¹ Kaha Nahase ka Amone uaile na kutulila ku Yavese Ngileande. Vose va mala Yavese va handekele na Nahase, ''Linga litava siano hamo netu, kaha etu tukakupangela.'' ² Nahase ka Aamone ua va kumbuluile, ''mulusimbi olu nji kapangese nenu, muze nji tsiha ose meo enu a cilio, kaha munjilei nji kaneha kasanhuntu ha yose Isaleli.'' ³ Kaha va kuluntu va Yavese va kuaniene kuli ikeye, ''Tuseze lika lietu ku mata ngua atanu na avali, linga muze tu tume tunganda ku vusuana vuose vua Isaleli. Kaha ngue kakuesi umo aka tupangela, etu tuka muhana kuliove.'' ⁴ Kaha tunganda va fumine ku Ngivea, kuze kuakukala Saulu, na kuleka vantu vika via lingi uile. Vose vantu va lilile namezi akama. ⁵ Vunoni Saulu ua kavangeyele vangombe kufumahia. Saulu ua handekele ngueni, ''Vika vina pihia na vantu vaze kulila?'' Valekele Saulu vika vana handeke va mala va Yavese. ⁶ Omuo muavuile Saulu viva handeka, muzimu ua Njambi uezile hali ikeye, kaha ua tenukile cikuma. ⁷ Ikeye ua mbatele njoko ya vangombe, uatete mu vimpindi, muku vatuma vakevo muose mua hita vu suana vua Isaleli na tunganda. Ikeye ua handekele ngueni, ''Uose kali katuhuka mu nima ya Saulu na munima ya Samuele, eci cikeko cikalingiua kuva ngombe veni.'' Kaha vukalakasi vua Yehova vu kauila ha vantu, kaha va kufumaho hamolika ngue muntu umo. ⁸ Omuo ikeye uava tendele vakevo kuli Mbezete, kaha vantu va Isaleli vakele vihita vitatu via makulukazi, na va mala va Yundau makumi atatu a makulukazi. ⁹ Vahandekele na tu nganda vaze vezile, ''Enu mukaleka va mala va Yavese Ngileande, mene, ntsimbu ya litangu lia yukuma, enu mukamona vuovole.''' Vunoni tunganda vaile na kuleka va mala va Yavese, kaha vakevo va viukililile. ¹⁰ Kaha va mala va Yavese va handekele na Nahase, ''mene, etu kamiecela kulienu, kaha enu mukalinga kulietu viose vika soloka via cili kulienu.'' ¹¹ Kaha halakaca Saulu aka haka vantu mu vivunga. Vezile mukati ka cilombo tsimbu ya cimene va muene, kaha va kuatele na kuveta va Amone kuheta na kutuema ca litangua. Vaze vovokele vava sanduokele, vunoni muze kakuakele vavali muli vakevo va saleleho hamolika. ¹² Kaha vantu vahandekele kuli Samuele nguavo, ''Iya uakele iya ua handekele, 'Saulu yakeye akatu suana halietu?' Neha va mala, vunoni etu tu kavahaka vakevo mukutsa.'' ¹³ Vunoni Saulu ngueni, ''Cahi naumo uahi ivatela kuhaka mukutsa kuli tangua eli, muomu lelo Yehova na hiela va Isaleli.'' ¹⁴ Kaha Samuele ua handekele ku vantu, ''Tuayenu, ecenu etu tuye ku Ngileande na kuviukisa vuavuha vuangana kuze.'' ¹⁵ Vunoni vose vantu vaile ku Ngileande na kupanga Saulu muangana kumeso a Yehova mu Ngileande. Kuze va kalihana nkombelo ya ciyulo ku meso a Yehova, na Saulu na vose vamala va Isaleli kazoliela cikuma.