¹ Tareje o ngaro jo rusuvero ingui Tate ndua jandjere kuete, kutja tu isaneue o vanatje va Mukuru,Nu itjo o tji tere otjo.Nu nao, O uje opu u ha zu ok utu tjiua, orundo kapena pu va tjivirue uina. ² Vasuverua, nambano o uete o vanatje va Mukuru, nungunda kape ja raisiua kutja matu je ku kara vi. Nunguari matu tjiua kutja Eje tji mee ku vandururua, ete matu je ku kara tjimuna Je, ete tjinga ama tu je ku mu muna otja tjinga ae ri. ³ Nu o mundu auhe ngu na o maundjiro nga mu Je, u ri kohorora muini, tjimuna Eje tje ri o mukohoke. ⁴ Auhe ngu hupira moku tjita o uvi, uina u hupira moku katuka ko veta, o uvi tjinga a uri o makatukiro uo veta. ⁵ Nu mamu tjiua kutja Kriste ua vandururirua kutja a tuare o mauvi uetu, nu mu Je kamuna o uvi. ⁶ Nu auhe ngu kara mu Je ka tjiti o uvi, auhe ngu tjitao uvi ken ape Mu muine poo oku tjiua Je. ⁷ Vanatje, ape ningi ngu me mu pukisa. Ingui ngu tjita o usemba o musemba, tjimuna Kriste tje ri o musemba. ⁸ Ingui ngu kara poku tjita o uvi o uo Munauvi, o Munauvi tjinga a karere poku tjita o uvi oku za ko mbutiro. Ezeva indi o Muna ua Mukuru o nda vandururirua, oku njona o viungura vio Munauvi. ⁹ Auhe ngua kuatua oku za ku Mukuru ka tjiti o uvi, orondu o ndui ja Mukuru ja seua mu je, nu ope ha jenenene oku tjita o uvi, eje tjinga a kuatua oku za ku Mukuru. ¹⁰ Mu itji o vanatje va Mukuru otji ve raisiua, no vanatje vo Munauvi: Auhe ngu ha kara poku tjita o usemba ka ua Mukuru, na ingui ngu hina ku suvera o muangu poo erumbi re uina. ¹¹ Orondu indji ojo o mbuze ndji mua zuvire oku za ko mbutiro, kutja tua soku suverasana, ¹² Ae he ri otja Kain ngua ri o ua ingui o murunde, na zepa o muangu ue. Nu ue mu zepira tjike? Mo kutja o vitjitua vie o muini via ri o vio urunde, nunguari o vitjitua vio muangu ue via ri o visemba. ¹³ Amu himua, vakuetu, o uje tji mau mu njengua. ¹⁴ Ete matu tjiua kutja tua kapita ko muinjo oku za ko ndiro, ete tjinga a tua suvera o vakambure. Ingui ngu ha suverere o muangu poo erumbi re u kara mo ndiro. ¹⁵ Auhe ngu ma njengua o muangu poo e rumba re o muzepe uo vandu. Nu mamu tjiua kutja kapena muzepe uo vandu ngu na o muinjo uaaruhe mbua tura mu je. ¹⁶ Mu itji tu tjiua o rusuvero,orondu Kriste tjinga a jandjera ete o muinjo Ue. Nu ete uina tua soku jandjera o vakuetu o minjo vietu. ¹⁷ Nunguari auhe ngu na o rutumbo ruo uje mbui, nu a munu o mukuao ae na o uhepe, nu a jezere o tjari tjo mutima ue ku je, tjandji o rusuvero rua Mukuru ru kara vi mu je? ¹⁸ Vanatje vandje, atu suvere mo mambo poo meraka uriri, nunguari mo vitjitua na mo uatjiri. ¹⁹ Nu mu itji o mu ma tu je ku tjivirua kutja o uete o vo uatjiri, nu atu zikamisa o mitima vietu po murungu Ue. ²⁰ Kutja o mitima vietu tji ma vi tu pangura, Mukuru o munene po mitima vietu nu U tjiua o vina avihe. ²¹ Vasuverua, o mitima vietu tji vi hina ku tu pangura, ete otji ma tu kara nokuhina mburuma ku Mukuru. ²² Nu atjihe tji ma tu ningire tu jakura ku Je, orondu tu takamisa o matuako Ue, nu tu tjita o vina mbi mbi tjata mo meho Ue. ²³ Nu indi oro etuako Re, kutja ete tu itavere mena ro Muna Ue Jesu Kriste, noku suverasana, otja indi Tje tu pa e tuako. ²⁴ Nu ingui ngu takamisa o matuako Ue u kara mu Je, nu Eje u kara mu je. Nu ete tu tjiua na itji kutja Eje u kara muete, na indji o Mbepo Eje ndja jandja ku ete.