¹ Tangelo vavali vezile ku Sondome kusimbu yacinguenzi nsimbu Lote uatumamene yambelo ya Sondome. Lote ua va muene naluholo lueni hamavu. ² Ua handekele ngueni, ''muane enu vasukuluange, njina mivundila aluliukenu okunkanda mundzivo ya ngamba yenu, mutumame kutsiki vuno, nakutana viliato vienu. Kaha mukahinduka cimenemene nakuya vungendzi vuenu.'' Vakumbuluile nguavo, ''Cahi, tukukala vutsiki vuno kundzivo ya vangendzi.'' ³ Ua va sindiyile na zingolo, kaha vayile neni, nakuingila mundzivo yeni.Ua viukisile viakulia nakuoca muka uakuhona cimbaluila, kaha valile. ⁴ Vunoni ntsimbu kanda vakovela nakukosa, vamala vamuze muimbo nava mala va mu Sondeme vazingikile nzivo, vose vanike nava kuluntu vose vamala kufuma kuose kumutamba uze. ⁵ Vatambakanene kuli Lote, nakuhandeka kuli ikeye nguavo, ''Valikuli vamala vaze vanezile kuliove vutsiki? Vatuhule hambandza ano alietu, netu tuvatantekeye. ⁶ Kaha Lote ua tuhukile hambandza nakusoka kumbelo anima yeni livene. ⁷ Ua handekele ngueni, ''Njamivundila enu vamuanetu kati mulinge muamupi. ⁸ Talenu njili na vana vavampuevo vavali vaze kanda vatantekeye yala uose. Manenu, njamivundila, njikava tuhula kulienu, kaha linge navo viose via viuka mumeso enu. Vunoni kati mulinge cimokuli ava vamala, muomu vanezaa muintsiya cimbembe camusongua uange.'' ⁹ Va handekele nguavo, ''manenu kunima!'' Vahandekele naua, ''Ouneza kuno nakutumama nakupua ngendzi, kaha vuno napu mukua kusompesa! Tukalinga nove via kuhiana kupulakana nava kevo.'' Vamupulakanene cikumahali uze yala, kaha na Lote, na kukuiza muhiehi na kupatula lipito. ¹⁰ Vunoni vamala voluele hambandza mavoko avo vanehele Lote mukati kandzivo hamo navakevo nakudoka kumbelo. ¹¹ Vunoni vangendzi va Lote vavatele navupuputa vaze vantu vazevakele hambandza kumbelo ya ndzivo hamo vanike na vakulunt, linga vakahonouele omu mu vatondele ku uana kumbelo. ¹² Kaha vamala vahanekele na Lote nguavo, ''Uli namu kuavo umo kunoni? Amba vasomueno, navavove vavamala na vana vove vavampuevo, na uose yi ulineni muimbo, vafumisemo muno. ¹³ Muomu tukanongeso ngalila, muomu mutambi uavo unalinehesa kuli Yehova neza namutambi ua kutambakana mangana tume etu tuyinongese.'' ¹⁴ Lote ua tuhukile hambandza nakuhandeka navse mueno, vamala vaze vatondele kumbata vanaveni, uambele ngueni, ''Vuasi, tuukenumo omuo mungalila muomu Njambi ulinakunieka limbo.'' Vunoni hali vase mueno, va vuilengue liepe. ¹⁵ Omuo mukua cele cimene, tungelp vazangu uisile Lote, nakujamba nguavo, ''Katuka hamoye, mbata mpuevo yove na vana vove vavampuevo vavali vaze valimuno, kutina vakanonge muvupi vua limbo.'' ¹⁶ Vunoni uasimbuile. Kaha vaze vamala vamukua tele kulivoko, nakulivoko lia mpuevo yeni, nakumavoko avana veni vava mpuevo, muomu Yehova uavuile cikeketima kuliyikeye. Vavatuhuile hambandza naku vatumbika hambandza ya limbo. ¹⁷ Omu mu vavatumi huile hambandza, umo halivaze vamala ua handekele ngueni, ''Tinisenu mionoyenu! Kati mutale kunima, cipue kukala kuose ku cana. Tinina kumi ntsinda kutina mukunonga.'' ¹⁸ Lote ua handekele kuli vakevo, cahi, muane sukuluange! ¹⁹ Ngamba yove nauana kavumbi kumeso ove, kaha una muesa ngozi yakama mukuohiela muono uange, vunoni kanjikatina kumi ntsinda, muomuu vupi ange vukanjiuana, kaha njikatsa. ²⁰ Tala, lize limbo lili kuze lili muhiehi lina tamo mukutininamo, linapu lia lindende. Muane, manenu ange njitinine kuze *(kaha katina kuo kua kundende?)*, na muonouange ukayoya.'' ²¹ Uahandekele kuli yikeyi ngueni, ''Muacili, ange njinatavesa eci cihula naua, kaha kanji kanongesa limbo lize liuna tumbula. ²² Zangulako! Tininenu kuze, kaha kanji kanjikalinga cose cuma kuvanga hukahete kuze.'' Vunoni ualikile lize limbo lizina Zoale. ²³ Litangua lituntukile helu lia mavu hakeko Lote mua hetele ku Zoale. ²⁴ Kaha Yehova uanokesele hamvu haSondome na Ngomola nafunda natuhia kufuma kuilu. ²⁵ Uanongesele aze membo, na viana viose, nava ndambo vakele muze, navimbuto viasokele hamavu. ²⁶ Vunoni mpuevo ya Lote uze uakele munima yeni, uatalele hanima ua himpukile lisumba lia muongua. ²⁷ Avilahama ua hindukile cimene mene nakuya kumutamba kuze kuli Njambi. ²⁸ Uatalele hamavu ku Sondome na Ngomola nakuyaku cifuti cose cacana. Atalele muene, muisi ua kandukile kufuma hamavu ngue muisi ua lutengo. ²⁹ Omu Njambi mua nongesele membo amu cana, Njambi uasanene Avilahama kumuanukisa. Uatumine Lote afume mukati kakuenieka muze muanongesele membo muze muakele Lote. ³⁰ Kaha Lota uafumine ku Zoale nakukala muzimpili na vana veni vavampuevo vavali, muomu ua vuile vuoma kukala ku Zoale. Kaha uakele mucina, likeye na vana veni vavali. ³¹ Ou muana uantuatua uahandekele kuli ntsingo yeni, ''Tatetu na kolo, kaha kakuesi yala na kueka ukakosa netu kueseka namunjila ya vose mulicifuti. ³² Tuaya, manatu pangele tata anue viniu kaha tukakose neni, mangana tuka lanese mbuto yatata.'' ³³ Kaha vapangelele isavo viniu havu tsiki vuze. Uze muana uantuatu uayile nakukosa nayise, katantekeyele nomumua kosele, nomumua hindukile. ³⁴ Kaha tangua likuavo muaneni uantuatua ua handekele kuli nsongo yeni ngueni, ''Ivuakuno ange njinakosele natata. Mana tumu pangele tata viniu naua anue kaha ukuya na kukosa neni naua, mangana tukalanese mbuto yatata.'' ³⁵ Kaha vapangelele isavo kunua viniu vuze vitsiki naua, kaha nsongo ua yile nakukosa neni. Katanteyele ngue ua koseleni nomu mua hindukile. ³⁶ Kaha vose vana va Lote vemitile kuli iseavo. ³⁷ Uze mmuana ua ntuatua ua semene muana ua yala, uamulukile lizina Moave. Ikeye uakeke civendzi cava Moavite ³⁸ Hali uze nsongo, neni naua ua semene muana ua yala, kaha uamulukile lizina Beni Amime. Ikeye tsekulu ua va Amone lelo.