¹ Mwafwa njishaka muthzibuke bukama muka bwa kwilwitha bunjakele nabyo hali yeni,kuli baje bali ku Laondesiya,cho mwafwa babenya manene baje kubamwene chihanga change ku mubila. ² Njikapanga mangana bimbunge byabo bitakame ha kubinena hamo mu chithzemo na kubufuko boshe bwa kushula na kukulahetha kwa kuthzibithitha,kwija mu mangana a chithing'iko kwa Njambi,ou ikeye Kilisitu. ³ Muli ikeye bubwa bwa mana na mangana bana bushweke. ⁴ Njendeka ebi mangana kethi umo amikwithe na lijwi lya mumithzimabaletha. ⁵ Nameme kunjethi neni ku mubila,oloni njili neni mu muthzithzime. Njajolelela ha kumona kuli bwahethela bwino kweni na kutakam kwa likulahelo lyeni muli Kilisitu. ⁶ Ngwe omwo mwa mutambwile Kilisitu Yesu Mwene,endeni muli ikeye. ⁷ Koleni mithzi muli ikeye,bamitunge hali ikeye,takameni mu likulahelo ngwe omwo bamilongethele,na kulyakeleko ku kwana bwana bwa kukandelela. ⁸ Taleni ngweni wahi na umo atha kumikwata kwitila mu mana akulilongetha kuli kwitha kwa ngocho,kwetheketha ku chithemwa cha banu,kulumbulula bukaleho bwa ku bilyo bya mithzindthzime bya kaye,na kujeneka bya mithzithzime bya kaye,na kujeneka kulumbununa bukaleho kuli Kilisitu. ⁹ Mwafwa muli ikeye kushula kwa Njambi kwakele mu chifwa cha mubila. ¹⁰ Bana mishulitha muli ikeye,ikeye mutwe wa boshe baka kuyula na baka mooko. ¹¹ Muli ikeye neni nawa bamituhwile na kutuhuka kwa kujeneka kulinga ku bunu mu kutunditha mushuni wa ku mubila,oloni mu kutuhuka kwa Kilisitu. ¹² Bamithzindile hamo nendi mu kumbwitika,cho muli ikeye bamikatwile kwitila mu likulahelo lya bindthzili bya Njambi,uje wamukatwile kutunda ku bathsi. ¹³ Omwo mwakele mu bathsi mu bubi bweni na mu kujeneka kutuhuka kwa mibila yeni,wamipwithile bakuyoya hamolika nendi cho watukonekeleleko ku bubi bwetu. ¹⁴ Wathzimine mukanda wa bithoneka bya mikuli ije yatwimanenene yetu. Wabitundithileho ha kumupameya ha chilindakano. ¹⁵ Wonwewele ndthzili ya baka kuyula na baka mooko na kubapwitha banu baka kutala chakuhyana bakebo ha chilindakano. ¹⁶ Chojo lalo,echeleni kethi nambe umo amihithe ha kulya nambe kunwa nambe kutuhuka kwa ngonde yayiha,nambe ha litangwa lya sapalalo. ¹⁷ Ebi binapu muthzithzime wa byuma bije bilina kwija,oloni byuma bya Kilisitu. ¹⁸ Kethi umo uje atonda bunu na kulemetha kwa tungelo chimihitha na kumitunditha ku fweto yeni. Ou munu wachifwa echi akakobela mu byuma bije byanamono cho aputuke kuhwimathana chakujeneka mulonga ku bithinganyeka byendi bya ku mubila. ¹⁹ Ikeye kethi kukwata ha mutwe. Chitunda ku mutwe kuje mubila woshe kwitila moshe muje mu byaliwanene na mishisha na kukwata byoshe namo. Ikeyo ikakolo na kukoletha cha kwana kuli Njambi. ²⁰ Ngwe mwathsile hamolika na Kilisitu ku bilyo bya mithzinthzime bya mu kaye,mwafwa wa bikajo mwakele ngwe baka kwimanenako kaye: ²¹ "Kethsi mununge,nameme kumakela,nameme ku kwata"? ²² Byuma byoshe ebi bikanyongwa na kubipangetha,kwetheketha na kukambeya na kulongetha kwa banu. ²³ Awa mashiko alinakushoka na mana,na kukulahela kwa byuma bya kulingila bakebo babenya na bunu na kukaluwitha mubila wabo. Olojoni kubethi na theho ya kulyana ku mubila.