¹ Chojo ngwe bajoni bali na kupangela hamo nendi,netu allo tuli na ku milomba ngwetu kethi mu tambule ngothzi ya Njambi mukuma. ² Mwafwa ali kwendeka ngwendi, ''Hathimbu ya ibwa nja tolilile kuli yeni,cholalo na litangwa lya kwoboka njami kwathele."Kengeni,inobene ikeyo thimbu ya kwoboka. ³ Kukwethi kwaka bimbundi bya bya kutanukaho kulutwe lwa munu woshe,mwafwa tushaka bulongethi bwetu babushaule. ⁴ Oloni,tuka lisholola yetu babenya obyo bitwa kala kwitila mubilingabyetu byoshe,ngwetu tubandungo ba Njambi.Chojo tubandungo bendi mu kukakateye manene,mu tuyando,muchika, muku jela,mumangana,mukuthimpa,mungothzi,ele,na mukukaluwa kwa byuma, ⁵ mukutupupanga,mu kutwaka mu bitolongo, muku undangana,mu mathsiki a chibangubangu,munjala, ⁶ mukubwaha,mangana,mukuthimpa,mu ng'eke, mu Munthzinthzime wa kuthzila, na muchithzemo cha buthunga. ⁷ Tubandungo bendi mu lijwi lije lya buthunga,na mu binthzili bya Njambi.Tuli na ntelo ya kuthungama mu liboko lya chilyo na muliboko lya chimoswe. ⁸ Tukapanga mu bumpahu na mu kujeneka kathingimiko,mukututhembulula na mukutu shangathzala,ngwe ngwabo baje baka kukwitha ololo kumani tubaka buthunga. ⁹ Tukapanga ngwe ngwabo baje kuba batenekeyeye olojo kumani anga bana chituthzubuka bene bwino. Tukapanga ngwe baje bathsa cho - taleni! - anga - bane tuchili na kuyoya. Tukapanga ngwe bajoni banana kashitiko a mulonga wa bilinga byetu olojo kethyoni ngwe baje ba bali na kuthsa. ¹⁰ Tukapanga ngwe baje bali na buthiwa,olojo tuli na kubwahelela thimbu yoshe. Tukapanga ngwe baje baka kuhutwa,olojo tuli na kufukitha babengi. Tuka panga ngwe baje kubethi nameme chimo olojo kumani byuma byoshe tuli nabyo. ¹¹ Chojo tunendeka buthunga bwoshe kuli yeni,baka Kolinde,cho na mbunge yetu yoshe ya shokoloka. ¹² Chojo yetu kutwa mwonowethele,oloni yeni babenya muli na ku lyonowetha mu bimbunge byeni. ¹³ Chojo kwendekoni muje muna fwila - njili na kwendeka ngwe kubanike ngwange- neni lalo shokololeni bimbunge byeni nenwoni. ¹⁴ Chojo kethi mulinunge hamo na bajoni baka kujeneka kukulahela.Mwafwa buthendo muka bumuli lalo mukati ka kuthungama na kujeneka kwononoka mashiko? cholalo,kuli nungathana mukajo chili mukati ka lyethzi na lithuthulungu? ¹⁵ Indyioni nameme litabathano mukajo lyakala nallyo Yesu na Mbeliyalu? indi nameme bikojo bije byna pande kuli pangela uje mukakutaba na uje wakujeneka ku kulahela? ¹⁶ Indi nambe litabathano mukajo lili mukati ka tembele ya Njambi na tumponya? mwafwa yetu tembele ya Njambi wa kuyoya,ngwe omu bene Njambi wendekele ngwendi: "Nji kayoya hakati kabo na kwenda hakati kabo. Cho njikapwa Njambi yabo,cho bakebo bakapwa banu bange. ¹⁷ Chojo na mukulinga ngocho,"Tundenioni akati kabo,na kulyandununa kuli bakebo," Mukemwo mwendeka Shukulu. "Kethi mukwate nameme chimo cha kujwala.cho mange njikami tambula. ¹⁸ Njikakapwa yange Ishweni.chojo neni lalo mukwapwa lalo bana bange ba baanlume na babanakathzi," mukwoni mwendeka Shukulu wa Bithzili byoshe.