¹ Ame kwa mona Ndjwighona kuna kutjora naku paturura likumba lyaku hova lyaku makumba matano-na-maviri, makura anu yuvhu shikorama shimwe sha vino vikorama vine kuna ku ghamba na liywi lyaku ndunduma yira maruvadi gha mvhura ashi, ''Ya kuno!'' ² Ame anu mono nkambe ya yikenu kuna yimana. Murondi wa nkambe kuna kwa terere ghuta wa nkandja na ngumba, ntani kuna dwata nkata ya mapenda ku mutwe wendi. Ghuye kuna kuyenda aka rwane vita naku funda vana nkore vendi. ³ Ndjwighona opo yatjolire naku paturura likumba lya ghuviri, ame anu yuvhu shikorama sha ghuviri pa vikorama vine kuna ku ghamba ashi, ''Ya kuno!'' ⁴ Nkambe ya ghuviri ya yigeha yaku fana yira mundiro - ayi rupukamo. Murondi wa nkambe ya ghuviri kwa mupire nkondo daku ghupamo mpora yitundemo mu ghudjuni naghuntje, vantu vaku dipaye vene na vene. Murondi wa nkambe kwamu pire ashimbe rufuro rwa runene. ⁵ Ndjwighona opo yatjolire naku paturura likumba lya ghutatu, ame anu yuvhu shikorama sha ghutatu pa vikorama vine kuna ku ghamba ashi, ''Ya kuno!'' Ame anu mono nkambe ya yitipu, ntani murondi wa nkambe kuna kwa terere shiviha mulighoko lyendi. ⁶ Ame anu yuvhu liywi kuna kutunda ku shikorama sha ghune pa vino vikorama kuna ku ghamba ashi, ''Nkinda yimwe tupu ya ghutura wa rukokotwa kuna rondo kuna kara ku ndando yaku yeruka ya ndiro, ntani nkinda ntatu daghutura wa rukokotwa kudi ruwanena liyuva lyaku yura ntani kudi wana kuna kara na ndiro ku ndando yaku yeruka. Ano ngoli kapishi ghu kwate naku rundurura ku ndando ya maghadi ntani na mandjembere ghaku ruwana vinyu.'' ⁷ Ndjwighona kwa yatjora naku paturura likumba lya ghune, ame anu yuvhu liywi lya shikorama sha ghune kuna kughamba ashi, ''Ya kuno!'' ⁸ Ame anu mono nkambe ya mavara-mavara ntani na mandjoto-mandjoto ghaku vhonga ghukenu na ghugeha ku tanta ashi mfa. Murondi wa nkambe lidina lyendi mudipayi ndi mfa, ntani shirongo shavafe shakuntji ya livhu kuna kumu kwama-kwama kehe kuno ana kuyenda. Hompa Karunga kwa tapire nkondo kwa vano vantu va viri vadipaye vantu va vayingi vamu ghudjuni, kwava dipaya na rufuro, ntani naku ndjara na lirumbu ntani na lihamba lyamukaghu, ntani vamwe kwafa ku vikashama vyaku dipaya vantu vyamu ghudjuni. ⁹ Ndjwighona opo yatjora naku paturura likumba lya ghutano, ame anu mono munda ya shidjambero kuna karamo monyo da vantu ovo vadipaya mukonda yaku yuvita Nkango da Karunga ntani na ghumbangi wa lipuro lyavo. ¹⁰ Vavo kuna ku lira na liywi lyaku dameka ashi, ''Hompa Karunga ove mupangeli wa navantje, ove mupongoki ntani ove muna ghushili, dogoro shirugho shaku tika kuni nko nga shipito, ntani ngaghu pangura naku tengeka naku futita vano vantu va dipayo vakareli voye!'''' ¹¹ Hompa Karunga atapa lirwakani kwa kehe ghuno adwate ntani aghamba ashi tatererenu ko shimpe shirugho shashifupi dogoro ngashi tikemo shivaro sha vantu va Karunga ntani na shavaro sha vantu vaku ruwana ghukareli Karunga vaghunyenu ntani na shivaro shaku dipaya vantu va Karunga, yira momu vamu dipaya anwe, shivaro shino ngashi tikemo. ¹² Ndjwighona opo yatjora naku paturura likumba lya ghutano-na-limwe, ame kwa mona livhu lina taghuka lina kinki kuna ku ka nkama. Liyuva kuna kara mundema ntani kuwiru kuna kara muti na mutwitwi wa bwi, ntani ka kwedi kuna gehe yira honde. ¹³ Ntani ntungwedi daku liwiru kuna were pa livhu, yira momu ya wanga nyango yaku ghukuyu ku shitondo paku yunga mpepo ya likundungu lya nkondo. ¹⁴ Mbando yaku liwiru kuna tunduko yira lipepa lyamu mbapira vana peteke. Ndundu na virudi vyamu lifuta kuna tundu pa mavhango viyende viyende ku mavhango gha peke. ¹⁵ Makura vantu navantje vamu ghudjuni vakare va Hompa vapa livhu, vaka makuto, na vampititi va vakavita, na vangagho, na vantu va nkondo, na vapika, nava manguruki ntani na vantu na vantje kwa duka vaka vande kuma kwina naku marupako mu mawe ntani naku ndundu. ¹⁶ Vavo kwa ghamba naku tantera ndundu na mawe ashi, ''Mbanduka ghutu were! Tuhoreke tuvande kuna shana kutunda ku shipara shaghu ashungiro ku shipundi sha ghuHompa ntani tupire ku wana lishandu na mpanguro ya Ndjwighona. ¹⁷ Weno liyuva lya linene lyaku pangura naku neyeda lishandu lyendi litikemo. Are waku vhura ku paruka kwa vino?''