¹ Njite Job shepani, lriaco: ² ''Panaya nocaite yacoti jipitiperri sho: corrinatsa notaita njorretaca nonaapa njorrapitaca ima. ³ Nonantja noajica akjerre cantja noketa Dio. Noantja nocapa Lriofacawa lricojle. ⁴ Nocaitentja Jlimi matsia nonacoapana njite aimantja njaji nocaitepeoda lrirso ajádalri. ⁵ Noajintja njomica matsia njaji yacoti Lricaiterri norso njite noají coanshopaca njaji Lricaiterri. ⁶ ¿Capjantja Lricadaa nocapa Jliida Lriemácarro nokjoete? Corrina, icamitsantja Lriwapa jlimi norso. ⁷ Icatsa nirse caacoca Lriapiya jliaji inaiki mamatsicanadalritsa. Icatsa cayo jliyapeta noya nomatsicana caidalriwetsa jliaji talricanati icaitecada nomatsicana nacao. ⁸ Noacada nomani jérri imotolri njite, corrin nocapa nirse, noacada nomani jérri shewalri nirse, corrin tsakja noketa nirse. ⁹ Noacada nomani atsialriema nacojle jérri irso, corrin nocapa nirseni, njite nodia nomani inarroema nacojle jérri irso, corrin tsakja nocapa nirseni. ¹⁰ Mitsa Lriají matsia njaji nonaitjalri nacoanamtsa; Lriwi cádanaco njoa, nomoto watsa lrioya jliaji jirrapitinadalri owirro matsiadalri sho. ¹¹ Nnoawa jliapodam matsia, nonaitja cayoji Lrioma capisho nonaitjaca njite corrin nomacacani. ¹² Nonaitja cayoji Lriaco icaite capisho njite corrin njoenaca lrioya; nomatsieta Lriaco nocaolre ricó, nomatsieta pja nonacoa naoya njaji iñjaodati noiñjalri mana. ¹³ Corrin pacapa apada pja Lricayosho, ¿coca itaita icadaa Lripadamácarro? Coca cadaa Lrioma, Lrinaitja lrirsowawa. ¹⁴ Niini lrinaitjaca norso jliaji Lricaiterri Lrinaitjaca norso; aima pja njaji iwaopiakjeti nacayoshoperri nokjoete. ¹⁵ Niini panaya, nofietacawa matsina Lripeyajle; nowaopia cádanaco Lrinaco, icamitsa nofiocawa Lrikjoete. ¹⁶ Ima oopi Dio imjaidata nocaolre ricó; jliaji Jidati iminalri ifietaca njoa. ¹⁷ Njite jliaji cadaocádalri deepi ricoda corriotsa lrimacoitá carroca njoa, corrin tsakja jliaji cadaocádalri matsinadalri idanatalri noecoa inonadalri.