^{1 2} Opo akurupire Hompa Daviti namwaka dinatikimo, kava mufikanga nangugho, ngoli kapi kadi mupanga ghupyu. Makura vakareli vendi ava mutantere, '' Tupulidire tukashane mukamali ghona ogho adiro kukundama rumwe mukafumu morwa ntilyetu hompa. Ngaya karere hompa nakumupakera mbiri. ³ Makura ava shana mukadona wamuwa mwayendo maruha naghantje gha Israel. Ava wana Abishagi wa mushunami kumwe nakuka muyita kwaHompa. ⁴ Mukadona kwakalire wamuwa unene. Akarere Hompa nakumupakera mbiri, ngoli Hompa kapi kakaranga naye panyama. ⁵ Ruvede oro, Adoniya mona wamukafumu waHagita akuyerura mwene, aghamba, '' Ngani kara Hompa.'' Makura awapayiki turukara twavita navarondi tukambe kumwe navakafumu dimurongo ntano vakuupita kumeho yendi. ⁶ Vashe kapi vamukuyauka rumwe, mukughamba, '' Morwa nke ghuna ruwanene vino ndi vinya?'' Adoniya kwakalire nka munru wamuwa unene, kwa mushampurukire paushikwama mbeli kwa Abisalomu. ⁷ Ghuye ava kuyuvhu na Jowabu mona wamukafumu wa Zeruya kumwe namuruti Abiyatara. Ava kwama Adonayi naku muvatera. ⁸ Ngoli muruti Zadoko, Benaya mona wamukafumu wa Jehoyada, mupumbi Natana, Shimeyi, Reyi, namapenda ogho gha haminino kwa Daviti kapi vakwami Adoniya. ⁹ Adoniya adjamba ndjambo dandjwi, hove, nantana dakuneta paliwe lya Zoheleti, olyo lyakaro kuntere yaEni Rogeli. Arekere vaghuni vendi, vana vaHompa va vakafumu, navantu navantje vaJuda, Vakareli vaHompa. ¹⁰ Ngoli kapi arekilire mupumbi Natana, Benaya, mapenda ghava kavita, ndi mughunyendi Solomoni. ¹¹ Makura Natana atantere Batisheba vawina vaSolomoni, mukughamba, '' Kapi ghuna viyiva ashi Adonayi mona wamukafumu wa Hagi ana kara Hompa, na Daviti ntilyetu kwato ovyo ana yivako ndi? ¹² Ngoweyo ntanko nikupeko maghano, makura ghuyoghore monyo ghoye namonyo wamonoye wamukafumu Solomoni. ¹³ Yenda kwaHompa Daviti, kamutantere, '' Ntilyande Hompa, nani kapi waghana kwamukareli ghoye, mukughamba, '' Ushiri Solomoni monoye wamukafumu ndje ngapangero kuruku yande, makura ngashungire pashipundi shande sha ghu Hompa?' Morwa nke ngoli oghuno Adonayi ana kupangera?' ¹⁴ opo ghuka ghamba ngoweyo naHompa, ame kuniya kuruku yoye nakuka pameka nkango doye.'' ¹⁵ Makura Batisheba ayendi munkondwa yaHompa. Hompa kwakurupire unene, ngoli Abishaga wamushunami kwakalire mukareli waHompa. ¹⁶ Batisheba atu ngoro nakunyongama mwene kumeho yaHompa. Makura Hompa aghamba, '' Vinke ghuna shana?'' ¹⁷ Ghuye amutantere, '' Ntilyende, ove kwaghana kwa mukareli mwaKarunga Hompa wetu, mukughamba, 'Ushiri Solomoni monoye wamukafumu ngapangera kuruku rwande, nakushungira pashipundi sha Uhompa.' ¹⁸ Ngowoye, kenga, Adonayi ndje Hompa, ngoli ve, ntilyande hompa, kwato ovyo unayivako. ¹⁹ Ana djamba ndjambo daHove, vitana vyakuneta, na ndjwi dadingi, nakurekera vana vaHompa navantje, muruti Abiyatara, na Jowabu mukughona wava kavita, ngoli kapi kavarekereko Solomoni mukareli ghoye. ²⁰ Ngoweno ngoli ve, ntilyande hompa, mantjo ghava Israeli navantje koye vana kenge, mukutaterera ghuva tantere ashi are ogho ngashungiro paashipundi shaUhompa kuruku roye, ntilyande. ²¹ Ntjeneshi kapishi ngoli ngavikara, opo ngafa ntilyande Hompa akarare pavakughona vendi, makura ame na monande wamukafumu Solomoni ngatu moneka yira vakorokotji.'' ²² Okuno ghuye shimpe aghamba naHompa, mupumbi Natani oghuno.'' ²³ Opo ayire kumeho yaHompa, anyongama mwene shipara mulivhu kumeho yaHompa. ²⁴ Natani aghamba, ''Ntilyande hompa, ove ghuna ghambo, '' Adonayi ngapangera kuruku yande, nakushungira pashipundi shande shaUhompa?' ²⁵ Morwa ana ghurumuka namuntji nakukadjamba ndjambo daHove, vitana vyakuneta, na ndjwi dadingi, kumwe nakurekera vana vaHompa vavakafumu navantje, mukughona wavakavita, namuruti Abiyatara. Kuna kulya nakunwa kumeho yendi, nakughamba, '' Akare namonyo waure Hompa Adonayi!' ²⁶ Ngoli ame ko, mukareli ghoye, muruti Zadoko, Benaya mona wamukafumu waJehoyada, kumwe namukareli ghoye Solomoni, kapi ana turekere ko. ²⁷ Ovino ntilyande Hompa waruwana wahana kukutantera nka, vakareli voye, are ngashungiro pashipundi sha Uhompa kuruku roye?'' ²⁸ Makura Hompa Daviti alimburura nakughamba, '' Muyitenu Batisheba avyuke kukwande.'' Aya oko akalire Hompa nakuya yimana kumeho ya Hompa. ²⁹ Homap atura mughano nakughamba, '' Karunga muna mwenyo, ogho andjoghoro kumaudito naghantje, ³⁰ mo nakughana kukoye mwa Karunga, Karunga waIsraeli, mukughamba, ' Solomoni monoye wamukafumu ngapangere kuruku rwande, naku shungira pashipundi sha Uhompa mulivango lyande,' kuni viruwana namuntji vino.'' ³¹ Makura Batisheba atu ngoro shipara mulivhu naku nyongamena mwene kumeho yaHompa nakughamba, '' Ndi ntilyande hompa Daviti akare namonyo waure!'' ³² Hompa Daviti aghamba, '' Ndjitirenu muruti Zadoko, mupumbi Natani, naBenaya mona wamukafumu wa Jehoyada.'' Makura ava ya kumeho ya Hompa. ³³ Hompa ava tantere, '' Yendenu namarenga gha ntilyenu, na kughupa Solomoni monande wamukafumu mumurondeke kukashino kande nakumutwara kuGihoni. ³⁴ Makura muruti Zadoko namupumbi Natani vakamuwavekere mu Uhompa waIsraeli kumwe nakukafuda rumbendo nakughamba, ' Akare namonyo waure Hompoa Solomoni!' ³⁵ Makura mukamukwame, kumwe akaye nakuya shungi pashipuna shande sha Uhompa; morwa ghuye ngakare Hompa mulivango lyande. Ame kwamutoghorora akare mupangeli wavaIsrael naJuda.'' ³⁶ Benaya mona wamukafumu waJehoyada alimburu hompa, nakughamba, '' Makura vikare ngoli! Ndi Karunga, Karunga wantilyetu Hompa, avi ngambipare. ³⁷ Yira momo tupu Karunga akara nantilyetu Hompa, ndi akare nka naSolomoni, kumwe nakurenka shipundi shendi sha Uhompa ngashinenepe shipitakane shipundi shaUhompa wa ntilyetu Hompa Daviti. ³⁸ Makura muruti Zadoko, mupumbi Natana, Benaya mona wamukafumu wa Jehoyada, navakareli kumwe navapeleti ava yendi okuno Solomoni vana murondeke pakashino kaHompa Daviti, ava mutwara ku Gihoni. ³⁹ Muruti Zadoko aghupu ruvingi rwamaghadi mutende kumwe nakuwaveka Solomoni. Makura avafudu rumbendo, ngoli vantu navantje ava ghamba, '' Akare namonyo waure Hompa Solomoni!'' ⁴⁰ Makura vantu navantje ava mukwama, makura vantu ava vete tufilita kumwe na kuhafa murumwemwe, makura udjuni aghu kunyunganga kushikumo shavo. ⁴¹ Adonayi nava rekerwa navantje ovo akalire naye tupu vamana kulya ava viyuvhu. Jowabu opo ayuvhire mushayaro warumbendo, aghamba, '' Muyoyo munke ghuna karo munkurumbara?'' ⁴² Okuno ghuye shimpe aghamba, Jonatani mona wamukafumu wamuruti Abiyatara aya. Adonayi aghamba, '' Ngena, morwa ove muntu wamuhunga kumwe nakuyita mbudi yayiwa.'' ⁴³ Jonatani alimburura nakutantera Adonayi, '' Ntilyetu Hompa Daviti ana tura Solomoni Hompa, ⁴⁴ ngoli Hompa kuna mutumu kumwe na muruti Zadoko, mupumbi Natani, Benaya mona wamukafumu waJehoyada, navakereti kumwe naVapeleti. Mbo vana rondeko Solomoni pakashino ka Uhompa. ⁴⁵ Muruti Zadoko namupumbi Natani mbyo vana kamuwaveka Hompa paGihoni, ngoli opo vana kaya oko vana hafa, makura nkuru-mbara mbyo yina kara mumuyoyo. Ogho ngo muyoyo ghuna yuvhu. ⁴⁶ Makura ngoli, Solomoni ashungiri pashipundi sha Uhompa shamaUntungi. ⁴⁷ Shimpe nka waro, vakareli vaHompa avaya vaya tungike ntilyetu Hompa Daviti, mukughamba, ' Ndi Karunga ghoye arenke lidina lya Solomoni likare lyaliwa kupitakana lidina lyoye, kumwe nakurenka shipundi shendi shaUhompa shinenepe ngashipitakane shipundi shoye sha Uhompa.' Makura Hompa atu ngoro akunyongamene kumbete. ⁴⁸ Hompa shimpe aghamba, '' Vamutungike Karunga, Karunga waIsraeli, ogho atapiro muntu ashungire mushipundi shande sha Uhompa liyuva lino, shimpe nka mantjo ghana ghumwande mukuvikenga.'' ⁴⁹ Makura varekerwa navantje vaAdonayi ava kara nashitukutjima. Ava shapuka nakuyenda-yenda nkehe uno kukwavo. ⁵⁰ Adonayi kwakalire naghoma kwaSolomoni kumwe nakushapuka, ayende, nakuka kwaterera kumaruvinga yashidjambero. ⁵¹ makura ava vitantere Solomoni, mukughamba, '' Kenga, Adonayi anatjira hompa Solomoni, makura mbyo ana kakwaterera kumbinga dashidjambero, mukughamba, ' Karengenu Hompa Solomoni aya nganene ntanko muhovo ashi kapi ngadipagha mukareli wendi narufuro.'' ⁵² Solomoni aghamba, '' Ntjeneshi aku negheda naghu mwendi ashi muntu wamuhu, kwato nahuki dendi ngadi wero palivhu, ngoli ntjeneshi udona ngani wanamo mwendi, ndje kufa.'' ⁵³ Makura Hompa Solomoni atumu vakafumu, ovo vakaghupiroko Adonayi kushidjambero. Aya nakuya twa ngoro anyongamene kwa hompa Solomoni, ngoli Solomoni amutantere, '' Kayende kundjugho yoye.''