¹ Ua thanene vaye likumi navavali ua vahanene ndhili nampoko ya kutunditha vimpundhi vyoshe vya kuvihya na kukanguitha mavedhi. ² Keho ua vatumine va kambulule vumuene vua Kalunga na kukanguitha vaka kuvavala. ³ Endi ua valekele nguendi, ''Ku muambata nachimo chahi muvungendhi vueni_nambe mpango, nambe nkombe, nambe vya kulya, nambe vimbongo, nambe vivandakanaho vyahi. ⁴ Nkala njivo yoshe yomu ka kovela, kaleni omo vene noho hamu ka tundila mo. ⁵ Nkala kuye kuoshe kuva ka yeneka ku mitambula, homu ka tuhukamo muimbo liye, komuka kukumuna likungu kumyanja yeni vupue vumbangi vueni kulyavo. ⁶ Keho vatuhukile vahitile mumembo, na kuambulula mudhimbu ua chili na kuva kanguitha. ⁷ Muye Helonde uo vuile vyoshe vyahitile ko, keho uatakanyene. Mukonda vamo va mutumbuile nguavo, ''Jouano''. Nashituka kukutca, ⁸ Keho vamo nguavo, Eliya nayomboloka, vamo lalo nguavo umo ua vapolofete valaya nashituka. ⁹ Helonde ua kuanyene nguendi, '' Ange njamu vatuile mutue Jouano. Yiya lalo yo njuvuoko?" mukemo ua yonguele kumumona. ¹⁰ Omuo vapostolo vahilukile vambuluile Yesu viye vyo vapangele. Keho ua yile navo kua likalyavo, hembo limo lya Mbetesenda. ¹¹ Omo mbunga mo yovuile evi, keho ya mushuamene. Ua yitambuile ua kuanyene nayo vya vu muene vua Kalunga na ku kanguitha vaka kuvavala. ¹² Omuo tee litangua liya kukutoka vaye likumi na vavali vedhile kulyendi, va mulekele nguavo, "Tuma mbunga yiye mu membo vakathetele malalo na vya kulya, mukonda kuno kotuli mumpambo. ¹³ Keho endi ua valekele nguendi, '' Yeni muvahana vyakulya valye, vandonge valimbuluile nguavo, '' Tuli lika navimbolo vitanu navintci vivali. Mpano tuye tukalande vyakulya vya vantu voshe. ¹⁴ { Mukonda kuakele vantu vavengi makulukadhi atanu avamala,} mukemo ua lekele vandonge nguendi, vatumame hantci mu nkala mbunga vapue makumi atanu.' ¹⁵ mukemo mo vavipangele, vatumbikile vantu vatumame. ¹⁶ Ua tambuile vimbolo vitanu navintci vivali, ua talele muilu ua lombele Keho uayi vanyuine muvi valavala ua yihanene vandonge linga vahane mbunga. ¹⁷ Voshe valile vekutile na viye, vya thaleleho vavi tambuile va shulithile vihele likumi navivali vya vithanyu thanyu. ¹⁸ Vya kele omuo Yesu ua lombele ha lyendi vavenya, na vandonge vakele hamo nendi. keho ua vehuile vakevo, uakuanyene nguendi, ''Mbunga eyi veku njitumbula nguavo,yange yiya? ¹⁹ Keho valimbuluile nguavo, '' Vamo nguavo Youano muka ku mbuitika. vuno vakuavo nguavo Eliya, na vamo nguavo umo ua vapolofeto va laya yikeye nashituka.'' ²⁰ Keho ua vehuile nguendi, eni cho vati mumue ku njitumbula ngueni yange yiya?'' Petulu ua limbuluile nguendi, ''Yove uu Kilistu muna Kalunga.'' ²¹ Vuno uava kikiyile nguendi titityo keti mu ka vileke naumo uahi. ²² Ua kuanyene nguendi Muna Muntu akayanda ku vyuma vya vingi naku muvyana kuli vakuluntu vakama nava kuluntu vava sasendote na vaka kuthona, endi vaka mutchiha halitangua lyamutatu aka shituka.'' ²³ Keho uakuanyene navo nguendi, ''nga nkala umo ayongola kunjishuama munima yange, na pande kuli vyana yendi vavenya keho akakule chilindakano chendi naku njishuama. ²⁴ Nkala uoshe uye ayongola kuohyela muono uendi aka udhimbaletha, vono nkala uoshe adhimbaletha muono uendi mukonda lyange aka uohyela. ²⁵ Vika vya chili ku muntu vya kufuka chifuti choshe, vuno adhimbaletha muono uendi ndi ali nehela luvinda endi vavenya? ²⁶ Nkala uoshe aka njuvuila nchuama omo majui ange, na muna muntu nendi aka muvuila nchuama omuo muakenja muvu muene vuendi vavenya na vumuene vua Yishe novu vua Mpundhi ya kuyela na tungelo tuendi. ²⁷ Vuno vu chili njimileka nguange, ava vamo vanemana kuno kovaka mono kutca kuvanga noho vakamone vumuene vua kalunga''. ²⁸ Kunima muahitile matangua atanu na atatu Yesu uakuanyene majui aa ua tambuileho va Petulu na Youano na Tyango vayile vakandukile kumukinya mukulomba. ²⁹ Keho omo ua lombele chihanga chendi cha hikunukile navi dhala vyendi vyatokele too naku vyakula. ³⁰ Taleni, vamala vavali vakuanyene nendi, Mosesa na Eliya. ³¹ Vajombolokele mu vumuene, vakuanyene nendi vyakuya kuendi, viye vya yonguele tee kuneha nakupuithamo mu Yelusalema. ³² Omuo Petulu navaye vakele navo vakele mutulo tuakama, vuno muye mova kathumukile vamuene vu muene vuendi navaye vamala vavali ve manene hamo nendi. ³³ Omo vaye vamala vahilukile vatunde kuli Yesu, Petulu ua kuanyene nendi nguendi, ''Mulongisi, cha chili tukale kuno. Linga tutunge vintcingi vitatu, yimo yove, yimo ya Mosesa, na yikuavo ya Eliya.'' ( Endi ka dhivukile viye vya kuanyene.) ³⁴ Muye mua kuanyene evi, lishelua lye dhile lya vafuikile, nava kevo vakele na lyova omuo va kovelele mulishelua. ³⁵ Na lijui lya tundile mulishelua ngualyo, Ou yikeye Munange uye umo yu njahangula; mutolilileni.'' ³⁶ Muye lijui mo lyakuanyene, Yesu lya mu uanene lika lyendi. Vaholokele kulu kovalekeleko na umo uahi ku matangua aye vyuma vyoshe viye vyova ka muene. ³⁷ Keho litangua lya ku shuamako, va shelelele vatunde ku mukinya, mbunga ya kama yamu uanene. ³⁸ Taleni mu mbunga mua tundile lyala umo ua tambakanene nalijui lyakama nguendi, ''mulongisi, njina kukandelela tala munange ua lyala, mukonda yikeye munange umo lika. ³⁹ Una mono, mpundhi yaku vihya yeku mu pangetha hali yikeye ha ntcimbu yiye vene ua ku litetela; yeku mu nehela ku shinya na lifulu ku kanua. koye ku mutunda vuathi yeku mu vavaletha mua kuvihya. ⁴⁰ Ange njina kandelela vandonge vove vayi shekemo, vuno kova yathele." ⁴¹ Yesu ua limbuluile ko nguendi, "Eni vaka kuyeneka kutava na mushovo uakushevuka, vi ntcimbu vyakupua kuiko njikala neni na kuyanda neni? neha kuno munove." ⁴² Mukuinja kua munike, keho mpundhi yakuvihya yamu uithilile hantci na kushinya. Vuno Yesu ua vindikile mpundhi yaku vihya na munike ua kangukile, keho uamu hiluithile uamu hanene kuli yishe. ⁴³ Keho voshe va komokele vukama vua Kalunga.Te voshe vanatci chintcima kuli viye vyoshe vya pangele, keho ua kuanyene nava ndonge vendi nguendi, ⁴⁴ "Hakeni majui a kovele mukati-kati kamatui eni. Muna Muntu vaka muhana ku mavoko avantu." ⁴⁵ Vuno ko vovuithithile vuino viye vya kuanyene. Vikevyo vya kele ndhimba kuli vakevo, keho kova dhivukile viye vya kuanyene, na vakevo vakele nalyova lyaku muihula viye vya kuanyene. ⁴⁶ Keho vimpata vya shangumukile mukati kavo nguavo yiya akakala uakama ho mukati ketu. ⁴⁷ Vuno Yesu , ua dhivukile vithinga nyeka viye vyakele mu dhimbunge dhavo, ua tambuile munike ua mundende ua muimikile muhyehi nendi, ⁴⁸ Keho ua kuanyene nguendi, uoshe atambula munike ua mundende mulidhina lyange , nange muna njitambula; na uoshe uye anji tambula, na tambula uye ua njitumine.uye uoshe napu ua mundende mukati keni yikeye akapua ua kama." ⁴⁹ Youano ua limbuluileko nguendi, '' Muene, tuna mono muntu umo athininka kutunditha vimpundhi vya kuvihya mulidhina lyove mukemo motuna muvindika. mukonda endi keti umo ue kulishuama netu." ⁵⁰ "Keti mumu vindike,'' Yesu nguendi,'' mukonda uye uoshe keti muka chidhindo cheni ouo ueni." ⁵¹ Muye matangua endi akulonda muilu akele ha muhyehi, ua talekethele chihanga chendi mukuya ku Yelusalema. ⁵² Ua tumine tunganda kulutue luendi, vayile vaka kovelele muimbo lya Samaliya muku vuahetha vyuma vyendi vyoshe. ⁵³ Vuno vantu ko vamutambuile mukonda va muene na taleketha chihanga chendi aya ku Yelusalema. ⁵⁴ Keho vandonge Tiango na Jouano muva muene evi, vakuanyene nguavo, ''Muene, uyongola yetu tutume tuhya tuije hano hantci tutunde muilu tuaku vashandole ndi?'' ⁵⁵ Vuno ua tengulukile keho uava kandelele, ⁵⁶ na vakevo vayile kuimbo lyikuavo. ⁵⁷ Mu vayile nakuenda mungila yavo, umo ua kuanyene nendi nguendi, ''ange njika ku shuama kuoshe kuuya.'' ⁵⁸ Yesu ua kuanyene nendi nguendi, ''dhimbanje vali navina, natudhila tua muilu vali na mashua. Vuno Muna Muntu kethi naha ha thakatela mutue uendi.'' ⁵⁹ Keho mukuavo ua handekele namukuavo nguendi, ''Nji shuame,'' vuno ua handekele nguendi, ''Muene, ha kulivanga nji tave njiye nji kashitike tata." ⁶⁰ vuno ua mulekele nguendi, ''Etheleni vaka kutca valishitike avo vavenya. .vuno kuli yove, ya hale ukambulule na kuilanetha vumuene vua Kalunga". ⁶¹ Keho mukuavo lalo ua kuanyeneko nguendi, ''Ange njiyongola ku kushuama ,Muene, vuno ha kulivanga njitave njiye njikeshike vaka limbo lyange. ⁶² Yesu ua mulimbuluile nguendi, ''Naumo uahi nakuata livoko lyendi ku chipululo, atale kunima, afuile mu vu muene vua Kalunga".