¹ Kaha muana Samuele ua kuzatela Yehova muntsi ya Eli. Yehova mezi eni kahakele na kuivuakana hamatangua aze; kaha kakuakele vimueso kusua kuma cahi. ² Hantsimbu ize, omuo Eli, meso eni aputukile kulava nakumona kakumona vuino, ua kukosa kumuhela ueni. ³ Linongo lia Njambi kanda lizima, kaha Samuele uakosele mu tembele ya Yehova, kuze kuakele cikasa ca Njambi. ⁴ Yehova ua sanene Samuele, ua handekele ngueni, ''Yange uno.'' ⁵ Samuele uaile lusi kuli Eli na kuhandekesa ngueni, ''yange uno, mua njisana.'' Eli uahandekele ngueni, ''Ange kanjakusanene cahi; amoye ukakose naua.'' Kaha Samuele uayile nakukosa. ⁶ Yehova ua musanene naua, ''Samuele.'' Kaha naua Samuele ua hindukile uayile kuli Eli nakuhandeka ngueni, ''Yange uno, mua njisana.'' Eli ua mukumbuluile ngueni, ''Ange kanjakusanene ove, muanange uayala; amoye ukukose ceka naua.'' ⁷ Vunoni Samuele hazetete kanda amutantekeya Yehova, kavakelemuzimbu kufuma kuli Yehova na kumuleka kuli yikeye. ⁸ Yehova ua sanene ceka lua mucitatu. Kaha naua Samuele ua hindukile nakuya kuli Eli nakuhandeka, ''Yange uno, mua njisana.'' Kaha Eli uatantekeyele ngueni Yehova na sana muaneni. ⁹ Muomu Eli ua handekele kuli Samuele ngueni, ''Hamoye ukakose naua; ngue nasana naua, uatela kuhandeke, ''Handekanu, Yehova, ngamba yenu alinakuivuilila.''' Sikaho Samuele uayile nakukosa muze mueni ceka naua. ¹⁰ Yehova uezile nakumana; ua mu sanene kaha zintsimbu zikuavo, ''Samuele, Samuele.'' Kaha Samuele uahandekele , ''Handeka, ngamba yove uli na kuivua.'' ¹¹ Yehova ua handekele kuli Samuele, ''Tala , Ange njatondo kulinga viuma mu Isaleli nama tuitui avo vose vakevua akatila ngengu. ¹² Halizetangua njika mutambuala Eli viuma viose vinja handekele handzivo yeni, kufuma kukuputuka nakukumisa. ¹³ Ange njamulekele nguange njikahia mulonga ndzivo yeni lumo luakukumisilako havupi vuze vua tantekeye, muomu vana vene vanehele lusingo mukati kavo kaha kava vianeseleco. ¹⁴ Muomu haviuma evi njinalisingi mundzivo ya Eli navupi vua mundzivo yeni kava kavipapangana cipue kulihan cipue ma vuana.'' ¹⁵ Samuele uakosele nomu mukua cele cimene; Kaha ua sokoluele ku zimbelo zia kundzivo ya Yehova. Vunoni Samuele ua viule vuoma hakuleka Eli heci cimueso. ¹⁶ Kaha Eli ua sanene Samuele nakuhandeka, ''Samuele, muanange.'' Samuele ua handekele, ''Yange uno.'' ¹⁷ Uahandekele, ''Mezi aka ana handeka nove? Njakusantsela unji suekele, kaha Njambi alinge vene kuli ove umuze vene mu ukunjilingila kuli ove, nakupulakanesaho, ngue ukunji sueka viuma vimo amezi ose aze hana handekele kuliove.'' ¹⁸ Samuele ua mulekele viuma viose; nacimo ca hamu suekele cahia. Eli uahandekele, ''Ou Yehova. Muecenu alinge vize vina mu viukila yikeye.'' ¹⁹ Samuele uakolele, kaha Yehova uakele neni, kaha kecelele nacimo cahi ku muzimbueni ua kuambulula ua hamavu. ²⁰ Vose va Isaleli kufuma kuli Dani kuheta kuli Belesheba vatantekeyele nguavo Samuele va muinikile kukala mukuakumbulula mezi a Yehova. ²¹ Yehova ua lisoluele ceka naua ku Shilo, naku limuesa livene kuli Samuele ku Shilo mumezi eni.