Mposhi mukurona wavakakuyimba; ashungiri mukutemwinina kwaGittithe. Lipisamu lyaAsafi.

¹ Yimbenu nakudameka kwaKarunga munankondo wetu; yiyirenu ghunene muruhafo kwaKarunga waYakobu. ² Yimbenu rushumo ntani nakuveta shivetito shakushuka namaghoko; naruhafo rwakudira ghushiri nashikitara shashinene. ³ Fuda shivetito paliyuva lyalipe pakuterama kakwedi, paliyuva lyakugwanena kakwedi, liyuva lyakutameka kudjobwana. ⁴ Kwavinoko ndjo veta muIsraeli, pakutokora mukutapa kwaKarunga waYakobu. ⁵ Ghuye akoshonona kwayo vata kwaYosefu ruvedero ayendire ghuye naghunankore kulivango muEgipite, okonayuvire liywi olyonadilire kudimburura: ⁶ ''Ame naghupupo ghudito pamapepe ghendi; maghoko ghendi avaghamangurura mukukwaterera shindeyi-ndeyi. ⁷ Mughugara ghoye waghunene ghuna yitapandje, ntani ame nakupopelire ove; Ame nakulimbwilire ove mumundema naruvadi rwamaremo. Ame nakushetekire, ove kumema ghaMeribathi. Shera. ⁸ Teghererenu, vantu vande, mposhi nakumurondora anwe, Israeli, ntjene anwe ngamutegherera kukwande! ⁹ Enengoli kwato Karunga wantundwavirongo mukatji kenu; anwe kwatonka kuraperera Karunga wantundwa shirongo. ¹⁰ Ame Hompa Karunga wenu, ogho akamughupiro anwe mulivango lyaEgipite. Yashurenu tukanwa twenu napantje, ntani ame nganituyuda twato. ¹¹ Enengoli vantu vande kapivateghelire nkango dande; vaIsraeli kapi ankwamine ame. ¹² Mposhi ame anivawederereko vavo mundjira yandino yavo mposhi vavo vavure kurughana ovyo vinakumoneko ghuhunga kwavo. ¹³ Oh, ovo vantu vande kuvura ngavategherere kwande; oh, ovo vantu vande kuvura ngavakwame mumpadi dande. ¹⁴ Makura ame kuvura ngani kwangulita kutakamita vanankore vavo ntani nganipirura maghoko ghande ghunankore navo mukuvahepekereramo. ¹⁵ Kwanavantje ovo vanyengo Hompa kulikuyuvodona mukutjira kumeho ghuye! Vavo ngavakara nalikuyuvodona kunaruntje; ¹⁶ Ame ngani lita vaIsraeli naghutura wamburumera; Ame nganimukutika anwe naghushi wapandje yamawe.''