¹ Choni bandolome,kwetheketha na bithimbu na myaka,kutwapandele kumithonekela byuma bili byoshe. ² Mwafwa munathzibuka bwino yeni babenya ngwe litangwa lya Shukulu lili na kwija ngwe mwiithzi mu buthsiki. ³ Omu bakendeka ngwabo, "Kwoloka na kulinyunga bwino," cho kunyongetha kwa kukathumuna chikaija hali bakebo. Chikala ngwe mishongo ya munakathzi wa limo mukupapa. Cho kubakatha kupatuka. ⁴ Oloni yeni bandolome,kumwethi mu lithuthulungu mangana litangwa likamikathumune ngwe mwithzi. ⁵ Mwafwa yeni boshe nubana ba cheke lalo bana ba mutanya. Kethi tubana ba buthsiki nameme ba lithuthulungu. ⁶ Choni,kethi tulale tulo ngwe omu bamo bakalala. Olojo,tutoneni nakukala mu changa. ⁷ Mwafwa baje bakalala bakalingi ngocho buthsiki,na baje bakapende bakalingi ngocho mathsiki. ⁸ Cho hakukala baka mutanya,twapande kukala mu changa nakuthzala likulahelo na chithzemo kukala ntelo ya chikubo,na chinyangabili cha bwoboke bwa Helemendi. ⁹ Mwafwa Njambi katwangwile linga tukanyongwe,oloni tukatambule bwoboke kwitila muli Shukulu yetu Yesu Kilisitu. ¹⁰ Cho chakele ikeye watuthsililile mangana,nameme tutona nambe tunatala,tukayoye hamo na ikeye. ¹¹ Ngachije lithzembelekeni umo na mukwabo na kulitunga ngwe omu muli laja na kulinga. ¹² Cho bandolome,tunahyana mukumilomba,kutabela baje bapangele mukati keni cho lalo banamitubakana muli Shukulu ou wamilongethele. ¹³ Tumilomba lalo kubamona kukala helu mu chithzemo mulonga wa bipangi byabo. Kaleni mu kwoloka mukati keni babenya. ¹⁴ Tuli nakumitakametha,bandolome: bathinenei baje bali na bulwa,bathzameketheni baje banajuka,kwatheni bakakubathsiya,nakuthimpa kuli boshe. ¹⁵ Kethi kukale umo elwitha bubi ku bubi bukwabo. Olojo,kwatetheni echi cha chibwa hali umo na mukwabo na ku boshe. ¹⁶ Bwaheleeleni thimbu yoshe. ¹⁷ Lombeni kwa kujeneka kulikela. ¹⁸ Cha aneni kukandelela mu byuma byoshe.Mwafwa chikecho kushaka kwa Njambi muli Kilisitu Yesu hali yeni. ¹⁹ Kethi mukathzime mundthzindthzime. ²⁰ Kethi mukombonwethe majwi abupolofita. ²¹ Echeleni byuma byoshe. Kwatetheni kuli ebi bya bibwa. ²² Tundeni ku byuma byoshe bya chifwa cha bubi. ²³ Cho echeleni Njambi wa kwoloka amijelethe mukushula. Cho mundthzindthzime weni woshe,mwonyo,na mubila baunyunge kwa kujeneka kumiwanena milonga hamulonga wa kwija kwa Shukulu yetu Yesu Kilisitu. ²⁴ Walikulahelo ou akamithana,ou akachilinga lalo. ²⁵ Bandolome,tulombeleleniko lalo. ²⁶ Tumenekeleni bandolome boshe na kulithsemba kwa kuthzila. ²⁷ Cho njimika na buthunga kwitila muli Shukulu ngwange ou mukanda bautande kuli boshe bandolome. ²⁸ Ngothzi ya Shukulu yetu Yesu Kilisitu ikeye neni.