¹ Muntcimbu yiye vene, muye makulukadhi a vantu va kungulukile hamo chikuma ngechiye vali lyatangelele hali umo namu kuavo, yikeye ua shangumukile kukuanya na vandonge vendi nguendi, ''linyungeni kuhingo yava Faliseo vaye vaka kulihaka vyo. ² Vuno na chimo chahi chakufuika chijeneka kuka fukuka, navimo vyakushueka vi yeneke kuka yomboloka. ³ Ku vyoshe vimu ka kuanya mumuthithi viko vuika kumutana, navi muna kuanya mumatui namu kati kanjivo vavya mbulula helu lyanchongua ya njivo. ⁴ Ange njikuanya neni nguange, vavuthamba vuange, kati mukale na lyova lyouye atciha muvila, kunima kutunda oho na vimo vyahi lalo va panga ko. ⁵ Vuno Ange njimi nangula kuli uye yomu vuila lyova. muteueni ou umo uye, a tciha, ali nandhili yaku kumbila mu ngehena. Mukemo, Ange nji kuanya neni nguange, mu teueni yikeye. ⁶ Keti tudhila vatano vimuna landethe navimbongo vivali ndi?Keho naumo uavo uahi yiva nevala kumu tambela ua Kalunga. ⁷ Vuno na vinkambu viaku mitue yeni vyoshe navyo vana vitanda. Keti mukale nalyova. Eni mulyo ua uingi kutuvakana tudhila vavengi. ⁸ Ange njikuanya neni nguange, nkala uoshe uye ali tavela kumesho a muntu, na Muna muntu nendi lalo vaka mutavela kumesho a tungelo tua Kalunga, ⁹ Vuno uye anji vyana kumesho a vantu vakamu vyana kumesho a Tungelo tua Kalunga. ¹⁰ Nkala uoshe a kuanya lijui lyaku shaula Muna Muntu vaka muechela, vuno uye aka shaula mpundhi yaku yela kavaka muechela. ¹¹ Muye vana kuneha kulutue lua shinangonge, vaka mashiko,na vaka ndhili, keti mukale na vishoti ngueni vati tuka kuanya na vati tu kalyohyela, na vika viye vyou kakuanya. ¹² Nga mpundhi yaku Yela yiku longetha mu ola yiyevene uka kuanya.'' ¹³ Keho kua kele umo mbunga ua kuanyene nendi nguendi, ''mulongii, leka muna nana ua lyala linga tulyavele vufuko nange.'' ¹⁴ Yesu ua kuanyene nendi nguendi, ''Lyala, uye ua njipanga linga njikale mukua kupangula ndi njimikalele helu lyeni ndii?'' ¹⁵ Ua kuanyene navo nguendi, Tala ngechiye una tundu ko kulishungu lyakama, mukonda vuyoye vua muntu ko vua kele kushuama kuvufuko vuendi.'' ¹⁶ Keho Yesu ua valekele mu chithimo, naku kuanya nguendi, ''lihya lya mpite lyemine muakama, ¹⁷ Naku lihula yendi vavenya, nguendi, mukonda konjethi na muhela njihatha kupunguila mbuto yange?' ¹⁸ Ua kuanyene, evi vikevyo nji kapanga. Njika lundumuna naku tunga limbo lyakama, na mukemo monji ka punguila mbuto na vufuko vumo. ¹⁹ Njikaleka muono uange, ''Muono, uli na vufuko vuuna pungula ha myaka yayingi. Huima na chiyulo, lya, nua, naku yolela.''' ²⁰ Vuno Kalunga ua mu lekele nguendi, ' Lyala ua litha, vu tciki vuno vene njika tambula mo muono muli yove, na vyuma vyoshe vyouna li vuahethela,vikakala vyeya?' ²¹ Ngocho vene muna fu ngue uye nali punguila vufuko kuli yendi vavenya naku yeneka kuvu hetetha kuli Kalunga,'' ²² Yesu ua handekele nava ndonge vendi nguendi, '' Njimi leka nguange, keti mukale navishoti vya muono ueni, Ngueni vika vimu kalya, nambe vya ku muvila ueni, ngueni vika vimuka dhala. ²³ Mukonda muono ueni uli na mulyo uaku tuvakana vyakulya, na muvila uli na mulyo uaku tuvakana vidhala. ²⁴ Taleni makololo, kuve kulima nambe kutya. Kova kele nadhi njivo nambe vishepa vyaku punguila, vuno Kalunga ueku valitha. Yeni muli namulyo ku tuvakana tudhila! ²⁵ Yiya umo hakati keni ua kala na mbunge ya kukalu ua muku vuedhelela vya muono uend? ²⁶ Nga kuathele kupanga vya vindende, vika vi uthinga nyekela vikuavo? ²⁷ Thinganyekeni nchani- muili naku kukula. Kuye kupanga, nambe kuthithua. Keho njikuanya neni nguange, nambe vumuene vua Solomone na vu fuko vuendi kadhalele vidhala vya ku vuaha kavya lifuile ngue evi. ²⁸ Nga Kalunga a dhaleka muila uamu muthenge, viye vikula nalelo, na yimene vaka vyumbila mutuhya, kaka tuvakana kumidhaleka yeni ndi, Eni vaka kutcelela chachi ndende! ²⁹ Keti muthetele vyomu kalya nevi vimu kanua, keti mukale navu kalu. ³⁰ Vuno mishovo yoshe ya muchifuti vathetela vyuma evi, na Yisho yeni nadhivuka viye vyo muthetela. ³¹ Vuno theteleni vumuene vueni, na vyuma evi vyoshe aka mi vivuedhelela. ³² Keti mukale nalyova, na mbunga yayindende, mukonda Yishoyeni navuahelela muakama muku mihana vumuene. ³³ Landetheni vyoshe vyomuafuka mu vihana kuvihutu. Litongeleni eni vavenya vinkombe viye kuvi kakulupa -vufuko vua muilu uye kavue kuhua, muye vidhi kuvaka shuena ko, na tuntembulu kayatha kuvitha. ³⁴ Muye muakala vufuko vuove , na mbunge yove lalo moyikakala. ³⁵ Lingeni vidhala vyeni vyalaha muvi shuele mumiva yeni, na dhilambi dheni dhikale dhaku shuama. ³⁶ Kaleni ngue vantu vaye vathetela muene uavo muaka hiluka ku chilika cha vulo, keho muye muenja naku ngongola hanthimbu yiye vene vamu shokoluela chikolo. ³⁷ Vavedhuka vadhingamba vaye va tatelela shokuayina yavo mueja avo vali na ku talela . vuchili nji mileka nguange, endi aka shuela chikoveyo chendi chalaha mumuiva mumbunda yendi akuva tumbika ku mesa yendi, naku vahana vya kulya. ³⁸ Nga muene akenja nthimbu yamu chivali muku vatala vuthsiki, nambe muakeja muku vatala nthimbu yamu chitatu, aku vauane vana li vuahethela, vana vedhuka va dhingamba vaye. ³⁹ Vuno uvuilileni echi, nga vavenya njivo na thivukile ntcimbu mukua muidhi enja, nga katavele njivo yendi vai pukule. ⁴⁰ Livuahetheleni lalo mukonda ko mu thivuka ntcimbu muka Muna muntu akeja.'' ⁴¹ Petulu ua kuanyene nguendi, ''Muene, unatuleke vithimo evi yetulika, ndi nankala uoshe?'' ⁴² Muene ua kuanyene nguendi, ''yiya yomua tcelela ntuama ali namana linga Muene uendi amu hake mukuluntu uava kuavo ueku vahana vya kulya ku ntcimbu yacho? ⁴³ Ua vedhuka ngamba uaye omo Muene uavo akenja akumu uane apanga muye vene. ⁴⁴ Vuchili njimileka nguange ou vaka muhaka helu lya vyuma vuoshe. ⁴⁵ Vuno ngamba uye a kuanya mumbunge yendi nguendi, 'muene uange ali na malanga kaka hiluka vuathi,' naku tameka kupupa vangamba va vamala nava vavakentu na kulya na kunua naku penda napu chi nkolue, ⁴⁶ Muene ua ngamba ouo akenja li tangua lya nayeneka kutata na ntcimbu yana jeneka kudhivuka aka muvatola vipuka naku muhaka kumolika navaye vakaku yeneka kutcelela. ⁴⁷ Ngamba uye, adhivuka viyongola vya muene uendi naku yeneka kuli vua hethela muku panga kutuala muaya viyongola chendi, vaka mupupa na vivandhi vyavingi. ⁴⁸ Vunoumo uye ka dhivukile na ku panga viye vina na fuila kumupupa, vaka mupupa navivadhi vya vindende. Vuno nkala uoshe uye yiva hanene vya vingi, kuli lyendi vyavingi vaka uanako, na uye umo yatcelelele mua kama ,nambe lualuingi vaka muihula. ⁴⁹ Ange njedhile muku neha tuhya hano hantci,vika lalo nji pangako nga tuna shuamene laya. ⁵⁰ Vuno ange njili naku mbuitika njipue muka kumbuitika chacho,na vati ange njika thinganyeka noho vikapuithamo! ⁵¹ Muna thinganyeka ange njedhile kuneha chivovo hano hantcitci ndi? kuahi, Ange njimileka nguange, vuno kuvanga kulitepa vene. ⁵² Mukutunda hano vene kuka kala vantu vatanu mu njivo yimolika va ka litepa- vantu vatatu vaka kadhinda vavali, nava vavali vaka dhinda vatatu. ⁵³ Kukala kulitepa, yishe aka dhinda mona ua lyala na mona ua lyala aka dhinda yishe, yina aka dhinda mona ua mukentu namona ua mukentu aka dhinda vayina, vayina -mueno vaka dhinda vayina mueno vayina mueno vaka dhinda va yina mueno.'' ⁵⁴ Yesu ua kuanyene na mbunga lalo nguendi, ''Muye muka mona mashelua atuhuka kuvutunde tangua, vuathi- vuathi dhivukeni ngueni, 'mema ali hamu hyehi,' na kulima chi nenja,' na mukemo movikafua. ⁵⁵ Muye mpundhi yitunda kuvutokelo omo yi huhua, muka kuanya ngueni, 'kukakala ntuima,' mukemo movi kafua. ⁵⁶ Eni vaka chivembulu, muna dhivuka kula ngulula vya hantci na muilu, vuno vati eni ka muidhiva kula ngulula vya ha ntcimbu oyo vene? ⁵⁷ Vika mua yene kela kupangula vya vushunga kuli eni vavenya? ⁵⁸ Mukonda ntcimbu mukaya mumo namuka chidhindo chove kulutue lua muka kupangula, mukuya mungila uana ntcimbu yaku lyechela kulutue lua lihako,na mukonda lihako keti aku uane na mulonga aku hene kuli muka kutakametha, na uye muka kutakametha linga keti aku mbile mukamenga. ⁵⁹ Ange njimi leka nguange, kouka tuhukamo noho una fuete mulonga yuove na dhimbongo.''