¹ Paulu,muluwa wa Kilisitu Yesu kwetheketha na lishiko lya Njambi mwobole wetu na Kilisitu Chinyangabili chetu, ² kuli Timoteya,mwana chili bene walikukahelo: Ngothzi na ng'eke,na kwoloka byo kutunda kuli Njambi Tate na Kilisitu Yesu Mwene yetu. ³ Ngwe muje bene nja kulongethele hathimbu ije nja kele na kuya ku Masendoniya,thala mu Efeso mangana wathe kukambeya banu bamo ngechi kethi balongethe lalo bilongetha byeka. ⁴ Cho lalo kuba pandele kwaka mana manene ku bithimutwiya bya bithimo bya kuthang'ulu na bya mikama ya mathzina aku chikota chabo cha kuthang'ulu. Mwafwa byoshe ebi bikanenetha lika bimata kutubakana bipangi bya Njambi,bijoni bika tundilila mu kukulahela. ⁵ Chojo na butumbe bweli lishiko bunapu chithzemo chijoni chifma mu mbunge ya kujela,na mu chitakutaku cha chibwa,cho lalo na mu kukulahela kwa buthunga. ⁶ Banu bamo bana thebuka na kutunda ku byuma ebi na kutengulukila ku byendeka bya bulema. ⁷ Batonda ku kukala ba longethi ba mashiko,olojo kebethi na kuthzibithitha bijoni bibali na kwendeka indi nambe bije bibali na kutabetha indi na likulahelo lya kama. ⁸ Oloni tuthzubuka ngwetu lishiko lyapwa lya libwa omwoni ngwe ba lipangetha mungila muje bana pande kulipangethelamo. ⁹ Tuthzubuka ngachije,ngwe lishiko kuba lyakelelko ha mulonga wa munu uje wa kuthungama embwe,olojo ha mulonga wa banu baje baka kupokola mashiko na baka malwothzi,baje kuba tanekeya Njambi na baka bubi,cholalo na ha mulonga wa baje baka kujeneka kuthzila na baka likamba,na mulonga wa baje baka kuthsiya, ¹⁰ na ha mulonga wa baje bakulinga bundeyi na bakwabo banalume indi na bakwabo banakathzi,na mangwangwa,na baka makuli,na baje baka kwana bukaleho bwa makuli,nambe lalo bakwabo baje baka kulinga byuma byoshe bije ku bya lipandamene na bulongethi bwa bubwa. ¹¹ Cho echi chilongetha china litombola na bing'anda bya bibwa bya bumpahu bya uje waku kwithula Njambi ebi ba nana kuli yange. ¹² Njikandelela Kilisitu Yesu mwene yetu. Nanji takamethele mwafwa wa njambetele kupwa wa likulahelo.cho na njangula ngechi nji mu pangele. ¹³ Njakele nji mukalikamba,uje mukakuyandetha kupaketha,na munu uje wa lwothzi. Olojo nja tambwile ng;eke mwafwa njakele na kulingechi mu buukuma na mu kujeneka kukulahela. ¹⁴ Chojo na ngothzi ya Mwne yetu ya thindumukile na lije likulahelo na chije chithzemo bije bya kala muli Kilisitu Yesu. ¹⁵ Choni ou muthzimbu unapu wa buthunga cho lalo ou banapande kuutaba na kuukulahela,ngwe Kilisitu Yesu wethzile mu kaye ngechi obole baka bubi. Chojo yange wa mubi wa kumanethelela hai aba boshe. ¹⁶ Oloni na mulonga wechi banjana ng'eke,ngechoni muli yange,wa mubi kumanethelela,Kilisitu Yesu athe kusholoka kuthimpa kwoshe. Cho walingile echi kupwa cha kumwenaho kuli baje baka kukulahela muli ikeye mangana baka wane mwonyo wa myaka yoshe. ¹⁷ Chojo kuli mwene wa myaka yoshe,uje wapwa ikeye lika Njambi,kukale kathingimiko na bumpahu bya myaka yoshe. Ameni. ¹⁸ Njili na kwaka kukambeya oku kuli yobe, Timoteya,munange,kwetheketha na bupolofita bwa kunima hali yobe,ngechoni ulwe ndthzita ya ibwa, ¹⁹ ku kwatetela likulahelo na chitakutakucha chibwa. Chojo babengi bana nyongethelamo likulahelo lyabo, hamulonga wa ku byna kutolilila. ²⁰ Cho na hakati kabo Himenusi na Alekiza Ndiliya,bajoni nji nondomwena kuli satana mangana ba balongethe kujeneka ku kala na likamba.