¹ Pokke enú memo, a sabé,numano, ke suto a yegá a enú nú jüe pó eggutto, ² Enú a sabé ke suto a sufrí i sé tratao kumo gende sin pondonó aí Filipo. Poro suto sendá capá endi Rioso chitiá a enú ebangelio ri Rioso endi merio ri u n chochá ri pleito. ³ Suto tá essotá nú pó ekibokasió, ni pó impuresa, ni pó engañifá. ⁴ Si nú ke, suto sendá aprobao pó Rioso pa ndá suto konfiansa endi ebangelio, pó e kusa suto tá chitiá, nú pó komplasé ninggú ombe, si nú pa komplasé Rioso. Éle sendá lo ke guatía kolasó suto. ⁵ Ya ke suto asé chitiá ninggú palabra sinsiribí kumo enú sabé, ni kú pretetto pa korisiá, Rioso sendá perito suto. ⁶ Ni suto tá prokurá pó ngloria umana, ni ri enú ni ri uto, suto poleba reklamá pribiñegio kumo apóstoles ri Kristo. ⁷ Suto lo ke jüeba tienno pa enú kumo mae lo ke sé konsolá monasito sí. ⁸ Asina suto tén afetto pó enú. Suto tá agreresió ri kompatí ke enú, ebangelio ri Rioso kú mbila suto. Pué enú a sendá noronguia pa suto. ⁹ Enú tén ke kolá numano tó makaneo ke bilante lo ke suto asé, suto a makania pó ría i pó oskurana, pá nú sendá kagga pa enú, mmendla suto prerikaba ebangelio ri Rioso. ¹⁰ Enú sendá perito, i Rioso tambié, ri kumo suto aportá kú enú má kreyente ri un fomms, santa, juta, i sin akusá. ¹¹ Ri memo fomma, enú a sabé ke suto a esottá i animá a tó enú kumo tatá tá asé kú má moná ri éle ¹² suto a testefiká ke enú ke jarriá ri un fomma ke onre a Rioso, kié a ñamá a enú pa reino ri éle ri ngloria. ¹³ Pó e kusa suto ndá nglasia a Rioso tó tiembo, pokke kuandi enú a resibí rekao ri Rioso ke a kuchá ri suto, enú a asettá nú kumo palabra ri gende sí nú, a resibilo kumo sendá ri belá belá má palabra ri Rioso. E sendá má palabra ke tanbié asé makaniá lendro ri enú lo ke a kreé. ¹⁴ Pokke enú, numano, a kombettí andi imitaore ri ilesia ri Rioso ke tpa aí judea endi Kristo Jesús. Enú tanbié a kongojá kú má memo kusa ri má propia jende suto, kumo ané sendá akonjokao ri má judio. ¹⁵ Jueba má judio lo ke a matá Ño Jesús i má chakero ri Rioso. jueba má judio kiene a saká suto, Ané agradá Rioso nú. Si nú ke má gende nú ngutá ri ané. ¹⁶ Ané kelé nú pa suto chitiá kú ma gentile pa enú sabbá. Pa siguí kú má pekaro endi fín irá ri Rioso a miní andi ané. ¹⁷ Tó suto numano, sendá aparteí ri enú pó un chito ri tiembo, aí plesensia, nú ri kolasó, suto asé lo mejó pó güatía rostro ri enú. ¹⁸ Pokke suto a kelé miní pa endi enú. i Pablo a intentá una i uto má, poro Satanás a impirilo. ¹⁹ Pokke ¿Kúa sendá konfiansa ri suto pa futuro, o chuchumeko o korona ri ngloria, ri lande ri Ño Jesús kuandi e a miní? ¿ Nú sendá enú kumo má uto? ²⁰ Pokke enú sendá ngloria i chuchumeko suto.