¹ Vuno chayombolokele ngechiye hali tangua lya Thapalalo Yesu uahitile mulihya lya tiliku, na vandonge vendi vahelele mitue ya mbuto ya tiliku, va tcenene mumavoko avo, keho valile. ² Vuno vamo vaFaliseu vahandekele nguavo, "muomu vika mupangela vyuma viye kuvatavethela kupanga mulitangua lya Thapalalo?" ³ Muku va kumbulula, Jesu nguendi, "komuatandele vika vyapangele Ndaviti muakele na njala, na vaYe vamala vakele navo? ⁴ Ua kovelele munjivo ya Kalunga na kutambula mbolo ya kelemo ua tavulako ualya, yimo ua haneneko kuli vaye vamala vakele navo valye, nambe ngoco muakele lika yakutavethela vaSasendote valye. ⁵ Keho ua handekele navo nguendi, "Muna Muntu yikeye Muene ua Thapalalo." ⁶ Mu chayombolokele halitangua lya thapalalo ua yile musinangonga ua longethele vantu muye. Muakele lyala umo livoko lyendi lya chilyo lya thekua. ⁷ Vaka kuli longetha na vaFaliseo vakele muhyehi vamutalele linga vamone nga akanguitha umo hali tanguua lya thapalalo linga vauaneneho kashuilo kaku muvangeya. ⁸ Vuno ua muene vithinganyeka vyavo ua handekele ku lyala uye ua kele na vulema vua livoko lya chilio lya kuthekua, "katuka uimane kuno mukati kavo. Ngocho lyala ua katukile uemanene kuye. ⁹ Yesu ua kuanyene navo nguendi, "njimihula, chitava halitangua lya Thapalalo kupanga vuchili ndi kupanga vya kuvihya kuohyela muono ndi kuvihitha ndi?" ¹⁰ Keho ua talele mukati kavo voshe na kutala kulyala ou, "Olola livoko lyove." Endi ua pangele mo, na livoko lyendi valikanguithile. ¹¹ Vuno vashulile na vukalu naku lihandekethele umo namukuavo nguavo vika vatha kupanga kuli Yesu. ¹² Vya yombolokele mumatangua aye uayile kumukinya mukulombela. Ua tualeleleho vutciki vuoshe kulomba kuli Kalunga. ¹³ Mulya kile litangua, ua thanene vandonge vendi venje kuli yendi, uava hanguile likumi na vavali , vaye va lukile vaPostolu. ¹⁴ Madhina avo va Postolu akele Simoni( ua kuluka Petulu) na mukuenje uendi Anduleuo, Tyango Youano, Filipu, Batulumeu. ¹⁵ Mateo, Tomasa, Tyango muna Alufeu, Simoni yova thanene Zilote. ¹⁶ Jundasa muna Tyango, na Yundasa Sakalyoto uye ua kele chingungu. ¹⁷ Keho Yesu ua shulukile kumukinya navo na kuimana kumuhela ua kulyatama na mbunga yakama yava ndonge na vuing vuakama vua vantu vaku Yundeya na Yelusalema na kunchongo ya mema a Kalunga na kutile na kuSindone. ¹⁸ Vedhile mukumutolilila na kuva kanguitha mavedhi avo. Vantu vaye voya pakethele mpudhi ya kuvihya lalo. ¹⁹ Nkala umo uamumbunga ue thekele kumuhuma muomu ndhili ya kukanguitha ya tundile muli yakeye mukemo ua vakanguithile voshe. ²⁰ Keho uatalele kuva ndonge vendi na kukuanya nguendi, "Muavedhuka eni muahutua, muomu vumuene vua Kalunga vueni. ²¹ Muavedhuka eni muli na njala mualolo, keho vaka mikutitha. Vavedhuka vova kokota mishodhi muololo, kuli yeni mukayola yola. ²² Muavedhuka eni omo vantu vamidhinda, na muye vakami tundithako na kumituka na kumi vyana nalidhina lyendi lyaku vihya, mukonda lya lidhina lya Muna Muntu. ²³ ku litangua olyo muka muyolela na kulithamba kua kama, mukonda muli na vuchili muka uana fueto ya kama muilu, na vankaka veni vapolofeto mu vava pangethele mungila oyo vene. ²⁴ Vuno ngongo yove muka kufuka, keho eni mua uana laya ku dhembeleka. ²⁵ Kuliyeni munekuta mualolo, keho eni muka kala na njala kunima. Ngongo yeni muyola yola mualolo, muka linyenga na kulila kunima. ²⁶ Ngongo yeni omo vantu vaka mishangala vuino, mukemo lalo muvalingile vashukulu yeni vapolofeto va vishaki. ²⁷ Vuno ange njikuanya kuli lyeni muli na kundjitolilila yongoleni vaka vidhindo vyeni na kupanga vuchili kuli vaye vamidhinda. ²⁸ vuavuetheni vaye vami thinga na ku lombelela vaye vami yandetha muakuvihya. ²⁹ Uye aku kapula kuchimbangi, mutenguiluile lalo mbange yikuavo. Nga umo akutambula mbayikisa yove, keti umuvindike chikovelo chove lalo. ³⁰ Hana ku nkala umo a kulomba. Nga umo atambula vimo vyove, keti uka muihule linga aka kuhiluithilevyo. ³¹ Ngue mouna yongola vantu va kupangelevyo, linga mo lalo nove kuli vakevo. ³² Nga uyongola vantu vaye vakuyongola, chishangala muka chili kuli yove? Navaka milonga va yongola vaye vavayongola vakevo. ³³ Nga ulinga vya chili kuli vaye vakulinga yove muachili, chishangala muka kuli yove? Nga vaka mulonga valinga mo. ³⁴ Nga uhana vuima viye vyuna tcelela kukufueta vyo, chishangala muka kuli yove? Navaka mulonga vekuhana kuva kamulonga, vahiluitha muvyapua vene. ³⁵ Vuno yongoleni vaka chidhindo cheni naku vapangela vya chili. Hana, vuno keti uthinganyeke kukuhiluthila lalo, na fueto yove yikapua ya kama, ukapua muna ua vukama kama, mukonda yakeye adhivuka vaye kuve kumulomba na vantu vaka mulonga. ³⁶ Kala nangodhi, ngue yisho uakala na ngodhi. ³⁷ Keti upangule, kuteua nove ku vaka kupangula. keti upayethe nove ku vaka kupayetha. Etheleni vakueni, nove vaka kuethela. ³⁸ Hana, na kuli yove vaka kuhana, chetheko cha kuthindangeya, cha kunyukangeya cha kushumpoka neni vaka mihana. na kuetheka chimuetheka nacho va kueni, neni vaka myetheka lalo. ³⁹ Keho yikeye lalo ua vatelelele chithimo.' kapuputua kuatha atuamenene kapuputua mukuavo ndi? Nga avi panga, voshe vavali vaka uila muchina, ndi keti ngocho? ⁴⁰ Ndonge kapu hamo na mulongishi uendi, Vuno uoshe nga nalilongetha vuino akapua ngue mulongishi uendi. ⁴¹ Vika umuena chishuashua cha chindende chili halisho lya munanoko ua lyala, Vuno ko ua muene mukambo uli mulisho lyove vavenya ndi? ⁴² vati uatha kukuanya na munanoko ua lyala, Munanana ua lyala, linga njikutundithe ka chishuashua kali mulisho lyove, nga ove vavenya ko uathele kumona mukambo uli mulisho lyove vavenya? Ove chingungu! hambangelo Tunditha mukambo uli mulisho lyove vavenya, umba uatha kumona kachishuashua kali mulisho lya munanoko ua lyala. ⁴³ Nga chahi chiti chachili chiye cheku hana vushuka vua kuvola, kuahi kukuakele chiti chaku vola chime vushuka vua chili . ⁴⁴ Nga nkala chiti vachidhivuka kuvushuka vuacho vuo chekuima. Nga vantu kovatha kove kushukula vushuka ku chiti chalyanja, ndi kuchiti cha vushuka kutunde manjembele ku chihumbu cha lyanja. ⁴⁵ Lyala ua chili uye ue kutuhuitha vya chili vya vufuko vuendi vuakala kumbunge yendi, na lyala ua kuvihya ue kutuhuitha vya kuvihya vya vufuko vuendi vua ku viha. vua kala mumbunge yendi kanua kendi kekuvikuanya. ⁴⁶ Muomu vika mueku njithanena ange, 'Muene, Muene,' eni komue kuononoka vyuma vinje kumileka yange? ⁴⁷ Uoshe muntu eja kuli yange na kuvua majui ange kumana aa linga, njimileka nalifu ngue. ⁴⁸ Nalifu na lyala muka kutunga njivo, ua hindile luvula lua kulova mulivu kumana na kutunga luvula lua njivo halivue lua kukola, moluedhile luhanjo, muta ua mema ua hitile kunjivo, vuno njivo koya linenengele, mukonda vayi tungile vuino. ⁴⁹ vuno muntu uye ovua majui ange, keho ka ononoka nalifu na lyala uye ua tungile njivo yendi halivu yaku yeneka luvula.Keho luhanjo luedhile lua pupile kunjivo yiye, vuathi - vuathi njivo ya thiu kile.