¹ Lirago ghunene ku vantu vaku pongoka nava vaku kushuka vaku ruwana ghushili ntani navo vaku limbutuka naku tikitamo nkango da Hompa Karunga. ² Lirago ghunene ku vantu vaku terera naku tambura nkango da monyo vatape ghumbangi wa ghushili waku hamena ku nkango na viruwana nkondo vya Hompa Karunga, ntani navo vaku pura naku tambura naku huguvara mu mwendi na mutjima davo na monyo davo ntani na liparu lyavo nalintje. ³ Vavo kwato ku ruwana ghurunde; kwa limburuka naku hungama ku shipara sha Hompa Karunga. ⁴ Hompa Karunga kwa tapa nkango dendi na veta dendi daku ronga ghukonentu na ghushili naku neyeda ndjira ya ghuhunga yaku wana ndunge na ghukaro wa ghuwa waku wana lipuro lyaku tikiliramo. ⁵ Ame kuna ku shana kudameka ku ruwana naku tikitamo lipuro lyaku tunda ku nkango doye naku veta doye! ⁶ Makura ame kapi nka nganu kara na ntjoni, daku hamena ku viruwana vyoye, nane ngoli ame nganu kara na ndunge ntani na ghukaro wa ghuwa waku tunda ku nkango naku veta doye. ⁷ Ame nganu kuronga nganu yive nkango na veta doye nadintje ngadi kare mu mwande makura ame nganu ku tanga, naku tapa mfumwa kukoye mukonda ya nkango doye da ghuhunga. ⁸ Ame nganu limburuka naku tikitamo veta doye na nkango doye nadintje; Hompa Karunga wa sha ntjuva ntani wa sha tunda pa pande. ⁹ Ndjira munke yaku hungama yaku pongoka yayiwa yaku vhura ku paruka mudinkantu? Nkwandi yaku yiva naku limburuka naku tikitamo nkango da Hompa Karunga. ¹⁰ Ame nganu ruwana naku limburuka naku tikitamo nkango doye na mutjima wande naghuntje; kapi shi ngaghu nkengerere nushuve naku tjwayuka nutunde ku nkango naku veta doye. ¹¹ Ame kwa pungura nkango doye munda ya mutjima wande mpo shi nganu pire ku ndjona ku shipara shoye. ¹² Hompa Karunga, ame kuna ku kupanda naku ku fumadeka; ndonge naku mpa ndunge daku limburuka ku nkango doye naku veta doye. ¹³ Ame kwa tapa naku ronga nkango doye na veta doye nadintje daku pongoka odo wa tapa ku kwande. ¹⁴ Ame ku kondja muku tikitamo naku limburuka ku nkango doye nadintje ntani ame ku kara na ruhafo rwa runene kupitakana muntu waku wana limona lya liyingi. ¹⁵ Ame nganu varura naku teda nkango doye na veta doye mposhi nganu yive ndjira ya liparu oyo wa tapa ku kwande. ¹⁶ Ame nganu kara na ruhafo rwa ku limburuka naku tikitamo dimuragho doye; ntani ame kapi nganu vhurama nkango doye. ¹⁷ Ruwana ghuwa naku tapa ghunongo kwa mukareli ghoye mposhi nga yive naku limburuka naku tikitamo nkango doye mu shirugho sha liparu lyendi na lintje. ¹⁸ Renka mantjo ghande ghapahuke mposhi nukenge naku yiva naku kwata lighano viruwana vyoye vya vitetu ovyo wa tjanga muveta doye. ¹⁹ Ame kuna ku paruka tupu shirugho shashifupi pano pa ntunda ya livhu; kapishi ghupate ndunge dande nganu pire ku yiva nkango doye nadi muragho doye daku pongoka. ²⁰ Mutjima wande ku shana ku yiva kehe pano nkango doye na dimuragho doye na dintje daku pongoka virugho na vintje. ²¹ Ove kuharukira vantu vaku kunenepita ku shipara shoye, ntani ove kufinga, vantu vaku pira kulimburuka ku dimuragho doye. ²² Popera mupika ghoye ku matuka naku lishwaghu, mukonda shi ame kwa limburuka naku tikitamo dimuragho doye na veta doye nadintje. ²³ Nkene vapangeli kuna pongo vatokore muku ruwana ghudona ku kwande, ame ku dukira ku nkango doye naku veta doye nuvarure naku teda kwa navintje ovyo wa tanta. ²⁴ Nkango doye na veta doye ku yita shite na ruhafo mu mwande, ntani ku tapa maghano na ghukonentu ku kwande. ²⁵ Rutu rwande ntantani nga rufe ngaru vyukire ku mbundu! Mpeko liparu lyaku tunda ku nkango doye da monyo. ²⁶ Ame kwa ghamba naku tapa ku koye navintje vyaku hamena ku liparu lyande, ove mbyo wa tapa lilimbururo ku kwande; weno ndonge nuyive nkango doye nadi murogho doye. ²⁷ Neyeda ndjira yoye ya ghuhunga yaku tunda ku nkango doye naku veta yoye naku ndjenditito yoye, mposhi nganu yive naku kwama naku tikitamo marongo ghoye ghavitetu. ²⁸ Ame kuna ku yuvha tjutju na liguvo murutu! Nkondo-peka rutu rwande na nkango doye na monyo kwavyo wa ghamba. ²⁹ Ndundite mukuyenda ndjira yalipuko; mughulimburukwi ghoye ntjonge mpangera doye. ³⁰ Ame naya tovorora ndjira yalihuguvaro; Ame kehe pano kutura ghuhungami ghoye kupangura lyaghuhunga. ³¹ Ame kuni tikitiliramo likukwatakano lyoye, Hompa, washa mfita ntjoni. ³² Ame kunduka mundjira yadimuragho doye, mukondashi wampa liyuvhoko mumushima wande. ³³ Ntjonge, Hompa, ndjira yoye yaghulimburukwi, ntaninka ngani dipungura dogoro kughuhura, ³⁴ Mpeme liyuvhoko, ngani pangera dimuragho doye: Ngani kengera mumushima wande. ³⁵ Ghunkunge mundjira yoye yadimuragho, odo nashana kundamo, ³⁶ Pititira mutjima wande kulikukwatakano lyoye ntani nitunde kulidiro kuhungama nka. ³⁷ Pirura mantjo ghande atunde mukukenga vininke vyavidona; ghundambwite mundjira yoye. ³⁸ Ghushimbe ngoli muruwani ghoye kumatwenyidiro ghanya waturako vovakufumadeko. ³⁹ Ghupa ngoli lishwaghu olyo natjira, morwa mpanguro yoye yaghuhunga. ⁴⁰ Kenga, ame wapungura mpangera yoye; ghundambite mughuhungami ghoye. ⁴¹ Hompa, ghumpe ngoli shihoro shakudira kurengwa kuliyovoko lyoye, mukutwara mumatwenyidiro ghoye; ⁴² Makura nilimburureko vovana kudimbyuko, mukondashi nahuguvara nkango yoye. ⁴³ Washaghupa nkango dalihuguvaro mukanwa kande, kulihuguvaro lyande mughuhungami ghoye. ⁴⁴ Ngalimburukwa veta yoye kehe pano, naruntje nanaruntje. ⁴⁵ Nganiyenda nakukeverera, mukushana manangwiro ghoye. ⁴⁶ Nganighamba dimughano doye kumeho wavaHompa kapingani kara nantjoni. ⁴⁷ Ngani tikitamo dimuraghodoye odo nahora. ⁴⁸ Ngani yerura mavoko ghande kudimuragho doye, odo nahora, nganidikuteda. ⁴⁹ Yitangoli matwenyidiro kwamuruwani ghoye morwa wampa meho. ⁵⁰ Oyino ndjo ghukorameno wande mumasheteko. ⁵¹ Vanene kuntemaghura me, ano ngoli narumweshi natunda kudimuragho doye. ⁵² Ame kuvhuruka mavyukito ogho vampire kare Hompa, makura kundjitira mashengadiro. ⁵³ Makura ghugara aghuntjuvupo mukonda yavadini Karunga vashweno veta doye. ⁵⁴ Limoneko lyoye linantungo murushumo mundjugho yakashirughoghona. ⁵⁵ Ame kughayara lidinalyoye matiku Hompa, makura nipungure veta. ⁵⁶ Lino ndyo likudeghuro lyande mukondashi hakwafa manangwiro. ⁵⁷ Hompa Karunga ndje wakuhova kukwande ame ngani limburukwa kuvata doye. ⁵⁸ Ame kuna kushungida ghunene mbatero namutjima wande naghuntje; ghumfere nkenda, yira mwatwenyidiro nkango doye. ⁵⁹ Ame nakukonakona ndjira yande, ntani navyuka kulikukukwatakano lyoye. ⁶⁰ Ame kuna kwangura kapinakughoro mukupungura veta doye. ⁶¹ Vadini Karunga kuna kwangura kumanga; Ame nakuvhuramashi veta yoye. ⁶² Mukatji kamatiku kurambuka nitape mpandu koye mukondashi wahungama. ⁶³ Ame ghumwe wavo vakukarerango, kovo valimburuko kuveta doye. ⁶⁴ Pano palivhu, Hompa panayura navantje vakufumadekango mughushiri ntjonge ndjira yoye. ⁶⁵ Waruwana vyaviwa kwamuruwani ghoye, Hompa, mukutwara munkango doye. ⁶⁶ Ghuntjonge ghunongo naliyivo, morwa napura mudimuraghodoye. ⁶⁷ Kumehoko naruwanine vyavidona morwa napukire, weno nakushongo nkango doye. ⁶⁸ Ove wawapa, ntaninka ove nka waruwana vyaviwa, ntjonge lifumano lyoye. ⁶⁹ Valinenepeki kungambera vipempa, ano ngoli ame kukwama mpangera yoye namutjima wande naghuntje. ⁷⁰ Dimutjima davo nakuvikwatashi lighano, ngoli ame kuhafera veta yoye. ⁷¹ Ghuwashiri ntjene ame ani hepe mposhi nikushonge ndjira doye. ⁷² Mpangera doye dakutunda mukanwa koye datovara kupitakana liyovi lya ngorodo ndi sisiliveri. ⁷³ Mavoko ghoye ngo antjito me, ghumpe lyuvhoko lyadimuragho doye. ⁷⁴ Kovo navantje vakufumadeka ngava hafapakumona me, mukondashi nawana lihuguvaro dankango doye. ⁷⁵ Nayivashi, Hompa, mapangero ghoye ahunguma, ntani mulihuvaro lyoye. ⁷⁶ Renka likukwatakano lyoye lyalihuguvaro lintjengawide, yira momo wavintwenyidilire ⁷⁷ Neghede ngoli ghufenkenda mposhi niparuke kumpangera doye ndjo livyulito lyande. ⁷⁸ Navantje valinenepeki ngavavafite ntjoni, mukondashi ngava mfita ntjoni enengoli. ⁷⁹ Kovo ngoli vakufumadeka ngavaya kwande, ⁸⁰ Mutjima wande mwashakara rushivano mposhi tufumadeke veta ngadire kutufita ntjoni ⁸¹ Ame makura nashaninekuwa ove Hompa aghundjoghoramo; nahuguvara munkango doye. ⁸² Mantjoghande nashananimone matwenyidiro ghoye opo ghuntjengawida? ⁸³ Ame nakara ngoli yira ruhupwa rwavinyu mumuti; kapi nivhurama mpangera yoye. ⁸⁴ Dogoro ruvede munke ataterera mukondi ghoye; ruvede munke ngaghupangere ovo vatudipagho? ⁸⁵ Vakunenepeki vadiro kulimburukwa vatimo makwina vankwateremo. ⁸⁶ Mpangera nadintje dahepa kudihuguvara, kuvantu navantje vatuhepikiro mwamudona; mbatere. ⁸⁷ Vavo kasha tupu vantunditepo pano palivhu, ano ngoli kapina shwenine mpangera doye. ⁸⁸ Mushihoro shoye, nture me niparuke mposhi nikwame dimuragho doye. ⁸⁹ Hompa, nkango doye dakarererapo; nkango doye datunda muwiru. ⁹⁰ Ano lihuguvaro lyoye lyagwaneka kudimuhoko nadintje: ove washita livhu, ntani vyakuhupako. ⁹¹ Kwanavintje vyakarapo kwakarerapo mukonda yoye, yira momo waghamba ghuhungami ghoye, kwanavintje vyakukarerango. ⁹² Ndi kashi mapangero ghoye, amendi nadongonoka pokare. ⁹³ Ame narumweshi kuvhurama mapangero ghoye, kupitira mwavo ame mbyo wantura niparuke. ⁹⁴ Ame ghoye, mpopere, omo nakushana mapangero ghoye. ⁹⁵ Varughanidona vawapayika kundjonaghurame, ano ngoli ame ngani shana kukwata lighano likukwatakano lyendi lyakughamba. ⁹⁶ Viwaperera navintje nakenga vyakara naghushayero; ano ngoli lirawire lyoye lyapitakanena ghunene. ⁹⁷ Oh ame omo nahora veta yoye! Lyalyo likutedo lyande liyuva nalintje. ⁹⁸ Dimuragho doye kuntura nikareme mukotoki kupitakana vanankore vande, ngoli dimuragho doye dado nkehepano name. ⁹⁹ Ame navikwata lighano mwamunene kupitakana vashongi vande navantje, ngoli ame kuteda likukwatakano lyoye lyankango. ¹⁰⁰ Ame navikwata lighano kupitakana ovo vakaro ghukondi name; mukondashi vino nakara navyo kwakwama marondoro ghoye. ¹⁰¹ Ame napungura mpadi dande kwankehe ndjira yaghudona mposhi ame nivhure kukwama nkango doye. ¹⁰² Ame narumweshi navhura kutunda kuruha rwoye ndi kulipongoko lyoye lyavighamba, olyo warondolireme. ¹⁰³ Ghayara ghutovali wankango doye kutundapo nadimakera, vyaghushiri, ghutovali kupitakana ghushi wampuka mukanwa kande! ¹⁰⁴ Kupitira mumarondoro ghoye ame naghupamo likengo pampepo; ano ngoli ame nanyenga ndjira yamapempa. ¹⁰⁵ Nkango doye ndjo ramba kumpadi dande naghukenu wamundjira yande. ¹⁰⁶ Ame naghanine ntani mbyo navikwatitako, mposhi ame ngani kengurure ghupongoki ghoye wavighamba. ¹⁰⁷ Ame vahepeka ghunene; mpungure nikare nimuyumi, Hompa, momo waviguvalite munkango yoye. ¹⁰⁸ Hompa, nakanderere tambura ndjambo yamaghoko-ghoko yamukanwa kande, ntani ntjongeme ghupongoki wakughamba. ¹⁰⁹ Liparu lyande nkehepano mulighoko lyande, ngoli narumweshi navhurama veta yoye. ¹¹⁰ Vadona vanteya virahame, ano ngoli ame narumweshi natunda kumarondoro ghoye. ¹¹¹ Ame natokora likukwatakano lyavighamba lyoye ghupingwa wande nanaruntje, morwa dado kuyita ruhafo kumutjima wande. ¹¹² Mutjima wande kwaghutura ghukare wakukwama mafano ghoye dogoro kughuhura nanaruntje. ¹¹³ Ame kwanyenga ovo vakaro nandunge mbiri, anongoli ame nahora veta yoye. ¹¹⁴ Ove livango lyaghuvandero wande nashikukandulito; ame nahuguvara munkango yoye. ¹¹⁵ Tundenuko kwandeme, anwe varughanidona, mposhi ame nikwameneko dimuragho daKarunga wande. ¹¹⁶ Mpakere mbilime munkango doye mposhi ame ngani paruke ntani kapi nganikare nashwaghuka mulighuguvaro lyande. ¹¹⁷ Mpakere mbilime, ntani ame ngani kara mulipopero; ame nkehepano ngani kuteda mafano ghoye. ¹¹⁸ Ove washwena navantje ovo vatundoko kumafano ghoye, morwa ovo vantu vavo kupukita ntani mwato lihuguvaro. ¹¹⁹ Ove waghupamo vadona navantje pantunda yalivhu yira mbambangiri; anongoli ame nahoro marawiro ghoye. ¹²⁰ Rutu rwande kukanka mughutjirwe koye, ntani ame ghoma kwaghupongoki ghoye wavighamba. ¹²¹ Ame kurughana vyaviwa naghuhunga; washa nkengererame kuvahepeki. ¹²² Tikitamo ghukanguki wamukareli ghoye; washa pulidira vanene vahepekeme. ¹²³ Mantjo ghanaroroka mukutaterera tupume liyoghoko lyoye ntani naghupongoki wankango doye. ¹²⁴ Negheda mukareli ghoye likukwatakano lyaghushiri-shiri, ntani ghuntjongeme mafano ghoye. ¹²⁵ Ame mukareli ghoye; neghede nikwatakane nakuyiva likukwatakano lyoye lyavighamba. ¹²⁶ Runo ndo ruvede Hompa Karunga gharughananga, shingi shavantu vatjora veta yoye. ¹²⁷ Vyaghushiri ame nahora dimuragho kupitakana ngorodo, kupitakana ngorodo yayiwa ghunene. ¹²⁸ Anongoli ame kutakamita mukukwama marondoro ghoye naghantje, ntani ame nanyenga nkehe ndjira yavipempa. ¹²⁹ Veta doye diwa ghunene, mbyongoli ame mbyo nadikwamenanga. ¹³⁰ Nkango doye dakusheweka kutapa ghukenu; dado kutapa ghuyive kwavo vadira kudeghura. ¹³¹ Ame kuyashameka kanwa kande nakughuda, ngoli ame kutatera dimuragho doye. ¹³² Pirukira kwande ntani ghumfere nkendame, momo tupu wavirughananga napantjeya kwavo vahoro lidina lyoye. ¹³³ Pirukita mpadi dande kukwama munkango doye; washa pulidira ndjo yimpangereme. ¹³⁴ Mangurureme nitunde kulihepeko lyavantu mposhi nivhure kukwama marondoro ghoye. ¹³⁵ Renka ngoli shishwi shoye shimoneke kwamukareli ghoye, ntani ntjongeme mafano ghoye. ¹³⁶ Dimukuro damaruntjodi kuwa kutundilira mumantjo ghande mukondashi vantu kapi vakwamanga veta yoye. ¹³⁷ Ove wapongoka, Hompa, ntani vighamba vyoye vyawapa. ¹³⁸ Ove wampire likukwatakano lyoye lyaghupongoki ntani lyamughushiri-shiri. ¹³⁹ Ghugara wandjonaghurame mukonda vanankore vande vavhurama nkango doye. ¹⁴⁰ Nkango doye vadisheteka ghunene, ntani mukareli ghoye ghadi hora. ¹⁴¹ Ame kwato mulyo nka vamvhurama, anongoli ame kapi navhurama marondoro ghoye. ¹⁴² Limanguruko lyoye lyakukarerapo mughuhunga, ntani veta yoye kuyihuguvara ghunene. ¹⁴³ Nampindi ruguvo natjutju yingwaneme, dimuragho doye nka shimpe kuhafita. ¹⁴⁴ Likukwatakano lyoye lyankango lyapongoka nanaruntje, mpeko ghuyivi mposhi name niparuke. ¹⁴⁵ Ame nalilire ghunene namutjima wande naghuntjeya, ''Ndimburureme Hompa, ame ngani kwama mafano ghoye. ¹⁴⁶ Ame nakuyita koye; mpopereme, ntani ame ngani kwamalikukwatakano lyoye lyamuvighamba,'' ¹⁴⁷ Ame narambuka muruvindwira yangurangura naliliri mbatero. Ame nahuguvara munkango doye. ¹⁴⁸ Mantjo ghande ghanapaghuka kumeho yamatiku nikengere likutjindjo mposhi nikutede munkando yoye. ¹⁴⁹ Yuva liywi lyande mulikwatakano lyoye lyaghushiri-shiri; nkungeme niparuke, Hompa, momo wavihuvalitire mulipongoko lyoye lyavighamba. ¹⁵⁰ Ovo vanakuhepekome kuna kuyanga kwande kadidi kadidi, anongoli vavo ghure vakara naveta yoye. ¹⁵¹ Ove pepi ghunakara, Hompa, ntani dimuragho doye nadintje nadihuguvara ghunene. ¹⁵² Mayuva ghamangi ghakapito ame nakurongire likukwatakano lyoye lyavighamba ovyo wavatuliramo nanaruntje. ¹⁵³ Kenga kulihepeko lyande ngoli ghumpopere nka, anongoli ame narumweshi nganivhurama veta yoye. ¹⁵⁴ Popera virughana vyande ntani ghundjoghoreme; ntakamite, yira moomo wavihuguvalita munkango yoye. ¹⁵⁵ Liyoghoko ghure lyakarera kuvantudona, morwashi vavo kapi vahora mafamo ghoye. ¹⁵⁶ Ove ghumunene mughufenkenda yavirughana vyoye, Karunga; nkunge nikare wamuyumi, yira momo wavirughananga napantje. ¹⁵⁷ Vahepeki vande navankorene vangi, ano ngoli ane narumweshi natunda kulikukwatakano lyoye lyavighamba. ¹⁵⁸ Ame opo nakenga ovo vadiro kupura moye kundjanyaghuka mukonda vavo kapi vakwamanga nkango doye. ¹⁵⁹ Kenga ngoli mo nahora lirondoro lyoye; mpopere nikare namonyo, Hompa, momo wavihuguvalitire mulikukwatakano lyoye lyamughushiri-shiri. ¹⁶⁰ Lishagharo lyankango doye ghushiri; nkehe ghuno wakupongoka muvighamba vyoye ngakarererapo nanaruntje. ¹⁶¹ Vanavavahompa vavakafumu kuhepekame nampindi kwato nadjono, anongoli mutjima wande wakarererapo kuhora nkango doye. ¹⁶² Ame kushamberera kunkango yoye yira ndjegho ghanawano ghupungwiro waghuwa. ¹⁶³ Ame nanyenga nkapi nahora vikwavipempa, anongoli ame nahora veta yoye. ¹⁶⁴ Ruvede ghambombiri muliyuva ame kukutanganga mukonda yaghupongoki wavighamba vyoye. ¹⁶⁵ Mpora yayinene vanakara nayo, ovo vahoro veta yoye; kwato vyakuvarenkita vapunduke. ¹⁶⁶ Ame nahuguvara muliyoghoko lyoye, Hompa, ntani ame kukwama dimuragho doye. ¹⁶⁷ Ame kukeverera marawiro ghoye, ntani ame nadihora ghunene. ¹⁶⁸ Ame kukwama marondoro namarawiro ghoye, ngoli ove wapukurukwa kwanavintje narughananga. ¹⁶⁹ Ndjuve omo nakulilira mbetero, Hompa; mpeme likwatolighano munkango yoye. ¹⁷⁰ Ngoli mukwafi ghamoneke kumeho ghuyave; mpopereme, momo wavihuguvalita munkango yoye. ¹⁷¹ Mpongolishi ngegho dande kurupwita litangango, ove kuntjongame mafano ghoye. ¹⁷² Renka ruraka rwande ruyimbe kuhamena nkango yoye, ngoli dimuragho doye nadintje dahungama. ¹⁷³ Ngoli lighoko lyoye limpopereme, ame nahororora marondoro ghoye. ¹⁷⁴ Ame nahora lipopero lyoye, ntani veta yoye ndjo nahafera. ¹⁷⁵ Nture ngolime niparuke nakutanganga ove, ntani ngoli ghupongoki ghoye wakughamba ghumbatereme. ¹⁷⁶ Ame narendarenda yira shindjwi shakukombana; shanangoli mukareli ghoye, ngoli ame kapi navhurama dimuragho doye.