¹ Mungila eyi,yeni banakathzi muanapande kulyana kuli banalume beni.Lingeni echi mangana ngwe banalume bamo kubononokela ku lijwi,cho mwatha kubafungula kwakujeneka lijwi,kwitila mubilinga bya banakathzi babo. ² Omwoni banamono bilinga byeni bay kathingimiko na futithi yeni ibwa. ³ Kethi mulinge echi na kusholoka bwino kwa hanja ya mubila yeni ngwe bing'ambu bya kubinda,na mishele ya bunengu,nameme buthzalo bwa thenga embwe. ⁴ Olojo,echi chilingiwe na bubwa bwa munu wa mukati ka mbunge,na bubwa bwa mundthzindthzime wa kwononoka na kwoloka, mwafwa echi chikecho cha theho manene ku mesho a Njambi. ⁵ Mwafwa omu mukemwo banakathzi ba kuthzila baku laja baje ba bandamenene muli Njambi bakele naku lyongothzola bakebo babenya,kwitila mu kulyana kuli banalume babo. ⁶ Chona mungila eyi Sala wononokele kuli Abilahama na ku muthana ngwendi ikeye Shukulu yendi. Chojo ololo neni honi mupwa bana bendi ngwe kumwethi na kutewa bukalu bwoshe. ⁷ Cho mungila imolika,neni lalo banalume munapande kuyoya na banakathzi beni mungila ije ya litabathano ngwe bapwa banu baje bakuthzeya,munakathzi. Chojo munapande kubana kathingimiko mwafwa muka twanena hamo ngothzi ya mwonyo.Lingeni echi mangana kethi kukale chuma nameme chimo cha kwonowetha malombelo eni. ⁸ Mukumanetha,mubaboshe,munapande kukala ba bithinganyeka bimo,bakuthzibila bakwabo mema kumbunge,baku kulithzema ngwe bandolome,ba bimnunge bya ng'eke,na banu ba kulikehetha. ⁹ Kethi mwilwithile bubi a bubi nambe ha lituka ha lituka likwabo. Namukujeneka kulinga ngocho,yenioni twaleleniho na ku kwithula,mwafwa echi bene chikecho ba myangwile,mangana yenioni muka twane kubethzika. ¹⁰ "Woshe uje atonda kuthzema mwonyo na kumona matangwa a mabwa napande kubyanetha lilimi lyendi kububi na kunwa twendi ku twendeka makuli. ¹¹ Napande kufuma kuje kubya bibi na kulinga bije bya bibwa. Napande kuthetela kwoloka na kuchishaka. ¹² Mesho a Shukulu aka mno baje bakuthungama,cho na matwi endi a kathzibi malombelo abo. Olojo chihanga cha Shukulu kuchethi ku kenga ali baje baka kulinga bya bibi." ¹³ Chojo iyajo owo atha kumi bulumuna umona ngwe yenioni muthzema kulinga bya bibwa? ¹⁴ Oloni ngwe bamiyandetha ha mulonga wa kuthungana,cho munabethzika. Chojo kethi mutewe bije bakatewe bakebo. Kethi mulishoshomwene embwe. ¹⁵ Namukujeneka kulinga ngocho,kumani yenioni shakuleni Mwene Yesu mu bimbunge byeni na kumuthingimika ngwe wa kuthzila. Pweni ba kulibwahethela bithimbu byoshe ku kwambulula munu woshe uje a mihula a chinyangabili ocho chi muli nacho. ¹⁶ Olojo,kuli nge mu kulikehetha na mukathingimiko. Kaleni na chitakutaku cha chibwa mangana banu baje ba kendeke bya bibi wakatumbamene keni ka kabwa muli Kilisitu bathzibe shwama mwafwa bali na kwendeka hali yeni kuthzubuka ngwe ngwabo mubaka kulinga bubi. ¹⁷ Chojo chipwa cha chibwa manene,umononi ngwe echi chikecho chithzango cha Njambi,kulinga ngwabo muyande ha mulonga wa kulinga bya bibwa kutubakana kulinga bya bibi. ¹⁸ Chojo na Kilisitu nendi lalo wa yandele lumo a mulonga wa bubi. Ikeye ou wakala wa kuthingama wa yandelele ali yetu,yetu ba kakulinga bya bubi,ngechoni na tunene kuli Njambi. Cho ba muthsile ku mubila wa mushuni,olojo ba mupwithile wa kuyoya kuli mundthzindthzime. ¹⁹ Cho kwitila mu mundthzindthzime,waile na ku kambulula kuli uje mundthzindthzime yakele mu kamenga thimbu ije. ²⁰ Ije ya byanene kwononoka a thimbu ije ngothzi ya Njambi ya kele na ku bandamena mu matangwa aje a Nowa,mu mutangwa aje a kushonga bwato,chojo na Njambi wa yobwele lika banu babandondo - myonyo atanu natatu - kwitila mu mema. ²¹ Chojo echi chinapu chimwetho cha kwinika kumbutika chijoni chi miyola a thimbu bene ino - kethioni ngwe kutana lika mathzilo a mubila embwe,olojo ngwe kulomba cha chitakutaku cha chibwa kuli Njambi - kwitila mu kuthangula kwa Yesu Kilisitu. ²² Cho Kilisitu ali kuliboko lya chilyo lya Njambi. Waile mwilu. Tungelo,bakamoko,na baka ndthzili boshe banapande ku lyana kuli ikeye.