¹ Tapenu mpandu kwaKarunga, ghuye muwa, kulikukukwatakano lyendi lya lihuguvaro lyakukarererapo naruntje. ² VaIsraeli vaghambeshi, ''mulikukwatakano lyalihuvaro lyakukarererapo naruntje. ³ Varuti vaKarunga navantje vaghambe ashi, ''likukwatakano lyamulihuvaro lyakukarererapo naruntje,'' ⁴ Navantje vakwami vendi Karunga vaghambe ashi, likukwatakano lyamulihuguvaro lyendi lyakukarererapo. ⁵ Muliguvo lyande ame kukugha Karunga; Karunga ndimburure ghumangururo, ⁶ Karunga kumwe name anakara; nakuhepankashi kutjira vinke ovyo anduwana muntu. ⁷ Karunga kukwande anahamene ndjemupopeli wande; ngani mona vanankore yande vanaghu. ⁸ Vyahungama vyakukara mumundulye waKarunga ndimulihuguvaro kupitakana kutura lihuguvaro mwamuntu. ⁹ Vyahungama vyahuguvara Hompa, kupitakana mukutura lihuguvaro muvantu. ¹⁰ Virongo navintje vina nkundurukida; mulidina lyaHompa ngani vahanaghurapo. ¹¹ Vanankundurukida; Nhii, vanankundurukida mulidina lyaHompa nganivahanaghurapo. ¹² Vanankundurukida yira mpuka; ngavadongonokapo yira ntjontjo dakupya kumundiro. ¹³ Vavo kundimbyuka vangande, ngoli Karunga kumpopera. ¹⁴ Karunga ndje nkondodande naruhafo rwande, ghuyendje ndje mupopeli wande. ¹⁵ Liywi lyakuyiyira kuruhafo nalifundo kuna kuliyuvha mumbaraka yavapuli: Livoko lyarulyo lyaKarunga ndyo winarughano. ¹⁶ Livoko lyarulyo lyaKarunga linayita lifundo, livoko lyaKarunga lyarulyo linafundu vita. ¹⁷ Kapi nganifa, nganiparuka nakutanga virughana vyaKarunga. ¹⁸ Karunga ngandeghura pamaruvede ghamwe; ngoli kapi ngatapa mumaghoko ghamfa. ¹⁹ Ngarwirenu marunga vero ghavapuli, ngani ngenamo kumwe nakutapa pandu kwaKarunga. ²⁰ Oli ndyo lirunga vero lyahompa; vapuli kungena kupitira mulyo. ²¹ Ngani tapa pandu kukoye, kulilimbururo lyande, ntani mbyo nayakara liyovo lyande. ²² Liwe olyo vashuvere vadika ndyo lyakwato kankotya. ²³ Vino mbyo virughana vyaKarunga; vyo vitetu mantjo ghetu. ²⁴ Lino ndyo liyuva olyo Hompa ngalimburura; Atwe ngatuhafa nakupembura mulyo. ²⁵ Tunakanderere, Hompa, Tupe litundo! tunakanderere, Hompa tupe litikiliromo! ²⁶ Walirago ndjogho anakuyo mulidina lyaKarunga, kutumutungika mundjo ghoyaHompa. ²⁷ Karunga ndje Hompa, ghuye atupa ghukenu; shimbenu dimutavi mukundurukide shidjambero, ²⁸ Ove Karunga wande, ngani tapa mpandu kukoye ove Karunga wande, ngani kuyererepeka. ²⁹ Aye, tapenu mpandu kwaKarunga; ghuye muwa; kulikukwatakano lyalihuguvaro lyendi lyakukarererapo naruntje.