¹ Kuruku rwa vino ame anu mono va Engeli vane kuna yimana mu makovhu ghamu huka ne damu mudjuni, vavo kuna kwata naku kava mpepo damu huka ne damu ghudjuni mposhi kapishi diyunge diyende mu shirongo, namu lifuta, ntani naku vitondo. ² Ntani ame anu mono mu Engeli kuna kuya kuna kutunda ku ruha rwaku ghupumeyuva, ghuye kuna kwaterere makumba navi yivito vyaku tura naku popera vantu va Karunga. Ghuye kwa yiyira na liywi lya linene atantere vano va Engeli vane va nkondo vamu huka ne damu ghudjuni ovo va kwato mpepo vaku djonaghura shirongo ntani na lifuta, kwa ghamba ashi: ³ "Kapishi mu djonaghure shirongo, na lifuta ntani na vitondo dogoro ngatu mane kutura viyivito navi neyedo pa vipara vya vantu na vakareli va Hompa Karunga wetu. ⁴ Ame kwa yuvire shivaro sha vantu va Karunga ovo vatulire viyivito shaku tika ku: 144,000, vaku tunda kudi muhoko damu Isirayeli nadintje: ⁵ Mayovi murongo-na-mbiri vamu lira lya Yuda; ntani mayovi murongo-na-mbiri vamu lira lya Rubeni, ntani mayovi murongo-na-mbiri vamu lira lya Gadi, ⁶ ntani mayovi murongo-na-mbiri vamu lira lya Asseri, ntani mayovi murongo-na-mbiri vamu lira lya Nafutali, ntani mayovi murongo-na-mbiri vamu lira lya Manase, ⁷ ntani mayovi murongo-na-mbiri vamu lira lya Simiyoni, ntani mayovi murongo-na-mbiri, vamu lira lya Levi, ntani mayovi murongo-na-mbiri vamu lira lya Isasikali, ⁸ ntani mayovi murongo-na-mbiri vamu lira lya Sebuloni, ntani mayovi murongo-na-mbiri vamu lira lya Yosef, ntani mayovi murongo-na-mbiri vamu lira lya Benyamenyi ovano mbo vantu vatulire viyivito. ⁹ Kuruku rwa vino ame anu amono, mbunga ya vantu va vayingi vaku pira kuvhura ku varura - vantu vaku tunda kwa kehe maraka, na muhoko, na marudi, na mpo ntani naku maraka gha vantu vamu ghudjuni vaku tunda ku virongo navintje - vavo kuna yimana kumeho ya shipundi sha ghuHompa ntani naku meho ya ndjwighona. Vavo kuna dwata marwakani gha makenu ntani kuna kwa terere dimutavi da vikereva mu maghoko ghavo, ¹⁰ vavo kuna kuyimba na liywi lyaku dameka ashi: ''Liyoghoro lya ndjo ntani na monyo wa naruntje kwa tunda kwa Hompa Karunga wetu, oghu ashungiro ku shipundi sha ghuHompa, ntani na ndjwighona oyo ya karo na nkondo daku funda Satana!'' ¹¹ Va Engeli navantje kuna yimana kuna ku ndurukida shipundi sha ghu Hompa ntani kuna kundurukida matimbi ntani kuna kundurukida vikorama vine, ntani kuna tongamene pa ngoro kuna nyongama vipara vyavo kumeho ya shipundi sha ghu Hompa. Vavo kuna ku raperera kwa Karunga, ¹² kuna ku ghamba ashi, ''Amen! Atwe kutanga naku pandura ntani naku fumadeka Hompa Karunga wetu! Ove kwa kara na ndunge, na nkondo, na ghuyerere, ntani na lipangero lya naruntje naku naruntje! Amen!" ¹³ Ghumwe wa matimbi aya ku kwande naku pura ashi, ''Vantu munke vano, vana dwato marwakani gha makenu, ntani kuni nko vana kutunda?'' ¹⁴ Ame anu limburura ashi, ''Mukalikuto, ove waku vhura kuva yiva,'' ntani ghuye aghamba ku kwande ashi, ''Ovano vantu mbovo vapito mu maghupyakadi namu maghudito ghamanene. Ndjwighona kwa fera ndjo davo makura Karunga mbyo adongononapo ndjo davo. Vavo kwa kusha marwakani ghavo kwa kena ntani vavo kwava kusha na honde ya ndjwighona mbyo vakena. ¹⁵ Mukonda yino, vavo mbyo vana yimanene ku shipundi sha ghu Hompa ku shipara sha Karunga, vamu kanderere matiku na mwi mu ntembeli yendi. Oghu ashungiro ku shipundi sha ghu Hompa mbyo ava yambeka mavava ghendi naku vapopera. ¹⁶ Vavo kapi nka ngava fa ndjara na linota. Vavo kapi nka ngava kara mu mwi ntani kapi ngava shupwa liyuywa parutu. ¹⁷ Ndjwighona kwa shungira pakatji ka shipundi sha ghu Hompa ghuye ndje nga karo mukungi wavo, ntani naku vapititira naku vatwara ku mukuro waku pupa mema gha monyo, ntani Hompa Karunga nga kokota maruntjodi ku shipara shavo.''