¹ Vishewe vya Salomoni mona Dafiti, Hompa wa Israeli. ² Vino vishewe ngavi kuronga ukonentu ngaghu kare na maghano ghaghuhunga, mposhi ngaghukare na ghukonentu wa unene, ³ ashi weni omo ghuvhura kukara nandunge dakulimburuka ku uhungami, na ushili, ntani na ushili. ⁴ Vino vishewe kuronga muntu wa kupira ndunge akare na ukonentu, ntani kuronga mudinkantu akare na ukonentu. ⁵ Ntani vantu vakuterera vino vishewe kuwana ukonentu vawederere kumarongo ghavo, vakare varongi vakuronga na ukonentu, ⁶ vakare na upititili wa urongi, mposhi ngava vhure kuyuvha vishewe, nankango da ukonentu ntani na mahoramo ghamu nkango dava konentu. ⁷ Kutjira Hompa ndjo ntjima-ntjima yakuhova ya ukonentu - magova kushwena ukonentu ntani vavo kushwena marongo. ⁸ Monande, limburuka kumarongo ghava kurona voye ghavasho na vanyoko; ⁹ marongo ghavo kuwapeka ukaro ghoye yira shituku shina wapo kumanga kumutwe ntani na shiranda shina wapero muntingo yoye. ¹⁰ Monande, nkeneshi vandjoni kuna kukushongaghura, kapishi ghuva kwame. ¹¹ Nkene ava ghamba ashi, "Ya kuno kukwetu, tuyendenu tushane vantu tudipaye, tuyendenu tuvandere vantu tuva homokere maghoko-ghoko; ¹² vavo weno vana kara na monyo ntani na marutu ghandjewa-ndjewa, tuva minenu ghuyumi vatundepo, vafane yira mpovo wero mulikwina; ¹³ makura ngatu kaghupe limona lyavo lyalingi lyaku kushuva-shuva; makura ngatukayude mumandi ghetu limona olyo ngatu ka shakana kuvantu; ¹⁴ tuyendunu kumwe tukupakerere, mposhi tuka kutapere limona olyo tuka wana mo kumwe"- ¹⁵ Monande wa mukafumu, washa yenda mundjira yimwetupu na vantu va weno; mpadi doye dikare ghure navo; ¹⁶ vavo nakukukata-katashi mukuruwana ghudona ntani kehe pano vavo kukuwapayikira vadipaye vantu. ¹⁷ Kapi vyawapa ashi ghuwapayike likwe ghuli yandjumune ghukwate shidira nkene shi shasho kuna kukumona. ¹⁸ Vantu vakufana weno vavene vana kukuteyo muviraha - vino viraha mbyo ngavi vakwato vafemo vavene. ¹⁹ Kumwe na kehe ghuno wakuwana limona lya kuruwana ghukoro-kotji; ntani nka vavo ngavafa na mfa da ghukoro-kotji ngogho varuwananga. ²⁰ Ghukonentu kuna kuyiyira mushitaghura, kumwe nakumavhango naghantje; ²¹ kuna kughamba na liywi lyalinene muvitaghura, kumwe namuma vero ghakungena mu vitata kuna kughamba ashi, ²² "Anwe magova, dogoro shirugho shakuhura kuni, ngamu hora kukara mu ghungova? Anwe mavaya, shirugho shakuhura kuni, ngamu kara mu ghuvaya wenu, ntani shirugho shakura kuninko, ngamu vhura kushwaghura ghukonentu, kapi nka ngamu vhura kukuronga ghukonentu ndi? ²³ Anwe muna hepa kuterera nkene kuna kumuronga; ame nganu mupa maghano ghande muwapeke ghukaro wenu; ntani nganu mupa nkango dande ngamu waneko nanwe ku ghuhungami wande. ²⁴ Ame kwamuyita, muya ponge kukwande ano ngoli anwe muna shwena kuterera; ano mbyo na tapa lighoko lyande kukwenu, anwe kapi muna shana kuterera kukwande. ²⁵ Anwe mwa shuva marongo ghande naghantje ntani kapi mwashana kuterera kumarondoro ogho natapire kukwenu. ²⁶ Ame nganu shepa opo ngamugwanekera na mughudito na viponga, ame nganu mushwagura opo ngamukara naghoma wa ghunene - ²⁷ opo ngamu gwanekera na maghudito na viponga na mpatakani ngamukare yira mumpepo ya kakundu-kundu ya kuyunga ghunene, ngayiyite kukora ghunene papenu ame nganu mushepa. ²⁸ Ntani ngamu shana mbatero kukwande, ame kapi nganu valimburura; ngamu ya kukwande muya ntjana-ntjane, ano ngoli kapi ngamuya ngwana. ²⁹ Mukondashi anwe mwa nyenga ghukonentu ntani kapi mwa limburuka kwa Hompa, ³⁰ anwe kapi mwatambura marongo ghande, ntani anwe kapi mwa tambura marondoro ogho natapire kukwenu. ³¹ Vavo ngavalya nyango da muviruwana vyavo, dogoro ngava kute nyango davo ngadiva yitire lishwaghu. ³² Vandjoni kufa mukandashi vavo vanyenga ghukonentu, ntani magova kudjonauka vapwepo mukonda ya kupira kukwata lighano. ³³ Kehe ghuno wa kuterera kukwande ngakara nambili na mulipwiyumuko ntani ghuye ngayowoka kapi ngakara naghoma kehe ghuno."