¹ Monande wa mumati, tambura ghano marongo ghande ghugha pungure ghakare mumoye. ² Ghuna hepa kukwama marongo ghande ngaghukare namonyo ntani ghuna hepa kupakera shinka shakufera mbili marongo ghande ngagha popere mantjo ghoye. ³ Tambura ghano marongo ghugha kwate maghoko maviri; ghatjange ghakare munda ya mutjima ghoye. ⁴ Tantera ukonentu ashi, "Ove ne mpandjande," ntani renka ndunge dikare muholi ghoye mwene-mwene, ⁵ mposhi ngadi kupopere ku vakamali varuntjo, na vakamali vavantu vangango da ghushenete. ⁶ Liyuva limwe ame anu kenge palikende lya ndjugho yande nukenge pandje. ⁷ Makura anu mono vamati vavangi, makura anu dimbururapo mumati ghumwe wa mugova. ⁸ Mumati ghuno kwayendire apite mundjira oyo yapito pepi na ndjugho ya mukamali ghumwe, makura ghuye apiti pepi nandjugho yendi. ⁹ Ghuye kwayendi ngurova, liyuva lina toko, mumundema ntani kumatiku. ¹⁰ Makura agwanekere na mukamali, ghuye kwadwatire yira mukadi wa shikumbu, ghuye kwakalire na maghano ghamwene. ¹¹ Ghuye kwakalire mukamali wa kupira kumwena mukanwa wa makuru ghamba; ghuye kapi ashungiranga akare mumundi. ¹² Ghuye kehe pano kukara muvitaura, na kumavhango ghakulitira, ntani na mundjira atatere ovo vaya pito. ¹³ Makura mukadi aduka aye kwa mumati amu vatukiri amudingiri maghoko muntingo amuncumita, makura amunwiki mantjo mushipara amutantere ashi, ¹⁴ "Ame kuna djamba ndjambo namuntji, makura mbyo naya wana nyama ya ndjambo yande, ¹⁵ makura mbyo na rupuka, nuya kushane, mbyo naya kuwana ove ghuno. ¹⁶ Ame kuna yara ghuro wande, nama keshe ghandiro gha mu Egipite. ¹⁷ Ame kuna pombere makeshe, ghapa mbete yande na sende ya mira na arowe, ntani na cinamoni. ¹⁸ Tuyende, tuka kare kumwe tuka ruwane shihoro matiku naghantje dogoro ngalipume liyuva; tuka ruwane shihoro shashinene. ¹⁹ Mukafumu wande mwato mumundi; kwayenda muruyendo rwa kughure unene. ²⁰ Ghuye kwa shimba vimaliva vyavingi unene; ghuye kapi ngaka vyuka wangu dogoro kuruku rwa vivike viviri." ²¹ Makura amutantere dino nkango dadiwa unene; nkango da shushenete dogoro mumati naye apura. ²² Mpopo tupu makura mumati apura vayende naye yira hove vana kutwara kukatomeno vaka yidipaye, ntani yira ligova vana kutwara vakali tengeke, Matjangwa gha RuGereka kuna kutanta ashi: "Ava mutwara yira mbwa vana kutwara vaka yidipaye," ²³ dogoro ava muponyo na ngumba yitomone mutjima wendi. Ghuye kwakalire yira shidira shina kuyendo shikafe mulikwe. Ghuye kapi ayivire ashi ghukaro wendi kuna kuyenda ghuka kombanite liparu lyendi. ²⁴ Vana vande vavamati, weno, tererenu kukwande; mukwate lighano na kupakera mbili dino nkango dande. ²⁵ Mukadi wa kufana weno kapishi kuterera nkango da mukanwa kendi; kapishi kumukwama nga kupukita ghuyende muliyome. ²⁶ Ghuno mukadi kwa shweda vantu vavangi vayende muliyome; ghuye kwa dipayita varume vavangi. ²⁷ Nkene aghuyendi kumundi wendi ove mundjira ya kuyenda mushirongo shava fe ghuna kara; ghuyende mumfa.