¹ Saulo taba ri akuedo kú muette sí. Asina ke ese ría a kumensá persekusió ngande endi kondla ri ilesia ke taba endi Jerusalén; i má gende ke a krée ke taba tó regao pó má regió ri Judea y Samaria, juela ri má apóstoles. ² Ombe reboto a entelá a Esteban i asé lamentasió pó éle. ³ Poro Saulo asé daño ngande a ilesia; éle a lendrá possá pó possá i a echá ajuela a má ombe i muhé, a ponelo endi tramakuá. ⁴ Aunke, má gende ke a krée ke abiá sido regao, ané a bae predikando palabra. ⁵ Felipe a bajá a suirá ri Samaria i chitiá ri Kristo. ⁶ Kuandi un chochá ri jende a kuchá i guatiá má señá ke Felipe asé, ané jundo a pretá tañio a lo ke éle a chitiá. ⁷ Pokke ri chochá ri jende ke a tenelo, epiritu puekisusio a salí juela miendla a gritá a ngande nbó ; i chochá ri jende ke taba tieso i koja sendá kulaó. ⁸ i abé chochá chuchumeko endi suirá. ⁹ Poro abía un ombe endi suirá ñamao Simón, kié endi tiembo trá taba asé mánkisi; éle a teneba tiembo ke aseba ndá miero a má jende ri Samaria, miendla a reklamá sé un jende kú fatikó. ¹⁰ Tó má Samaritanos, denje má jende chirindinga ata má jende ngande, a palá tañio a éle. Ané a chitiá. "É ombe sendá é kutú ri Rioso kuá sendá ñamao Ngande." ¹¹ Ané a kuchá, pokke a kelá enkantao pó un chochá ri tiembbo kú maákisi sí. ¹² Poro kuandi ané a krée lo ke Felipe preriká asekka ri ebangelio ke a petesé a Reino ri Rioso u nombe ri Jesukristo, ané güe bautisao, tanto kumo ombe i muhé. ¹³ Simón memo tambié a krée. Repué ke éle güe bautisao, éle a siguí kú Felipe; kuandi éle a guatia señá i makaneo kú kutú ke tá asé, éle a kelá enkantao. ¹⁴ Aora kuandí má apóstoles endi Jerusalén a kuchá ke Samaria abia lesibió palabra ri Rioso, ané a mandá a Pedro i Juan. ¹⁵ Kuandí Pedro i Juan a yegá a Samaria, ané a orá pó ané, pa ke ané lesibí a Epiritu Sando. ¹⁶ Pokke ata é tiembo, Epiritu Sando nú abia benió pó ensima ri nigguno ri ané; ané taba bautisao endi nombe ri Ño Jesús. ¹⁷ Antonse Pedro i Juan a poné mano pó ensima ri ané, i ané a lesibí a Epiritu Sando. ¹⁸ Aora, kuandi Simón a guatiá ke Epiritu Sando güe ndao a má gende kumo lesultao ri mandao ri mano ri má apóstoles, elé a ofresé a ané burú. ¹⁹ Éle a chitía: " Ndá mí kutú tambié, ke kuakiera pó ensima ri kié a poné má mano sí, a polé lesibí Epiritu Sando." ²⁰ Poro Pedro a chitía. "Ke bo i burú sí sendá debaratao, pokke bo a tratá ri tené a Rioso kú burú. ²¹ Bo nú tené patte ni pattasipasió endi é kusa, pokke kolasó sí nú sendá retto kú Rioso. ²² Pó tando, arrepentí ri é maldá ri bo, i orá a Ño, pa ke Éle polé peddoná pó pensá nú kaiko ri kolasó sí. ²³ Pokke a güatía ke bo tá endi beneno i sendá eklabo ri reseo ri asé mal." ²⁴ Simón a lepondé i chitiá. "Oren a Ño pó i, ke nigguna ri é kusa ri kuá enú a chitiá a pasá mí. " ²⁵ Kuandi Pedro i Pablo taba chitiá ri palabra ri Ño, ané a bobbé a Jerusalén. Endi kaddume, ané a preriká ebangelio a un chochá ri Billas ri má Samaritanos. ²⁶ Aora un angek ri Ño a chitía a Felipe i a chitía " Lebandá i güatía pa sur, pa kaddume ke a miní ri Jerusalén a Gasa." ( É kaddume tá endi resietto.) ²⁷ Elé a lebandá i bae, endi kaddume a kunosé un ombe ri Etiopía, elé sendá impottante pokke a kuilá tó fondo pa reina ru Etiopía. Elé a miní ri Jerusalén pa adorá. ²⁸ Éle a bobbé sendao endi karro sí i taba le i ri libro ri profeta Isaías. ²⁹ Epiritu a chitiá a Felipe: Bae pá ayá i asekká é kusa endi ané bae ." ³⁰ Antonse Felipe a kolé pa andi éle tá, i a kuchá a éle lé a chakero ri Rioso Isaías, i a chitiá: ¿"Bo a entendé lo ke tá lé?" ³¹ Etíope a chitiá: ."¿Kumo polé, o aguié tené ke guiá mí?." Éle a rogá a Felipe pa subí aí é kusa endi ané bae i sentá kú éle. ³² Aora lo ke tá chitiá endi ekritura kuá Etíope taba lé sendá : "ÉLE GÜE YEBAO KÚ OBEJA PA PARAJE RI MUETTE; I KUMO KORDERO PÓ LANDE RI JENDE KE KOTÁ KABEO A KACHÁ BOKA, ÉLE NÚ ABRÍ BOKA SÍ. ³³ ENDI UMIYASIÓ, JUISIO RI ÉLE ASÉ KITAÓ: KIÉ A CHITIÁ GENELASIÓ SI? POKKE MBILA SÍ ASÉ KITÁ RI TIELA." ³⁴ Antonce ombe kapao a prundá a Felipe i chitiá: " Rogá a bo. ¿ ri kié a chitiá chakero ri Rioso? ¿Ri ele memo, o ri agguna uto jende? ³⁵ Felipe a kumensá a chitiá; Éle a empesá kú é ekritura endi Isaías pa preriká asekka ri Jesús. ³⁶ Miendla ané bae pó kaddume, ané a yegá a apú; ombe kapao a chitiá: ."Miná, akí abé apú, ¿ke a tá evitá mí sé bautisao? ³⁷ Felipe a chitiá. ." Si bo a krée kú tó kolasó, polé sé bautisao.". Etíope a lepondé: ."I krée ke Jesukristo sendá Moná ri RIoso.." ³⁸ Antose Etíope a mandá a aguantá é kusa endi ané bae. Ané a meté endi apú, Felipe y ombe kapao, i Felipe a bautisá a éle. ³⁹ Kuandi ané a salií ri apú, Epiritu ri Ño a yebá a Felipe, ombe kapao a guatialo má nú, i a bae pó kaddume sí kú jarochería. ⁴⁰ Poro Felipe apalesé kú goppe. Éle a pasá pó é legió i a preriká ebangelio endi tó suirá, ata ke a yegá a Sesarea.