¹ Eni banike,njinakuthona ebi byuma kuli yeni mangana kethi mubulumune, Oloni oshe umo abulumuna,tuli namukakutwimanenako na ba Tate,Yesu Kilisitu,ou wakuthungama. ² Ikeye ng'ombelo yetu ya bubi,cho kethi yetu lika ngwe tunyunga mashiko endi. ³ Twathzibuka ngwetu tunaija na kumutanekeya,oshe ngwe tunyunga mashiko endi. ⁴ Ou akendeka ngwendi, ''njamuthzibuka Njambi " oloni kethi kunyunga mashiko endi napu muka makuli,cho buthunga kubwethi muli ikeye. ⁵ Oloni woshewo anyunga majwi endi,muli ikeye chili chithzemo cha Njambi banachipwitha. Kwitula muli echi tuthzibuka ngwetu tuli muli ikeye. ⁶ Ou woshe endeka ngwendi nathala muli Njambi cho natela babenya kwenda ngwe omu endele ikeye lalo. ⁷ Eni bakachithzemo,kunjethi nakuthona lishiko lya lihya kuli yeni,olojo lishiko lya laja eli mwakele nalyo tunde kukushangumuka. Lishiko lya laja linapu lijwi eli mwathzibile. ⁸ Nambe ngocho njinakuthona lishiko lya lihya kuli yeni.eli linapu lya buthunga muli Kilisitu neni, mwafwa lithuthulungu linakwita,cho cheke cha butunga chinamunika laja. ⁹ Woshe ou endeka ngwendi ali mucheke na kuthzinda ndolome yendi achili mu lithuthulungu na thimbu ino. ¹⁰ Ou woshe athzema ndolome yendi akathala mu cheke cho kukwethi thimbu yakutanuka kuli ikeye. ¹¹ Oloni ou athzinda ndolome yendi ali mulithuthulungu nakwenda endela mulithuthulungu; kathzibukile oku ali nakuya mwafwa lithuthulungu linafwiki ha mesho endi. ¹² Cho njinakuthona kuli yeni ngwange,eni banike,mwafwa bubi bweni banabuthambetha ha mulonga wa lithzina lyendi. Njina kuthona kuli yeni,bithemi,mwafwa munathzibuka ou watundile kukushangumuka. ¹³ Njinakuthona kuli yeni,eni bakwenje mwafwa munonowetha uje wa mubi. Njinathono kuli yeni,eni banike,mwafwa munamutanekeya Tate. Njinathono kuli yeni bithemi,mwafwa munathzibuka ou atunda kukushangumuka. ¹⁴ Njinathono kuliyeni,bakwenje,mwafwa muna takama,cho na lijwi lya Njambi linatumbama muli yeni,cho muna hyna ou wa mubi. ¹⁵ Kethi mukathzeme Kaye nambe byuma ebi bilimo. Oshe kuli umo athzema kaye,cho chithzemo chakuthzema ba Tate kuchikala muli ikeye. ¹⁶ Mwafwa byuma byoshe bili mu kaye - namashungu a mubila,mashungu a mesho,na bimata bya mwonyo - byoshe ebi kubyatundile kuli Tate oloni ku Kaye. ¹⁷ Cho Kaye na kushaka chako bikaita. Oloni ou woshe alinga mwaya kushaka cha ba akatumbama myaka yoshe. ¹⁸ Eni banike.inapu thimbu ya kumanethelako. Ngwe omu mwathzibile ngwabo bitothzi,ba Kilisitu banakwija,cho babangi bitothzi ba Kilisitu banaija. Ngechibene tunatanekeya ikeye bene himbu yakamanethelako. ¹⁹ Batundile kuli yetu,oloni kubakele betu embwe.Olojo oshe bakele batu ngwe batumbamenenene muli yetu. Oloni omu baile,chasholwele ngwe kubatundile kui yetu. ²⁰ Oloni muli na kubwabetha chakutunda kuli ou wakuthzila,cho mubaboshe mwathzibuka. ²¹ Kunjathonene kuli yeni mwafwa kumwathzibukile buthunga,oloni mwafwa mubuthzibuka cho lalo kukwethzi makuli akatundu mu buthunga. ²² Iya napu muka makuli oloni ou abyana ngwendi Yesu ikeye Kilisitu? Omu mu munapu chitothzi cha Kilisitu,hakupwa ikeye akabyana Tate na Mwana. ²³ Cho kukwethi umo akabyana mwana akala na Ishe. Ou woshe atabela mwana akala na Ishe lalo. ²⁴ Ngwe kuli yobe,echela ebi wathzibi kutunda kukulibanga bikale muli yobe,Oshe ebi wathzibile kukushangumuka kukale muli yobe,cho nobe akala muli mwana na muli Ishe. ²⁵ Echi chikecho kukulahetha anene kuli yetu - mwonyo wa myaka yoshe. ²⁶ Njina mithonekela ebi byuma hamulonga wabaje bakamithzimbaletha. ²⁷ Ngwe mwobe,kubwabetha chije watambwile kutunda kuli ikeye chakala muli yobe,cho kuushaka munu weka akulongethe.Oloni omu kubwabetha kwendi chikulongetha byuma byoshe cho cha buthunga kethi makuli,cho omu bene chinakulongethela,kala muli ikeye. ²⁸ Ahoni,eni banike,kaleni muli ikeye mangana omu akajomboloka tukakale mukuthimbpa na kwilika shwama kuli ikeye hakwija kwendi. ²⁹ Oshe nga mwathzibuka ngweni wakuthungama,thzibukenei ngweni woshe ou akalinga byuma bya butthunga na themuka kuli ikeye.