¹ Monande wa mumati, ove ghuna kutanto ashi ngaghu futa makongo ghava maparambo voye ndi, nkene aghughamba ashi ngaghufutata makongo gha muntu peke yiva tupu ashi, ² ove ghuna teye shiraha mu nkango doye da matumbwidiro odo da tundo mukanwa koye. ³ Monande, wa mukafumu, nkeneshi ghuna kara mumakongo ghamuntu, ghuna hepa kuruwana vino mposhi ngaghuparuke; ghuna hepa kukwangura ghuyende kukwendi ghuka mushungide agha dongonone ghatundepo. ⁴ Ghuna hepa kuruwana vino ove shimpe kapi ghuna yendi ghurare ndi ove shimpe kapi ghuna kukumaghuka. ⁵ Kupopere naghumoye ghutundemo murutenda yira momu shatundanga shikorama mumaghoko ghamukongo, ndi yira momu shatundanga shidira murutenda. ⁶ Ove muntu wa ghudwa, yenda kuvimbumburu vya ghushwa, ghukamone, omo vya ruwananga mposhi ngaghu kawaneko ndunge. ⁷ Vimbumburu kapi vyakara na mupangeli, ndi mukurona, nampili ndi mupititili, ⁸ ano ngoli vimbumburu kuwapayika ndya pakurombo makura pashirugho shalipemba ngava dipongayike ngava dipungure dakulya. ⁹ Dogoro shirugho shakuhura kuninko ngaghurara turo, ove muntu wa ghudwa? Dogoro shirugho munke ntani ngaghurambukamo muturo? ¹⁰ Ghuye aghamba ashi, "Tanko nurarepo kadidi, tanko nupwiyumukepo kadidi, tanko nuhonye maghako ghande nupwiyumukepo kadidi"- ¹¹ ano ngoli shirugho shino ghuna kurara ruhepo ngarukuwana yira muna widi ntani vihepwa vyoye ngava vikushakana yira momu vashakananga vakavita. ¹² Anwe vantu vaku pira mulyo - vantu va varunde - va kuyendaghura kumwe na ku ghamba vimpempa, ¹³ anwe kupyata na mantjo, ntani nampadi mutape viyivito muneye na nyara denu mughambe vimpempa. ¹⁴ Virugho navintje vavo kughayara ghurunde mudimutjima davo; vavo kehe pano kuyita marwanambo muvantu. ¹⁵ Mukonda ndjoyino mbyo ngava wanena lihanauko lya nkwangu vahana kuwana marondoro; mpopo tupu vavo ngava wana ghurema wa ghunene wakupira kuveruka. ¹⁶ Mpovili vininke vitano-na shimwe ovyo anyenga Hompa, ntani shino sha utano na umwe ghuye kwato kukukata-kata: ¹⁷ kukunenepita, ruraka rwa kughamba vipempa, maghoko ghakudipaya vantu hana undjoni, ¹⁸ mutjima wa kughayara udini Karunga, mpadi dakuyendaura diruwane urunde, ¹⁹ muntu wa kutapa umbangi wa vimpempa wa ku hanita vimpempa ntani namuntu wakuyita udona mukatji ka mbunga. ²⁰ Monande wa mukafumu, ghuna hepa kulimburuka kumarongo ghavasho ntani kapishi ku vhurama marongo ghava nyoko. ²¹ Nkango davo dikare kehe pano mumutjima ghoye; ghudi kumange muntingo yoye. ²² Marongo ghavo, ngagha kupititira muruyendo; ngagha ku kunga kumatiku, pakurara; ntani pa ku rambuka, ngagha kuronga ghukaro wa ghuhunga. ²³ Dimuragho davo kwakara yira ramba, ntani marongo ghavo kutapa ghukenu; mposhi ghuvhure kuwapukurura ghukaro ghoye ntani ghuku wapukurure naghumoye ghukuronge liparu. ²⁴ Marongo ghavo ngagha kupopera kuva kamali varuntjo, ntani ngagha ku kunga kunkango da ushenete da vakamali varuntjo. ²⁵ Kapishi ngaghukare nalidogho lyamu mutjima na vipara vyava kamali vavawa unene ntani kapishi ngaghu pulitire nkope davo dadiwa dikutware muliyove. ²⁶ Mukadi wa runtjo kuvhura akughulite arare namukafumu kumfuto ya kutika ku mukosho wa muntje umwetupu wa mboroto, ano ngoli nkene aghurara na mukamali wamuntu waku kwara ngaghu kombanita navintje kumwe naliparu lyoye. ²⁷ Ngoli vyaghu shili murume kuvhura ashimbire makara ghamundire panturo yendi makura vyuma vyendi navikoverero vipire kupya ndi? ²⁸ Ngoli vyaghu shili murume kuvhura kuyenda pamakara ghamundiro ghana geho ngapire kupya kumpadi dendi ndi? ²⁹ Mo ngoli vyaku fana nkene mukafumu arara namukamali wa vantu; kehe uno wa kuruwana vino akona kuyenda mukashitiko. ³⁰ Vantu kapi vakengereranga muwidi nampili ndjeghu wakuvaka ndya alye mukonda yandjara. ³¹ Ano ngoli nkene vana mukwata, ndje kufuta mfuto ya rutano na ruviri yamulyo wavyo avaka; ntani ngava mushakana limona lyendi nalintje olyo aweka. ³² Kehe uno murume wa kushondera kuruwana ghugova; ghuye kukudjonaura mwene. ³³ Ghuye ngava muremeka kumwe ngakare mulishwaghu lyalinene lyaku karererapo. ³⁴ Murume wakukwara kurwa lifupa naghugara wa unene ku nkwara dendi; ghuye kwato nkenda ntani nkoko yendi na kupwashi. ³⁵ Ghuye kwato kutambura mfuto yakutika kehe pano, kwato mfuto ya kuvhura kudongononapo lishandu lyendi.