¹ Vanatje, Me mu tjangere o vina mbi kutja amu ha katuka. Nu o mundu auhe tja katuka, tu na o Muhingirirepo o hongora, ngu ri pueena ingui Tate, Jesu Kriste, ingui o musemba. ² Eje ku Je o muni o nguri o tjisuta o hunga no mauvi uetu, nu ae he ri inga o uetu poruao, nunguari na inga o uo uje auhe. ³ Nu tu tjiua na itji kutja ete tue mu tjiua, indi tji matu tamakisa o matuako Ue. ⁴ Ingui ngu ma tja ''ami mbe tjiua Mukuru''nunguari a ha takamisa o matuako Ue, o munavizeze nu o uatjiri ka u mo mu je. ⁵ Nunguari ingui auhe ngu ma takamisa Embo Re, tjiri mu ingui o rusuvero rua Muhona rua puisiua. Ete tu tjiua na itji kutja tu ri mu Je. ⁶ Ingui ngu ma tja ua tura mu Mukuru, eje o muini uina ua soku kaenda otja Eje tji ja kaenda. ⁷ Vakuetu, hina ku mu tjangera etuako epe, nunguari e tuako e kuru ndi mua karere naro oku za ko mbutiro. E tuako indi e kuru oro indi e Mbo ndi mua zuvire oku za ko mbutiro. ⁸ Rukuao me tjangere ene e tuako epe, ndi ri o uatjiri mu Kriste na mu ene, orondu o ndorera ma i kapita, nu o ndjerera ja katjiri nambano ja jere. ⁹ Ingui ngu ma tja u ri mo ndjerera nu a njengua o muangu poo erumbi re ngunda u ri mo ndorera. ¹⁰ Ingui ngua suvera o muangu poo erumbi re, ua tura mo ndjerera nu ka pena tjiputarise mu je. ¹¹ Nunguari ingui ngu njengua o muangu poo erumbi re u rim o ndorera, nu u kaenda mo ndorera, nu ke na ku tjiua ku mai, o ndorera tjinga a je mu potuparisa ¹² Me tjangere ene, vanatje, ourundu ene tjinga a mua jesirua o mauvi uenu mo tjimbe tje na Re. ¹³ Nu me tjangere ene, imba oo tate, ene tjinga a mue Mu tjivirue oku za ko mbutiro. Me tjangere ene, varumendu o mitandona, orondu ene mua taara ingui o murunde. Me tjangere ene Vanatje, ene tjinga a mua tjiua ingui Tate. ¹⁴ Me tjangere ene, imba oo tate, ene tjinga a mua tjivirue ingui ngua zire ko mbutiro. Mba tjangera ene varumendu o mitandona, ene tjinga amu ingui o murunde. ¹⁵ Amu suvere o uje,poo o vina mbi ri mo uje. Auhe ngu ma suvere o uje, tjandji o rusuvero rua ingui Tate ka rumo mu je, ¹⁶ Orondu o vina vihe mbi mbi ri mo uje, o zonduma zo njama, o zonduma zo meho, no meritongamisiro uo hupo, ka via ingui Tate, nunguari o vio uje. ¹⁷ Nu o uje ma u kapita, pueena o zonduma za uo, nunguari ingui ngu tjita o mbango ja Mukuru u karerera. ¹⁸ Vanatje, o iri jo maandero. Nu otja indi tji mua zuva kutja o mupirukirakriste me ja, o vapirukirakriste o vengi otji va munika; oputu tjivirua kutja ojo o irir jo maandero. ¹⁹ Va pitire muete a vei, nunguari ka va ri o vetu; orondu andaku va ri o vetu, andaku va karerera pueena ete. Nunguari ovo va pita muete nu a vei kutja ve tjiukisiue kutja avehe ka tji va ri o vetu. ²⁰ Nunguari ene muna o masoporero ua Ingui o Mujapuke, nu ene mu tjiua o vina avihe. ²¹ Hi tjangerere ene mo kutja ka mu tjia o uatjiri, nunguari o mena ro kutja mu u tjiua, nu mu tjiua kutja kapena tjizeze tji tjiri otjo uatjiri. ²² O munavizeze o uani, tje he ri ingui ngu patina kutja Jesu o ngu ri Kriste? Eje o ngu ri o mupirurakriste, ngu ma patina ingui Tate na no Muna. ²³ O mundu auhe ngu ma patina o Muna kena ingui Tate uina: nunguari ingui ngu ma hongonona o Muna u na ingui Tate uina. ²⁴ Nu ene,itji tji mua zuvire oku za ko mbutiro, opu tja soku tura muene. Itji tji mua zuvire oku za ko mbutiro tji tja tura muene, ene mamu tura mu ingui o Muna na ingui Tate. ²⁵ Nu inga ouo o makuizikiro nga kuizikira ete: o muinjo uaaruhe. ²⁶ Mba tjangererere ene o vina mbi o hunga na imba mbe mu pukisa. ²⁷ Nunguari o masoporero ngu mua jakurire oku za ku Je ja tura muene, nu ka muna ku hepa o mundu oku mu honga. Nunguari o masoporero Ue je honga ene o hunga no vina avihe, nu o uatjiri, nu ka vizeze, nu otja indi Eje tje mu honga kareje mu Je. ²⁸ Nu nambano, vanatje, kareje mu Je, kutja Eje tji ma vandururua, ete tu kare no uvande nu atu ha zepaisiua o honi po murungu Ue, mo meero Ue. ²⁹ Tji mamu tjiua kutja Eje o musemba, mamu tjiua kutja auhe ngu tjita o usemba ua kuatua oku za mu Je.