¹ Solomoni akuyuvire naHompa pharaoh wa Egipite kuhamena kukwara. Aupu mona Pharaoh ntani nakumuyita kushitata sha Daviti dogoro ghamanine kudika ndjugho yendi mwene, ndjugho yaHompa, nalikuma lya kukundurukuida Jerusalema. ² Vantu vatapire ndjambo kumavango gha kuyeruka, mukonda ashi kwato shimpe ndjugho oyo vadika mulidina lyaHompa. ³ Solomoni ghaneghedire shihoro shendi kwaHompa mukuyenda mumashongwa gha Daviti vashe, kughupako ovyo ashi adjambire ntani ghasholire navi tovalita kumango ghakuyeruka. ⁴ Hompa ayendi kuGibeon gha kadjambere nkoko, momo kwako kunya kwakalire livango lyakuyeruka. Solomoni ghakatapire ndjambo yakushora kushidjambero. ⁵ Hompa ghamoneke kuGibeon kwa Solomoni mundjodi kumatiku, aghamba, '' Pura! Vinke nikupa? ⁶ Mpo ngoli Solomoni aghamba, ' Wanegheda unene likukwatakano lipuro lya kutikilimo kwamukareli ghoye, Vavava Daviti mukonda ayendire kushipara shoye nalihuguvaro, muuhunga, na mutjima wa kuvyukilira. Wamupungwira likukwatakano mulipueo lya kutikiliramo ntani wamupa mona wakushungira pashipuna shaUhompa namuntji. ⁷ Weno Hompa Karunga wande, unatura mukareli ghoye Hompa mulivango lyavavava Daviti, nampiri ngoli ashi nimwanuke wamudidi. Kapi niyiva ashi weni omo ningenamo ndi po omo nirupukamo. ⁸ Mukareli ghoye kunakara mukatji kavantu ovo watoghorora, vantu vavanene, vavangi unene mukuvavarura. ⁹ Mpo ngoli ashi mupe mukareli ghoye mutjima wakukwatakana mukupangura vantu voye, mposhi nidimburure pakatji kauwa naudana. Mora are wakuvhura kapangura vano vantu voye vavanene. ¹⁰ Lishungido lya Solomoni lyahafitire Karunga. ¹¹ Mpo ngoli Karunga aghamba kukwendi, '' Mukondashi unapura vino vininke ntani kapi unapura liparu lyanaumoye lyalire ndipo ugawo ndi po liparu lyavana nkore voye, nani ngoli unakurombere likwatakano mukudimburura mpora. ¹² Kenga, weno kuni kuruwanena navintje ovyo unapura opo unampa lishungido lyoye. Nakupa mutjima waukonentu na likwatakano, mora ashi kwato ogho ghakaroko wakufana yira ove, ntani kwato wa kukara yira ove ngayo kuruku roye. ¹³ Ntani nakupa ovyo unadiri kupura, navintje ugawo na likuto, mposhi ngamupire kukara nampiri umwe wavaHompa pakatji kenu wakufana yira ove mumayuva ghoye naghantjeya. ¹⁴ Ntjene ngauyende mundjira yande nakukwama masho na dimuragho dande, yira momo vasho Daviti vayendire, makura nganiwederera mayuva ghoye.'' ¹⁵ Makura Solomoni arambuka, yayo kwakalire ndjodi. Ayendi kuJerusalema nakayima kuwato wa likukwatakano lya Karunga. Ghakatapa ndjambo yakushora na ndjambo ya mpora, nakutura shipito shavakareli navantjeya. ¹⁶ Makura vakamali vaviri vavashondedi avaya kwa Hompa na kuyayimana kumeho yendi. ¹⁷ Mukamali umwe aghamba, '' Oh, mpititi wande, uno mukamali ntani name kwatunga mundjugho yimwe, apa nashampurukire ghuye naye mo akalire. ¹⁸ Kwashorokire muliyuva lyautatu kutunda opo nashampurukire olyo naye uno mukamali ahampurukire. Wakalire kumwe kwato umwe ogho ghakaliro natwe mudjugho, ene ngoli muuviri wetu tupu mundjugho. ¹⁹ Makura mona wamukamali uno wamumati ghadohoroka matiku, mora amudekire. ²⁰ Makura uye arambuka pakatji kamatiku nakughupa monande kuruha rwande ruvede oro mukareli ghoye anarara, nakumutura kumashwe ghendi, nakutura monendi wakufu kumashwe ghande. ²¹ Opo narambukire ngurangura niyamweke monande, uye anafu. Ene ngoli animukengurura nawa ngurangura, uye kapishi monande, ogho nashampuruka.'' ²² Makura unya mukamali umweya, aghamba, '' Hawe, mona wamuyumi monande, ntani wakufa monoye.'' Mukamali wakuhora aghamba, '' Hawe, mona wakufa ghoye, ano wamuyumi po wande, '' Omo mo vaghambire kumeho yaHompa. ²³ Makura Hompa aghamba, '' Umwe wapakatji kenu kunaghamba, uno monande wamuyumi, ntani ghoye anafu, ntani umwe kuna kughamba, '' Hawe, monoye wakufapo, ntani wande wamuyumipo.'' ²⁴ Hompa aghamba, '' Ndjitirenu rufuro.'' Makura avayita rufuro kumeho yaHompa. ²⁵ Makura Hompa aghamba, '' Mutetenu mwanuke ogho mumaruha maviri, ntani mutape ruha rumwe kwamukamali uno ano rumwe kwa umweya.'' ²⁶ Makura mukamali ogho monendi wamuyumi aghamba kwa Hompa, momo mutjima wendi wayulire nkenda kwamonendi, ntani aghamba, '' Mpititi wande, mupenu mwanuke wamuyumi, ntani mwashamudipagha.'' Ene ngoli mukamali umweya aghamba, '' Kapi akara wande ndi ghoye, mutetenu.'' ²⁷ Makura Hompa alimburura nakughamba, '' Tapenu mwanuke ogho kwamukamali wakuhova, ntani mwashamudipagha. Vavo mbo vawina.'' ²⁸ Opo vayuvire vaIsrael mpanguro odo ghatapire Hompa, mukonda vamonine ukonentu waKarunga kwakalire mumwendi mukutapa mpanguro.