¹ Keho movyakele mbunga yavantu ya dhengelekele Yesu na kutolila lijui lya Kalunga, Yikeye uemanene ku lishali lya Ngelesalete. ² Ua muene mato avali va akokela ku chikuma cha lishali. Vaka ku kuata dhintci va tundilemo na ku kusha manda avo. ³ Yesu ua kovelele muvuato vumo, vuye vua Simoni, keho ua mu lekele linga a vu thindikile mu lishali vulishondoloke kamandende na ntunda. Mukemo mua tumamene na kulongetha vantu. ⁴ Mua manene kukuanya, ualekele Simoni nguendi, "Tambula vuato u vushuenethe kuye kualova mute manda eni linga mulavule." ⁵ Simoni ua tavele ko nguendi, "Muene, etu tuna te vutciki vuoshe kutua lavuile, vuno kulijui lyove ange njika ta manda." ⁶ Muva vi pangele evi, va lavuile vinthi vya vingi, na manda avo a tavokele. ⁷ Ngoco va thanene vakuavo va kele muvuato vuavuo veje vaku va kuathe ko. Vakuavo vedhile vashulithile mato avo, ashangumukile kuvombela. ⁸ Omo Simoni Petulu, uavimuene, ua uililile ku mavuli a Yesu, nguendi, tunda kuli yange, mukonda ange njimuntu ua kuvihya, Muene. ⁹ Endi uakomokele hamo na vakuavo voshe vaje va kele navo, mukonda lya vintci vije viva kuatele. ¹⁰ Hakati kavo ha kele Tiango na Yoano, vana va Sembendeu, vavuthamba va Simoni. Yesu ua lekele Simoni nguendi, ''Keti uvue lyova, Mukonda ove kutunda hano ukapua muka kukuata vantu.'' ¹¹ Omo vanehele mato avo kuntunda, vathile vyuma vyavo vyoshe vamu shuamene. ¹² Vya kele ngechi, te achili mumbongi yimo, mua kele lyala mukavikeka. Mua muene Yesu, uauile ku chihanga chendi na kumu kandelela, nguendi, "Muene, shukulukambu, njikanguithe. ¹³ Yesu mukemo muoluele livoko lyendi ua mu kambeka, nguendi, ''Njiyongola vene. Ngechi vene kanguka.'' Haye vene vikeka vya mu tundile. ¹⁴ Endi ua mukikiyiye keti avi handeke nambe ku umo uahi keho nguendi, ''Ya na vungendhi vuove, linga uka lilekethe kuli Sasendote naku ka hana chikombelo mu kukanguka kuove, ngue muye mueshikile Mosesa, muku va leketha vumbangi vua kukanguka kuove. ¹⁵ Vuno mudhimbu uendi ualishandelele na kumihela ya hale, na vimbunga vya kama vya vantu vedhile hamo muku mutolilila mualongetha na kukanguitha mavedthi avo. ¹⁶ Vuno endi ntcimbu yoshe na kuya mumuthenge na ku ka lomba. ¹⁷ Keho vya fuile ngechi, litangua limo mua longethele, kuakele va Faliseu na valongishi vamashiko va tumamene kuye, vaye va tundile kumembo aku Ngalileya na ku Yundeya na ku Yelusalema. Na ndhili ya Muene ya kele hamo nendi muku kanguitha. ¹⁸ Ngechi kuedhile vamala vamo vambatele lyala muka kayekele hachiyalo, vathetelele ngila ya kumu koveletha muintci vaku mulangeke kulutue lua Yesu. ¹⁹ Avo kuva uanene ngila ya kumuneha muintci mukonda lya mbunga, mukemo muva londele helu lya njivo vaka mu shuluithila mulipudhu, ha chiyalo chendi, mukati kavantu, kulutue-lutue lua Yesu. ²⁰ Mukumona kutcelela kuavo, Yesu nguendi, "Ove lyala, vuvihe vuove vana vuethela. ²¹ Vaka mathona nava faliseu vashangumukile kulihula, nguavo, "Yiya ou akuanya na kapayo? Yiya a hatha kuethela mulonga te nga Kalunga lika likalyendi?" ²² Vuno Yesu, ua dhivukile viye viva thinganyekele, ua va lekele nguendi, "Vika mulihuila mudhimbunge dheni? ²³ Vika vya vyathi kukuanya, 'Mulonga uove vana uethela' ndi nguavo katuka uende?' ²⁴ Vuno honi, munapande kudhivuka ngueni muna muntu ali nampoko hano hantci ya kuethela mulonga." _ua kuanyene na lyala muka kayekele nguendi, ''Njikuleka nguange, katuka, kakula chiyalo chove uye kunjivo yove." ²⁵ Haye vene uakatukile kulutue luavo uakakuile chiyalo chiye cha ndandele. mukemo mua yile kunjivo yendi, na kushangala Kalunga. ²⁶ Nkala umo uakomokele va shangalele Kalunga. Vashulile na lyova, nguavo, "Etu tunamona vyuma vya kamakama lelo.'' ²⁷ Kunima te vyuma vyoshe vina hiti, Yesu ua tundile ho keho ua muene muka kufuetetha lithimu lidhina lyendi Levi natumama ku mbalaka ya kufuetethela lishimu. Ua mu lekele nguendi, "Linga u njishuame." ²⁸ Ngocho Levi uakatukile uamushuamene, vyuma vyendi vyoshe ua vithile. ²⁹ Ngocho Levi mukemo mua yumbuile Yesu. Vaka kufuetetha lishimu vavengi na vantu vavo vali dhengelekele kutafula mukulya navo. ³⁰ Vuno vafaliseu na vaka mathona va tatuethele vandongi vendi, nguavo, "Vati mulya na kunua kumo na vaka kufuetetha lishimu na vaka mulonga?" ³¹ Yesu ua va tavele nguendi, "Vantu vaye vali na vukangule kuva thetela chimbanda; kuvanga vaye lika vavavala. ³² Ange kunjedhile ku vaka vuchili, vuno ku vaka mulonga linga va tenguluke." ³³ Va mu lekele nguavo, "Vandonge va Yoano nthimbu kunthimbu vadhilila na kulomba, na vandonge lalo va vaFaliseu navo lalo movekupanga. Vuno honi vandonge vove kulya lika na kanua." ³⁴ Yesu ua vehuile nguendi, "Kuatha umo ueni a panga vulo vuendi keho vantu va dhiliya kulya hanthimbu kanda u chili navo ndi?'' ³⁵ Vuno honi haka kala matangua a kajeneka ho ndungi, akeo matangua ova ka dhilila.'' ³⁶ Umba lalo Yesu uava telelele chithimo. Nguendi, "Na umo uahi a tavula kachitavu kachithala cha chiha achipangethe mukuvandeka kuchikovelo cha ku kulupa. Nga a linga ovyo, a tavula chikovelo chachiha, umba lalo chitavu china tundu ku chikovelo chachiha kochi ka fuila ku chikovelo cha kukulupa. ³⁷ Na umo uahi a longela vinyu vya viha mu vinchako vya chikanda cha ku kulupa. Nga a panga ovyo, vinyu vya viha vitavula vinchako, Na vinyu vika mbalumuka, na nchako ya vinyu yika vihya. ³⁸ Nkumani vinyu vya viha vya fuila kuvihaka munchako ya yiha. ³⁹ Na umo uahi nga a vanga kunua vinyu vya laya ayongole vya viha, mukonda a handeka nguendi, 'Vya laya hasha ko.'''