¹ Ngecize Nouemi uakele nakavusoko ka yalieni, yala ua vupite ua kucikota ca Elemeleke, lizina lieni Mbouaze. ² Lute, kamouave uampuevo, ua handekele kuli Nouemi ngueni, ''Njika pupulile kuvize viasala ku mitue ya manona muihia. Njikavangeya uose kunji kauana kutetela.'' Kaha Nouemi ua handekele kuli ikeye ngueni, ''Hamoye muangana ua mpuevo.'' ³ Lute uaile na kupupulula vize viasalele muihia hanima ya kutia. Uatele hacihanda ca ca mehia a Mbouaze, ou uakele ua kucikota ca Elemeleke. ⁴ Kaha kutala, Mbouaze uaile kufuma ku Mbetetema na kuhandeka kuli va kakutia ngueni, ''Yehova akale nenu.'' Vamukumbuluile nguavo, ''Yehova akuvezikise.'' ⁵ Kaha Mbouaze uahandekele kuli ngamba yeni ue uakutala vaka kutia ngueni, ''Yala muka ou akuka;amuenia muana mpuevo ou?'' ⁶ Uze ngamba ua kutala vaka kutia uakumbuluile ngueni, ''Muana mpuevo ka Mouave uze uezile na na Nouemi kufuma kucifuti ca Mouave. ⁷ Ua handekele kuliange ngueni, ''Muane njipupulile na ku kungulula kuli ize mikuta ya manona akuteta hanima ya vaka kutia.'' Kaha nezile kuno nakupanga kufuma kucimene nahano halili. Vunoni nahuimine kavundende mundzivo.'' ⁸ Kaha Mbouaze ua handekele kuli Lute ngueni, ''Kauesi na kunjivuilila, muanange uampuevo? Kati uye na kupupulula mumehia eka; Kati useze lihia liange. Ngecize, tumama kuno upange na vakakupanga vange vava mpuevo vanike. ⁹ Meso ove atale mulihia lize livanakutia vamala ava kaha ukave hanima ya vampuevo. Kanjavalekele vamala ava kuhonoua kukukuata? Nga unevu mpuila, kaha ukuya kumilondo yamema kaha kunua mema avanasu vantu ziange vavamala.'' ¹⁰ Uze mpuevo ua uisile meso eni hamavu kuli Mbouaze na kumutsikamena hamavu. Uahandekele kuli ikeye ngueni, ''Vikandzo vinji uanena kutetela kumeso ove linga unji hake mana, ange mukua cifuti ceka?'' ¹¹ Mbouaze uahandekele kuli ikeye ngueni, ''Vana njambuluila, viose vi unapange kufuma ha kutsa ca yaliove. Uaseza iso, nanoko, kaha nacifuti ciove cakusemukila na kukava nokomueno na kuiza kuvantu vakuhonoua kuziva. ¹² Yehova a sitsise ha vipange viose. Utambule fueto yakusula kufuma kuli Yehova, Njambi ya va Isaleli, muma vava eni mukeko mu una uana kuovoko.'' ¹³ Kaha ua handekele ngueni, Nji uane kutetela kumeso ove, kukuange, muomu ua njivendezieka na kuhandeka mezi acili kuliange, vutuhu kati nji umo ua vangamba ziove vava mpuevo.'' ¹⁴ Ha tsimbu ya kulia Mbouaze uahandekele kuli Lute ngueni, ''Tuaya kuno, ulie muka, tanta kama yove muvinangele.'' Uatamamene kukahati kava kakutia, vamuhele manona akupapa, kaha ualile nomu mua hetele hakukuta nakusez ho amo. ¹⁵ Omu mua valekele kupupulula, Mbouaze uahandekele vangamba zieni vava mala ngueni, ''Muecienu apupulule na hamikuta ya manona akuteta, kati mumusaule.'' ¹⁶ Kaha naua mumu somueneho imo mitue ya manona ha mikuta, mumusile apupuplule, kati mumu handekele.'' ¹⁷ Ngecize ua pupuluile na kucinguezi. Kaha ua zunguile mitue ya manona apupuluile, na manona asetekele mu efa ya savanda. ¹⁸ Ualituikile na kuya kuimbo. Kaha nemueno uamuene viose via pupuluile. Kaha Lute uatuhuile manona akupapa asaleleho nakuhia nemueno. ¹⁹ Nemueno uahandekele kuli ikeye ngueni, ''Una pupuluila kuliko lelo? Una kapangelele kuli? Vamuvezikise yala ou nakutetela.'' Kaha Lute ua mu lekele nemueno via yala mueia lihia okuo kua kapangelele. Ua handekele ngueni, ''Lizina lia yala ou muenia lihia kunjakapangele ikeye Mbouaze.'' ²⁰ Nouemi uahandekele kuli nemueno ngueni, ''Vamuvezikise kuli Yehova, ou na hanoua kueca. Kulingila likozi kuli vatoni na vaka kutsa.'' Nouemi uahandekele kuli nemueno ngueni, ''Yala ou uakutupandama etu, umo uetu ua kutusokola.'' ²¹ Lute ka Mouave uampuevo ngueni, ''Vusunga, handekele kuliange ngueni, ulisunge nava ngamba ziange vava mala nomu muva kumanesa kutia.'' ²² Nouemi uahandekele kuli nemueno ngueni, ''Cina vuika, muanange, uye nava ngamba ziange vava mpuevo, kutina vakaku uana muihia lieka.'' ²³ Kaha ualipandekele na vangamba zia Mbouaze vava mpuevo linga vapupulule nakutsongo ya kutia savanda na kutia tiliku. Ua tumamene na nemueno.