¹ Vya yombolkele hantcimbu yiye vene kunina yevi Yesu ua shangumukile kuenda ngana muaya membo akama na kumembo aa ndende, kuambulula na kulongetha mudhimbu ua vumuene vua Kalunga. Ava likumi na vavali vakele hamo nendi, ² Hamo lika navakentu vaye vakanguithile vaka vimpundhi vyakuvihya na Maliya uye uva lukile Mandalena, uye muli yikeye mua tuhukile vimpundhi vitanu vyakuvihya; ³ Yohana, mukentu ua Kusa, uye uakele ua kumesho aHelonde, na Susanna, nava kuavo vavengi, vaye, va pangethele vufuko vuavo, muku kuatha vaye vavi yongola. ⁴ Te mbunga yayingi ya vantu yina likungulula, na vantu vedhile kulyendi kutunda limbo ku limbo, uava telelele chithimo nguendi: ⁵ Ndimi ua tuhukile uayile muku kuna mbuto yendi. mua kunine, mbuto yimo ya uililile kunchongo yangila keho vayi lyata ngelele na manja, na tudhila vamuilu vayi lile. ⁶ mbuto yikuavo ya uililile ha mavue; vuathi-vuathi haye vene yashokele, vuno ya yuyuile mukonda koya kele na ndhili yakama. ⁷ Keho mbuto yikuavo ya uililile mukati kamanja, manja na mbuto vyoshe vyakulile kumo lika na manja ayituvile keho yatcile. ⁸ Keho yikuavo ya uililile kulivu lya ntuima keho yemine vushuka vuye vua kuilana kutuvakana chihita chimo muntcimbu yiye vene." Kunima Yesu mua kuanyene vyuma evi, ua tambakanene nguendi, Uye uoshe ali namatui akuvua, ovueko." ⁹ Vandonge vendi va muihuile nguavo vika chi lomboloka chithimo chino. ¹⁰ Uakuanyene nguendi," Vana mihana kudhivuka mahungu avu muene vua Kalunga, vuno kuli vamo nji kuanya mu vikuidhi, kulingila, mukumona keti vamone, na kuvua keti vovue'. ¹¹ Echi chakecho chilomboloko cha chithimo echi: Mbuto yikeyo lijui lya Kalunga. ¹² Yiye ya kele kunchongo yangila va kevo vaye vovua lijui, Vuno Chitodhi eja aku tambula lijui muvi mbunge vyavo linga keti va tcelele naku takametha. ¹³ Yiye yaha mavue vakevo, mu vovua lijui,vali tambula naku yolela. Vuno ava kovethi namidhi; avo veku tcelela muntcimbu yayi ndende lika, nga vitanga vija va teua. ¹⁴ Mbuto yiye ya uililile mukati kamanja vakevo ava vanovu lijui, vuno movaya muvingila vyavo, dhimbunge dhavo dhili navishoti navyuma vya hantci, tuyando na vufuko naku vuahelela kua muono ou, na vushuka vuavo kovue kuhya. ¹⁵ Keho mbuto yiye yamu livu lya ntuima, vakevo ava, vovua lijui na dhimbunge dha chili na kakondhi. ¹⁶ Nauno uahi ashuameka lambi ayi fuike mundeho ya vuma ndi ayihaka muintci lya muhela. vuno, ayi haka helu lyamesa kulingala vaye vakovelamo vamone chite. ¹⁷ Chahi chaku shueka chova kayeneka kuyombolola, nambe nkala chuma chiye chaku shueketha chika yeneka kuija ku chite. ¹⁸ Ngocho tolilileni vuino, kuli umo uye ali navyuma vyavingi, vaka muvanda ka nenako vikuavo lalo. vuno kulya uye umo kethi navyo, nambe nevi vyeku thinganyeka nguendi uakala navyo vaka mu nyekavyo." ¹⁹ Keho vayina nava kuenje vendi vavamala vedhile kulyendi, vuno kovathele kushuena muhyehi nendi mukonda lya mbunga. ²⁰ Vamu lekele nguavo, " Vanoko nava kuenje vove vavamala vanemana hanja. vathetela ku kumona." ²¹ Vuno Yesu ua taveleko uava lekele nguendi, "Vanana nava kuenje vange vavamala vakevo ava vatolilila lijui lya Kalunga, naku lipanga." ²² Kua kele litangua limo ua kovelele muvuato kumo na vandonge vendi, keho ua va lekele nguendi, ''Tuyeni tu javuke tuye musinya lya lisali.'' keho va sunuine vuato. ²³ Vuno mu kujavuka kuavo ua uililile mutulo. Keho mpundhi yakama yedhile mulishali, keho vuato vuavo vua shangumukile kushula na mema, keho vakele navishoti. ²⁴ Keho Yesu' vandonge vedhile kuli yikeye vamuhi nduile, vakuanyene nguavo, ''Shukulu! shukulu! Lelo tu tca!'' Keho ua hindukile, ua holuethele mpundhi na mankimba, a litulile, a holokele kulu. ²⁵ Keho ua kuanyene navo nguendi, ''Kutcelela cheni kuiko chili?'' Vuno honi vovuile lyova va komokele, keho va lihuile umo na mukuavo nguavo muntu muka ou, a hatha kuleka nambe mpundhi na mema, keho vi muononoka yendi?'' ²⁶ Keho vahetele kuchi futi cha va Ngelethene, cha kala musinya lya Ngalileya. ²⁷ Keho Yesu mua kandukile kuntunda, ua li uanene na lyala umo muka limbo liye ua kele na vimpundhi vya kuvihya. Ntcimbu yakama ka dhalele vidhala, ka tumamene muimbo vuno kuvihilo lika ua kele. ²⁸ Muye mua muene Yesu, ua lilile na kuuila kulutue luendi keho ua tambakanene na lijui lya kama nguendi, ''Vika uyongola kupanga nange, ove Yesu, muna Kalunga ua kama? Njina ku kandelela shukulukambu, Keti u nji yandethe. ²⁹ Yesu ua tuminine vimpundhi vyakuvihya keho vya tuhukile muli yauye lyala. Vintcimbu vya vingi vyamu kuatele, keho nambe muva mu kutile na maketanga na mikole muku munyunga, kanda ua vatuile maketanga na mpundhi ya kuvihya ya mu tualele mumuthenge. ³⁰ Keho Yesu ua muihuile nguendi, ''Yove yiya lidhina lyove? Keho ua mu tavele nguendi, ''Mbunga,'' Nga vimpundhi vyavingi vya kuvihya vya mukele. ³¹ Keho vya mu kandelelele linga keti avi tume kuchina cha ngehena. ³² Keho kuye kua kele vutanga vua kama vua vingulu kumukinya. Vimpundhi vya kuvihya vya mu kandelele linga a vi tavethele vikovele mu viye vingulu, Keho mukemo mua vi tavethelele. ³³ Keho vimpundhi vya kuviha vyatuhukile mulyala uye na kukovela mu vingulu, keho vutanga vua vingulu vua shelelele ku chimbolongoma vua shatukile naku ka uila muchishali. ³⁴ Keho vaye va lithile vingulu muva muene viye vya kele haye, va teuele va kambuluile kuimbo na ku mitambela ya chifuti. ³⁵ Keho vantu va yile vaka muene vya kele kuye, vaka hetele kuli Yesu keho vaka uanene lyala uye uvya tundile vimpundhi vya kuvihya. Yikeye na tumama kumyanja ya Yesu, vana mu dhaleka na mana endi ana hilukila mo; keho vovuile lyova. ³⁶ Keho vaye vakele ho va vimuene vakevo va valekele nguavo vati va kanguithile uye lyala ua kele na vimpundhi vyakuvihya. ³⁷ Keho vantu voshe vaka chifuti changelesene va lekele Yesu linga a va shondoloke atunde kuli vakevo, mukonda vovuile lyova lyakama. Keho yikeye ua kovelele muvuato, linga va hiluke mo. ³⁸ Vuno lyala uye yova tundithile vimpundhi vya kuvihya ua mu lombele linga aye mumo lika nendi, Vuno Yesu ua mu tumine, ua kuanyene nguendi, ³⁹ ''Hiluka kuimbo lyove , linga uka mbulule vyoshe viye vyana kupangela Kalunga.'' Keho lyala ua hilukile mungila yendi, na kuambulula kulimbo lyoshe lyakama vyoshe viye vyana mu pangela Yesu kuli yikeye. ⁴⁰ Keho muye Yesu ua hilukile, mbunga ya mu tambuile yikeye muachili , mukonda voshe vakele na kumu tumamena. ⁴¹ Taleni, kuedhile lyala umo ua kuluka Njailu, yikeye ua puile mukuluntu ua thinangonga, ua tcikamene ku myanja ya Yesu ua mu kandelelele linga aye kunjivo yendi. ⁴² mukonda uakele na munendi umo lika, ua mukentu ua myaka likumi nayivali, te a thetela kutca. Yesu mungila yendi yakuya, mbunga ya vantu yali tcekenene halyendi. ⁴³ Keho hakele mukentu ua kele navuvedhi vua maninga myaka likumi nayivali navimbongo vyendi vyoshe vyahuile, vuno ka uanene naumo uahi ua kumuthaka. ⁴⁴ Uedhile kunima ya Yesu, ua kuatele kunchongo ya chidhala chendi, keho hantcimbu oyo vene maninga a likelele kuhita. ⁴⁵ Yesu ua kuanyene nguendi, ''Yiya uye nanjikuata?'' Omo voshe va vyanene, Petulu ua kuanyene nguendi, ''Shukulu, mbunga yavantu yinaku dhengeleka na kuli tcekenena kuli yove.'' ⁴⁶ Vuno Yesu ua kuanyene nguendi, ''Hali umo na nji kuatele, mukonda njinovu ndhili yina nji tundu.'' ⁴⁷ Muye mukentu mua muene nguendi katha kuvanda, uedhile na kungangama Keho ua tcikamene kumesho endi. Uambuluile kumesho a vantu voshe muye mua mu kuatele namuye mua kangukilile hantcimbu yiye vene. ⁴⁸ Keho yikeye ua mu lekele nguendi, ''Munange, lutcelelo luove luna kukanguitha. Ya na chivovo. ⁴⁹ Ntcimbu te kanda achi kuanye umo ua kunjivo ya mukuluntu ua thinangonga uedhile, ua kuanyene nendi nguendi, ''Munove natci. Keti lalo unehele mulongisi vishoti.'' ⁵⁰ Vuno honi omo Yesu ua vyuvuile, ua limbuilile Njailu ua limbuluile nguendi, ''Keti uvue lyova; tcelela lika, na endi akakanguka.'' ⁵¹ Muye mua hetele kunjivo, katavethele umo akovele mo nendi, kuvanga Petulu naYoano, naTyango, nayishe ya muna mukentu, na vayina. ⁵² Keho voshe vakele nakulila nakulinyenga, Vuno yikeye ua kuanyene nguendi, ''Keti mulile; mukonda endi katcile vuno nakotha tulo.'' ⁵³ Vuno vakevo va mu yolele, mukonda va dhivukile nguavo natci. ⁵⁴ Vuno ua mu kuatele ku livoko ua mu thanene, ua kuanyene nguendi,'' Muna mukentu, hinduka!'' ⁵⁵ Na mpundhi ya muono yamu hilukilile, keho ha ntcimbu yiye vene ua hindukile. Keho ua valekele va mu hane ko vimo vya kulya a lye. ⁵⁶ Vithemi vendi va komokele muakama, vuno yikeye ua valekele nguendi keti muvileke na umo uahi evi vyo tuna lingi hano.