¹ Yesu ua kovelele na ku hita muYeliko. ² Taleni, kuakele lyala ua kuluka Sangeu, Endi uakele mukuluntu uaku fuetetha lisimu na yikeye ua kele mpite. ³ Ua yonguele a mone Yesu nkuma yikeye yiya, vuno ka hathele kumumona mukonda mbunga yakele yayingi. Mukonda endi uakele ua muihi. ⁴ Na yikeye ua puikilile kulutue lya vantu aka londe kuchiti linga amu mone. Mukonda Yesu ua yonguele kuhita mungila yiye vene. ⁵ Muye Yesu mua hetele hamuhela, endi uakankukile mesho endi kuilu uakuanyene nguendi, ''Sangeu, shuluka vuathi, lelo njikakala kunjivo yove,. '' ⁶ Keho uashulukile hantci uamutambuile nanjangi. ⁷ Muje va vimuene evi, vaye voshe vaninguele nguavo, '' nayi nakukathikama na lyala uje mukua milonga.'' ⁸ Sangeu uemanene naku kuanya na Muene, nguendi, '' Tala, Muene, vufuko vuange njivuhita mukati njikahana kuvihutu, nga nja tambuile vya umo mumahuku nkala vyuma, ange njika mu hingithilamo lu uana.'' ⁹ Yesu ua kuanyene nendi nguendi, ''Lelo kuovoka kunenja munjivo yino, mukonda nendi muna Avilahama. ¹⁰ Muomu Muna Muntu uenja mukuthetela na kuovola vantu vaye vaka ku dhimbala.'' ¹¹ Muye muvovuile vyuma evi, ua tuikile kukuanya na kuvaleka na chithimo, mukonda uakele muyehi na Yelusalema, va thinganiekele nguavo , vumuene ua Kalunga mualolo vuka jomboloka. ¹² Ua handekele haye vene nguendi, ''Hakele lyala mukakathingimiko uayile kucifuti chahale mukukatambuila yendi vavenya vu muene naku kahilukamo. ¹³ Ua thanene vindungo vyendi likumi naku vahana malonga likumi, naku valeka nguendi,pangeni vyakulandetha noho honji kahiluka. ¹⁴ Vuno Vaka chithemua chendi kava muyonguele vamu dhindile va tumine tunganda kunima yendi, nguauo, kotuayonguele uno lyala atu tumine yetu voshe. ¹⁵ Vya yombolokele haka hilukile lalo, haka uanene vu muene ua tumine dhingamba kuli uye yiva hanene vimbongo vamu thanene kulyendi, linga Athivukithe vingahi viva na uana mo muvana landetha. ¹⁶ Ua kulivanga ue dhile kulyendi, nguendi, 'Muene, vimbongo vyove vyo ua njihanene vina litheme likumi lalo. ¹⁷ Muene ua mulekele nguendi, ndangi, ngamba uachili. Mukonda njaku tcelelele kuvyuma vyavi ndende,uka kala nantcili yaku tumina muMembo akama likumi.' ¹⁸ Ua mucivali uedhile, uakuanyene nguendi, 'Vimbongo vyove, Muene, vina theme vimbongo vitanu. ¹⁹ Muene ua kuanyene nendi nguendi, Uka kala nandhili ya kutumina membo akama atanu. ²⁰ "Mukuavo uedhile, ua kuanyene nguendi, 'Muene, vimbongo vyove vyo ua njihanene njavi kutilile kuntanga, ²¹ njakele nalyova kulyove, Mukonda ove ue kutumina muntu. "Ove muntu ua chikakata. Ove kutambula evi keti vyove mba lalo ove ue kutya kuje ku ua kuvile.' ²² Muene ua mulekele nguendi, Mu lijui lyove njiku panguila, Ove ungamba ua chilenda. Uvi dhivuka nguove ange nji muntu ua mukalu, ange nje kutambula vije vyasha ko nja hakele, nje kutya evi kuje kunjakuvile. ²³ Ambe vika viua yenekele kuvi haka vimbongo vyange mumbanga, ambe muye monjika hiluka njaku vitambula ko na ka konduethi?' ²⁴ Muene ua kuanyene na vaye vemanene kuye nguendi,mutambuleni vyo vimbongo, naku vihana kuli uye uakele nalikumi lya vimbongo.' ²⁵ Vakuanyene nendi nguavo, 'Muene, endi ali navimbongo likumi.' ²⁶ Njimileka eni nguange, kuli uoshe uye ali navyo vaka muhana vyavingi, vuno kuli ouo aviyeneka, nambe akakala navyo vaka munyeka vyo vene. ²⁷ Vuno vaka cidhindo change, voshe vaye vayeneka kunjiyongola kuvatumina vakevo, vanehe ni kuno ma vatciha kulutue lyange.''' ²⁸ Muye muamanene kuhandeka vyuma evi, endi uasuenene kulutue, uayile kuYelusalema. ²⁹ Kuakele ngechiye muye muedhile muhyehi na Betafange na Betani, ku mukinya uove kuthana Oliveta, ua tumine vandonge vendi vavali, ³⁰ Ua kuanyene nguendi, '' Yeni kumembo akushuamako. Homu kakovela mo, muka uana chindongi uova yeneka kulonda lumo. Kamu vutuleni mukamunehe kuli yange. ³¹ Ambe nkala uoshe aka mihula nguendi, vika mumu vutuila ouo chindongi? kamu lekemi ngueni muene amuyongola.''' ³² Ku voshe vaye vatumine vayile naku uana chindongi ngue mua valekele Yesu. ³³ Muye mova mu vutuile chindongi, vavenya uave huile, vika mumu vutuila ouo chindongi?'' ³⁴ Vakuanyene nguavo, Muene amu thetela.'' ³⁵ Vamu nehele kuli Yesu, navakevo va muhakele vidhala vyavo ha chindongi na Yesu ua tumamene ho. ³⁶ omo yikeye uayile, valele vidhala vyavo mungila. ³⁷ Omo endi ha hetele muhyehi namuhela ua mukinya ua Oliveta, vandonge vavengi va shangumukile na njangi naku shambelela kalunga na lijui ku ndhili ya Muene ku vipanga vyoshe viye vyova muene. ³⁸ Nguendi, Vavedhuka Muene uye eja muli dhina lya Muene! chiyulo chamuilu naku shangala chili muilu!? ³⁹ Vamo vavaFaliseu vamu mbunga vakuanyene nendi nguavo, "Mulongisi, vindika vandonge vove." ⁴⁰ Yesu ua valimbuluile naku valeka nguendi, Ange njimileka nguange, nga voshe ava vakaholoka kulu, na mavue ano akatambakana." ⁴¹ Omo Yesu mua shuenene muhyehi nalimbo lyakama, ualilile, ⁴² Ua kuanyene nguendi, "Ambe nga muna dhivukile litangua eli, nambe yeni, ku vyuma vya nehele chiyulo! vuno ngechi vana vishueke kumesho ove. ⁴³ Mukonda matangua ekeja kuli yeni muye vaka chidhindo vaka hinda china likudhengeleke naku lidhenguluka kulyove naku thita chimpaka kuvi mbango vyoshe. ⁴⁴ Avo vaka kuthanyona na vana vove hantci. Muli yove kuva kathimo livue helu lya likuavo mukonda ntcimbu yove yachili iye ya ku kuohyela Kalunga vuno ove ko uavi dhivukile." ⁴⁵ Yesu ua kovelele mutembele ua shangu mukile kutuhulamo voshe valandethelelemo muye, ⁴⁶ ua kuanyene navo nguendi, "Vanathona nguavo, 'Njivo yange, njivo ya kulombela; vuno eni muna yitenge njivo ya vidhi." ⁴⁷ Omo Yesu ua longethele nkala litangua mu tembele. Vakuluntu va vasasendote na vaka kuthona na vakuluntu vavantu va yonguele ku mutciha, ⁴⁸ Vuno kova uanene ngila ya kuvipanga mukonda vantu voshe vamu yonguele ku mutolilila.