¹ Keho uava tililile chithimo ngue muje muva lomba ntcimbu yoshe naku yeneka kudhumua, ² Uakuanyene nguendi, ''Muimbo limo lyakama muakele lihako uye kakele nalyova na kalunga naku yeneka kuthingimika vantu. ³ Vuno muimbo liye lyakama muakele lalo ntuluue, namukentu uye uedhile kuli yakeye, uakuanyene nguendi, 'Njikuathe vakavidhindo vyange vanjuvuileko chivovo.' ⁴ Ntcimbu yakama kayonguele kumukuatha, vuno kunima ualithinganyekele, 'Nambe munjajeneka kuteua kalunga nakuthingimika vantu, ⁵ Ngechi mukonda ntuluue ou akanji lingila muyoyo uakama, njimu kuathe mualolo ngechi, linga anjishondoloke keti lalo ejeko.'''' ⁶ Keho muene nguendi, ''Tolilileni vyaka handeka lihako uachivembulu. ⁷ Muololo kalunga katha lalo nkuma kuhana chivovo kuli vendi vaje vamulilila mutanya navutciki ndi? Nkuma atambata nthsimbu ndi? ⁸ Njimileka nguange aneha chivovo kulyavo vuathi vuathi. Nambe ngoco, omo muna muntu akeja, chili vene akuuana lutcelelo hano hantci ndi?'' ⁹ Ngechi lalo uatile chithimo kuli vaka kulituntula naku limona kushungama hakati ka vantu vakuavo. ¹⁰ ''Vamala vavali vaile mungeleka vaka lombe- umo kafaliseo na mukuavo mukaku fuetetha lithimu. ¹¹ Kafaliseu ua katukile na kulomba vyuma vyendi vavenya, 'Kalunga, njina kushangala ange konja lifuile ngue vantu vavo- va vuidthi, vantu vaku jeneka kuyela, vaka vukuidhi- ndi uakufua ngue ou muka kufuetetha lithimu.' ¹² Njeku likela kulia luvali mu chivike. Nje hana chimo kulikumi kuvyoshe vyo njeku uana,' ¹³ Vuno muka kufuetetha lithimu, uema nene hale, kathele kukankuka mesho endi muilu, vuno ua lipupile hantulo, nguendi, 'Kalunga , njuvuileko ngodhi, njimuka mulonga.' ¹⁴ Ange njimileka nguange,lyala ou uahilukile kuimbo na chi vovo kutuvakana mukuavo, mukonda uoshe alihametha vaka mukehetha, vuno uoshe alikehetha vaka muhametha .'' ¹⁵ Vantu vamu nehelele lalo vana vavo linga aku vahume , vuno muva vimuene vandonge, vava vindi kile. ¹⁶ vuno Yesu ua vathanene, nguendi, ''Tavetheni vanike vavandende veje kulyange, keti muva vindike. Mukonda vumuene vua Kalunga vuka kala vuavo. ¹⁷ Vuchili njimileka, uoshe katambula vumuene vua Kalunga ngue munike, kakakovela nahamo hahi." ¹⁸ Kuakele umo ua vaka kutumina uamuihuile, nguendi, ''Mulongithi uaku vuaha, Vika njikapanga linga njikakovele mumuono ua myaka yoshe?'' ¹⁹ Yesu uamu lekele nguendi, ''Vika unji thanena uaku vuaha? uahi uaku vuaha, kuvanga Kalunga lika. ²⁰ Una ethiva ma shiko-keti ukalinge vukuidhi, keti ukatcihe, keti ukapuanje, keti uvangeye, thingimika yisho na vanoko." ²¹ Muka kutumina nguendi, "Vyuma vyoshe ovyo njavi puithamo kutunda ku vukuendje vuange.'' ²² Yesu muaviuvuile, ua mulekele nguendi, ''Unajene kaho chu chimo. Landetha vyoshe vyo uakala navyo linga uvyavele ku vihutu, vaka ku punguilavyo muilu-yija, unji shuame.'' ²³ Vuno muovuile vyuma ovyo mukakutumina, ua luvalele, mukonda ua fukile muakama. ²⁴ Yesu ua mumuene ali na vuthiua navua, nguendi, chinapu chachikalu kuli vaka kufuka kukakovela mu vumuene vua Kalunga! ²⁵ Vuno chachathi kuli ngamelu kukovela mulisho lya nguya, chachikalu kuli muntu muka kufuka kukakovela mu vumuene vua Kalunga.'' ^{27 26} Vaje vavyuvuile vakuanyene nguavo, yiya akovoka? v 27 Jesu ua vakumbuluile nguendi, "Chije chachikalu kuli kumutu chachathi kuli Kalunga." ²⁸ Petululu nguendi, ''Mukemuo, tala etu tunathi vyuma vyetu tuna kushuama yove.'' ²⁹ Hakeho Yesu ua valekele nguendi, ''Vuchili, njimileka nguange uoshe uje nathi limbo lyendi, ndi mukentu uendi, ndi vamu naina, vithemi vendi, ndi vana vendi, mukonda ya vumuene vua Kalunga, ³⁰ Uje kaka tambula vyavingi navua muchifuti chino, muchifuti chiye chikejako, muono ua myaka yoshe." ³¹ Keho uava hakele hamo vaye likumi navavali kulyendi vavenya, ua valekele nguendi,'Taleni, tuya kuYelusalema vyuma viye vyoshe viva thonene kuli vapolofeto hali Muna Muntu ngechi vika puamo. ³² Mukonda vaka muhana kuli vaka vifuti,naku mutcopa,vakapanga nendi vya ntcuama vyaku thembulula, naku mujekuila mate. ³³ Hova manene kumupupa, ngocho vene vaka mutcihya, vuno halitangua lyamu chitatu akashituka lalo.'' ³⁴ Kova vyuvuile vuino vyuma evi, namathona aye avandele kuli vakevo, naku yeneka kuvua kuvyuma viye vyova kuanyene. ³⁵ Mo vyakele ngechiye, muye Yesu ua hetele kuYeliko, kuakele umo muntu kapuputua ua tumamene kuntchongo yangila nakulomba, ³⁶ Omo uo vuile mbunga yihita, uehuile vika ovyo vihita oko. ³⁷ Va mulekele nguavo Yesu uaku Nazaleta a hita. ³⁸ keho kapuputua ua tambakanene muakama, ua kuanyene nguendi, ''Yesu, Muna Ndaviti, njuvuile ko ngodhi.'' ³⁹ Ava voshe vatuamene kulutue vamu vindikile lyala uaka puputua, vamu lekele linga aholoke kulu. Vuno endi ua tambakanene muakama, ''Muna Ndaviti, njuvuile ko ngodhi.'' ⁴⁰ Yesu ue manene naku valeka nguendi muneheni kuno kulyange. Omo lyala ua kapuputua ua kele muhyehi , Yesu ua muihuile nguendi, ⁴¹ ''Vika uyongola ange njikupangele vyo?'' Ua kuanyene nguendi, ''Muene, ange njiyongola kumona.'' ⁴² Yesu ua handekele nendi nguendi, ''Mona. Kutcelela kuove kuna kukanguitha.'' ⁴³ Haye vene ua muene ua shuamene Yesu, naku shangala kalunga. Omo vantu voshe, va muene evi, va shangalele kalunga.