwatha kwenda mukufwilamo ya Shukulu cho chije chikamuthzibitha bwino mungila yoshe. Tunakala nakumilombelela ngwetu mwatha kwima bushuka mubilinga bya bibwa na mukukola mu maana a Njambi. ¹¹ Tuli na kulomba linga mwathe kukanyama mubingila byoshe kwetheketha na binthzili bya bumaphu bwendi kukukakateya na kutakametha. ¹² Tuli na kulomba ngwendi mukana kujolela ku kukandelela kuli Tate,uje na mipwitha kupwa na mbathzibwila mukuswana bumwene bwa banu ba kuthzila ba Njambi mu lyethzi. ¹³ Natwamena ku binthzili bya lithuthulungu na kutunena ku bumwene bwa munendi uje ya thzema, ¹⁴ muli ikeye banatwobola,kokonekela kwa bubi. ¹⁵ Ikeye napu muthzithzime wa Njambi uje kutwethi kumona. Ikeye mwana wa ntwatwa ku byuma byoshe bya kutanga. ¹⁶ Mwafwa byuma byoshe babitangele muli ikeye,bije bili mwilu nebi bili hathsi,byuma bitukamono chitona mesho nebi kutwethi kumona na mesho.nameme matanda nameme ndthzili nambe fulumende nambe baka ndthzili,byuma byoshe babitangele kwitila muli ikeye na hali ikeye. ¹⁷ Ikeye wakeleko thimbu kanda byuma byoshe,cho muli ikeye byuma byohe byakweta hamolika. ¹⁸ Ikeye napu mutwe wa Mubila,na chikungulukilo.Ikeye wakuputuka,ntwatwa wa kutunda hakati ka bathsi,cho ali na mwela wa kulibanga mu byuma byoshe. ¹⁹ Mwafwa Njambi wa bwahelelele ngwendi butumbe boshe bwa shulile muli ikeye. ²⁰ Cho wamikonekelele kwitila muli munendi mu byuma byoshe kuli babenya. Njambi wa nenele kwoloka kwitila mu maninga aha chilindakano chendi.Njambi wakonekelele byuma byoshe kuli ikeye babenya,nameme byuma bya hano hathi nambe byuma mwilu. ²¹ Hathimbu imo neni nawa mwakele mubanu beka kuli Njambi cho mwakele bitithzi bendi mu bithinganyeka na bilinga bya bibi. ²² Oloni lelolino na pwitha babuthamba bendi ku mubila wendi kwitila mu kuthsa. Walingile nhechi mangana aminene ku mesho endi kupwa baka kuthzila,bakujeneka milonga,na kupwa bakufwila kweta ku mesho endi. ²³ Ngwe mutwalelelamukukalahela,imanenei mbee na kuthimpa,kethi mutunde ku chinyangabili cha muthzimbu waubwa uje umunathzibi. Ou ukewo muthzimbu wa ubwa uje bambulwile ku munu woshe ibatangele hathsi ya lilu. Ou ukewo muthsimbu waubwa ou yange, Paulu,njapwile kupwa ngamba. ²⁴ Cho lalo njilinakujolela mu tuyando twange hali yeni,cho njinatwitha mu mubila wange bije banathalako ku tuyanda twa Kilisitu ha mulonga wa mubila wendi,ukewo chikungulukilo. ²⁵ Mwafwa wa chikungulukilo echi njiapu nji ngamba kwetheketha na chipangi cha kunyunga chije banjanene kutunda kuli Njambi hali yeni,mangana njishulithe lijwi lya Njambi. ²⁶ Echi chikecho chithig;iko cha kushweka ku myaka ya kunima na ku bikota oloni banachisholola k banu bakuthzila ba Njambi. ²⁷ Chakele kuli bakebo baje Njambi watondele bathzibuke bufuko bwa bumpahu bwechi chilumbununa baka mafuti,echi chinyangabili cha bumpahu. ²⁸ Tukambulula,kunyanyametha na kulingetha woshe umo nali na mana,managana tunene munu woshe ngwe banu bakakola muli Kilisitu. ²⁹ Mwafwa wechi,nji panga na kulwitha kwetheketha ha bindthzili byendi bije bili na kupanga muli yange na ndthzili.