¹ Nambano ove, muna uandje, opu ua soku zeuparisiua mo tjari tji tjiri mu Kristu Jesu. ² Nu o vina mbi mbi ua zuvire muami mokati ko zohatoi o zengi, imbio o mbi ua soku honga mo vandu o vatakame mbu mave jenene oku honga o vakuao uina. ³ Nu ove opu ua soku nanena pena uami mo uzeu tjimuna o musorondate ua Kristu. ⁴ Kapena musorondate ngu karera hinda ame rikende no vina vio uje mbui, oku tjitira kutja a tjate ku ingui ngue mu toorora kutja a rire o musorondate. ⁵ Nu uina o mundu auhe ngu ma zeri oku tona mo manjando, ka peua o utoni andu tja kondjo otja ko zoveta zo manjando ngo. ⁶ O una hepero kutja o mukune ngu ungura ua soku rira o mutenga oku rumata o vihape. ⁷ Ripura na imbi mbi me hungire, orondu Muhona me kupe o mapangununino mo vina avihe. ⁸ Zemburuka Jesu Kristu, ingui o uo ndui ja David, ua pendurua mo vati. Nu itji otja ko Mbuze o Mbua ndji mbi zuvarisa, ⁹ ndji mbi ihamisirua nga ko mapando tjimuna o muzunde. Nunguari Embo ra Muhona oro ka ripandekerue. ¹⁰ Opu mbiza oku tjinda o vina avihe mo tjimbe tjo vatoororua, kutja ovo uina ve jakure o ndjamo mu Kristu Jesu, pueena o ujere ua aruhe. ¹¹ Orondu etakame indi embo ndi maritja: "ete tji tua ta pueena Je, uina matu kara no muinjo pueena Je. ¹² Tji tua nanene mo miihamo, ete uina matu honapara pueena Je. Nu tji tue mu ripatana, Eje uina Me tu ripatana. ¹³ Tji tu hina ku itavera, Eje ma kara o mutakame, orondu eje kanaa jenene oku ripatana ko." ¹⁴ kara po ku ve zemburukisa o vina mbi. Vetia po murungu ua Mukuru kutja ave ha pose okuza po mambo; ouo kaena tji mae vatere nu ouo ma je pukisa imba o vapuratene. ¹⁵ Rihonga kutja u ri raise ku Mukuru au ri o mutoororua, o muungure ngu hina hepero jo ku tohoni, ngu honga embo ro uatjiri osemba. ¹⁶ Nunguari sembura o mambo o mungandjo uo viporoporo, ouo tjinga je uezira ko o urunde. ¹⁷ Nu o mambo uao je kaondja o tjo mutjise uo njota imbui uo kangera. Vemue vao oo Himeneus na Filetus, ¹⁸ ovo mba jepa mo uatjiri. Tji vetja o mbendukiro ja kara po hapo, nu mo muano mbui ave vandeke o ngamburiro ja tjiva ¹⁹ Nunguari, o mazikameno ua Mukuru ja Kurama no masa. Ouo je na o tjiromba tji, "Muhona u tjiua imba mbe ri o Ve" nu "Auhe ngu ma isana ena ra Kristu nga hanike no urunde." ²⁰ Nunguari mo ndjiuo o nene kamuna vitjuma vio ngoldo no silveri uriri. Nu uina muna o vio rukune no viehi. Tjiva via imbi vi ungurisiua o ku jozika, na tjiva uina mbi he ri o vio ndjozikiro. ²¹ Nu auhe ngu me rikohorora ku imbi mbi ha jozike, ma rire o tjitjuma tji ma tjiungurisirua ko ndjozikiro. Ma rire tjitja haniua mo vikuao, nu tji tja puira oku ungiriua ijo Muini, tji tja tuninua o tjiungura o tjiua atjihe. ²² Nunguari taurira kokure no zonduma zo umutanda. Ove ramanga o usemba, o ngamburiro, o rusuvero, no hange pueena imba mbe kua ku Muhona oku za mo mutima o mukohoke. ²³ Nunguari panda o mapurira uo ujova nge hina ndjiviro. Orondu tjinga amo tjiua kutja je uta o viposa. ²⁴ Nu o mukarere ua Muhona ka sere oku posa. Neye ua soku kara no upore ku avehe, o muhonge ngua pua, nguno muretima, ²⁵ Ngu jenena oku honga imba mbu mave mu pirukire mo ukozu. Kutja nani Mukuru rumue me vepe kutja ve riverere o mauvi uao ko ndanaukiro oku jakura o uatjiri. ²⁶ Kutja ve rikuture o veni mo nguehe jo munauvi, imba mba kamburua ije mo mbango je.