¹ Makura hompa Darius atapa lirawiro vashane mu mavango ogho kava tulikanga maumbangi gha mulyo mu Babyloni. ² Mu nkuru mbara ya mu Ecbatana yo vakunganga yakaro mushirongo sha Mediya mo vawanine mbapira ya lidingo lya matjangwa; omo mwakaliro litjangururo lino: ³ "Mu mwaka wakuhova walipangero lya hompa Sayiresi, Sayiresi kwapangire ashi ntembeli ya Karunga mu Jerusalem vayi wapukurure yikare livega lyakudjambera ndjambo, litateko lya ntembeli va litateke weno; muna ure wayo metera di murongo mbiri na ntambiri ntani mukapatji kayo namo nka mushikwavo, ⁴ likare na dimukweyo ntatu damawe gha manene, ano mukweyo ghumwe wangundi dadipe,mfuto yayo ngayi tunde mumbara ya hompa. ⁵ Vininke navintje vya ngorodo na siliveri ovyo vya hameno mu ntembeli ya Karunga, ovi aghupire Nebuchadnezzar mu ntembeli ya mu Jerusalem avi tware ku Babyloni vavivyute vikakare mu ntembeli ya mu Jerusalem. Vikare pamavega ghavyo." ⁶ Makura Darius amu limburura vino; Kwa Tattenai,mupangeli wa Utokero wa Mukuro Wa Euphrates, Shethar-Bozenai, ntani na marenga vaunyenu mu shirongo sha Utokero wa Mukuro wa Euphrates, kuporenuko ku ntembeli! ⁷ Shuvenu viruwana vyo yino ntembeli ya Karunga pa pantjavyo. Mupangeli wa Juda na matimbi ghendi ngavadika ntembeli yino ya Karunga palivango linya. ⁸ Ame kuna kumuurawira shi mu kwafe mbatero ku matimbi gha Juda opo vana kuwapukurura ntembeli yino ya Karunga: Mfuto yavo kuyitunda muvimaliva vya hompa vitunde mumutero waku Utokero wa Mukuro wa Euphrates morwa viruwana vidire kushaya shikatji. ⁹ Kehe vino vina pumbwo-yira vi ntwedu ghona,vikungwe, ndi ndjwi ghona vya ndjambo dakushwakerera kwa Karunga wa kuwiru, ntanga, mungwa, vinyu, ndi maghadi kutwara kulirawiro lyava pristeri mu Jerusalem-tapenu vininke vino kwavo kehe liyuva pahana kukara maderaghano. ¹⁰ Ntjene muviruwana vino vavo ngava tapa ndjambo odo ngatambura Karunga wakuwiru ntani ngava raperera shi Karunga nga nkandayike navana vande va vakafumu. ¹¹ Mbyo nka nakutapa lirawiro ashi kehe uno anakudiro kulimburukwa kumpangero yino, ngavadura ngundi mundjuwo yendi kumwe nakuyimutwa. Ano mundi wendi makura nga vaurenke ngaukare nda ya hando mukonda yevi. ¹² Karunga owo ahoroghoro Jerusalem yikare livango lya kumutongamenena, ndi ahanaurepo hompa ndi muhoko ogho unashano udjone mpangero yino ndi kuhanaura yo ntembeli. Ame Darius ame natapo mpangero yino. Ngoli munahepa kuyilimburukwa nawa-nawa ntani. ¹³ Makura mupangeli Tattenai wa Shirongo sha Utokero wa Mukuro wa Euphrates, Shethar-Bozenai navaunyavo, avaruwana nawa-nawa momo ava rawilire hompa Darius. ¹⁴ Matimbi ghava Juda kwayendire nawa kumeho mulitungo lya ntembeli kupitira mu makorangedo ghavaporofete vano vaviri va Haggai na Sakariya, vamu lira lya Iddo. Ava mana kudika ntembeli moomu avapangelire Karunga wa Israel ntani na veta ya Sayires, Darius ntani na Artaxerxes hompa wa Persia. ¹⁵ Ntembeli yino kwa pwire kuyidika muliyuva lyautatu lyamwedi wa Adar, mumwaka wauntayimwe walipangero lya hompa Darius. ¹⁶ Mbunga ya Israel, va pristeri, va Levi, navamwe ovo vakatundiro kuupika ava dana shipito shalipongoro lya ntembeli ya Karunga na ruhafo. ¹⁷ Palipongoro lya ntembeli vavo kwa djambirepo ntwedu lifere, vikungwe mafere maviri, ntani ndjwi ghona mafere mane vyashipito sha ntembeli ya Karunga. Vimpendje murongo na viviri vya ndjambo ya ndjo dava Israel navantje, kehe uno shimwe kutwara mushivaro sha lira lya Israel. ¹⁸ Vavo ava tura nka Pristeri nava Levi mu makukwamo gha viruwana vya ntembeli mu Jerusalem, Yira momo vavitjanga mu mbapira ya Moses. ¹⁹ Vantu vo vakavyukiro kuupika ava dana shipito sha Paska mu mayuva murongo nama ne ghamwedi wakuhova. ²⁰ Vapristeri nava Levi ava kukushurura naumwavo; navantje avakene. Makura avadipaya vimuna vya Paska vadjambe vantu ovo vakavyukiro kuupika, kupakako na naumwavo. ²¹ Vantu va Israel ovo valiro ndjambo ya Paska kwa kalire mbovo va kavyukiro kuupika nka ovo vakombiro ndjira daupagani davantu ovo vakaliro mushirongo ovo vayiro va ya tongamene Hompa, Karunga wa Israel. ²² Vavo kwa danine nka Shipto sha Mboroto yakupira vishashito mayuva nta mbiri, vavo kwa hafire unene morwa Hompa kwa renkire hompa wa Assyria a vakenge na mantjo ghamawa ava kwafe mu viruwana vyavo vya kuwapukurura ntembeli ya Karunga, Karunga wa Israel.