¹ Vantu vatuthinga njekangohoni jetuvangamba vaKilistu, jetu vantuama vamahungu aKalunga. ² Kunovene tunapande ntuamalutue vamu uane mukua chili. ³ Vunoni nangendjinapu njuma njanjindende ndende nga jeni mundji jingola, nambe vantu veka, nambe jange vavena. Kandjilijongola. ⁴ Muomu nanjimo njahi ndjina mono. Chinjihitha, vunoni keti mukemo mundjinathambua. Vunoni ouka njijongola ikeje muene. ⁵ Ngotjo vene ngetjimusompele chimo muomu thimbukanda ndjinjakuvanga muene nendja. Ikeje akaneha kumutana viaku shueketha via mumuthithi, navi jongola viamumbunge akavi jongola via mumbunge akavi jombolola. Keho vantu voshe vakatambula kushangala chijetjihava kundama kuli Kalunga ⁶ Viuma evinja vitualele kuliange naApolo. Nguehoni vimuetho muomu eni vakuetu, ngetji vimuetho moumu mukalilonngetha keti kutuvakana viuma evivivasoneka, ngatjije naumo uahi uakulieni jena ueka. ⁷ Muomu ija naku jelunechi chiulinatjo, kaua chitambuilechika, vunoni ngaua chitambuile, vikaulipambela natjo ngahoni kaua chitambuile. ⁸ Enimunekutalaja, munafukula laja, munahete kukushuana, etukuahi. Chilinange ndjinajongola nguehoni jeni mumuna shuana jeni muvu chili. Linga netu tuaku shuane hamoneni. ⁹ Muomu jange ndjina thinganjeka ngahoni Kalunga natu tumbika etu vaPostolo nguehoni vakumanethela. moumu etu vatupuitha vakuakututalela hathi, nakutungelu nakuvantu. ¹⁰ Jetu tuvithiname, moumu Kilistu. Vunoni eni muvakamana muliKilistu, etutuatheje. Vunoni eni munakolo, eni mulinavumpahu, vunoni etu tunashua uka. ¹¹ Nakuheta kualaja mualolo vene etutu jandangela nanjala nalihuila. Etutuvakamuthi, katuakele namuhela uachili tutumameho. ¹² Keho etu tufuitangana, tupanganamavoko etu vavena. Movatukuita vingamba tumulemetha, movatujandetha, tulikoletha. ¹³ Movatu tuaha,tuetheka kuvahana chijulo, vana tupuitha hakukombela vuahathi, tumavanda akukonga aku viuma vioshe nakalelo. ¹⁴ Viuma evindjimisonekela keti mukumui vuitha shuama, vunoni mukumikoletha nguehoni vanavange va chilemo. ¹⁵ Moumu nambemulina likumilia makulukathi avalongithi muli Kilistu, kamuethi nava isho jeni vavengi. Moumu jange njamithe mene muli Kilistu Jesu namuthimbu ua chili. ¹⁶ Ngotjovene ndjimikandelele, nguange pueni vakuakundji tambuluitha jange. ¹⁷ Muomu echi vene ndjina tumukulienu Timoteo mukua chilemo change namunange ua chilimu muene ikeje aka mivuluitha vilika viange via kuli Kilistu. Ngue mondjilinakulongetha kuoshe kuvimbunga vioshe. ¹⁸ Vamovalina kulihaletha ngechije nguehoni kandjakenjakulieni. ¹⁹ Vunoni jange ija mualolo ndjinje kulieni nga muene ajongola keho njakuthivuka, ketinguehoni lijui lia vaje vakuakulihaletha, vunoni ndhilijavo. ²⁰ Muomu vumuene vuaKalunga kevuonge chimuli jui, vunoni mundhili. ²¹ Muna jongola vika, mulamu unji njana uokulieni ndi, ndi nachilemo namuthithimba uangothi.