¹ Itji tji tja ri ko oku za ko mbutiro-tji tua zuvire, tji tua muine no meho uetu, tji tua tarere mo, nu o make utu tji ja kamburire, itji o tje Mbo ro muinjo; ² Orondu o muinjo ua raisirue nu ete tue u muine, nu tu na o uhatoi, nu ma tu raisa kuene o muinjo uaaruhe mbui, imbui mbua ri pueena ingui Tate, nu mbua raisiua kuete. ³ Itji ete tji tua muine noku zuva matu hongonona kuene, kutja ene uina mu kare no ruuano kueena ete: nu tjiri indui o ruuano ruetu o rua kueena ingui Tate, no Muna Ue Jesu Kriste. ⁴ Nu o vina mbi matu tjangere ene, kutja o ndjoroka jenu i urisiue. ⁵ Nu inga vari ouo o mambo ngu tua zuva mu Je, nu ngu matu hongonona kuene, kutja Mukuru o ndjerera, nu mu Je ka muna ndorera nangarire. ⁶ Tji ma tu tja tuna o ruuano kueena Je, nu atu kaenda mo ndorera, matu kora o vizeze, nu ka tu tjiti o uatjiri. ⁷ Nunguari tji matu kaenda mondjerera, otja indi eje tjeri mondjerera, matu kara noruuano kumue, nu ombindu ja Jesu omuna Ue mai tu kohorora kouvi auhe. ⁸ Tji matu ri hee kutja ka tuna uvi, matu riuovisa o veni, nu o uatjiri ka u ri muete. ⁹ Nu tji tua hepura o mauvi uetu, Eje o mutakame nu o musemba, ok utu jesira o mauvi uetu, noku tu kohorora ko mauhasemba ajehe. ¹⁰ Tji tua tja ete katu katukire, matu mu ririsa o munavizeze, nu e Mbo Re ka riri muete.