¹ Alendá to ma karusiano endi to enú, I, lo ke sendá karusiano lo memo i perito ri sufrimiendo de Kristo, lo ke tambié sendá patté ri chucumeko ri lo ke tán rebelá. ² Po tando, i tán alendá enú, karusiano, atendé kuagro ri Rioso ke tá ku enú. Kuirá ri ané, nú pokke sendá kaggo, si nú kelelo aselo, ri akkuedo ri Rioso. Miná po ané, nú po gurú, poro ku bolundá. ³ Nú pottá ku kakanmajan ku ma uto jende, enú ten ke se ejemplo pa ma kuagro. ⁴ Kuandi ma Pasto primero rebelá, kujé ma korona ri nglasia ke enú polebá rejá nú. ⁵ Ri memo fomma, enú ombe majaná, someté ombe ma karuasiano. To enú ten ke embobbé ri umiddá i enú ten ke yula enú memo, pokke Rioso poleba aguanddá ma petulante, Éle sendá glasia a to jende ku repeto. ⁶ Po tando enú ten ke tá bajo mano ku kutú ri Rioso pa ke Éle poleba motrá enú endi tiembo éle. ⁷ Poné fé endi Éle, pokke Éle kuirá ri enú. ⁸ Enú ten ke se sereno i bigilande. Enemigo ri enú, ma riache, sendá kumo leon lo ke tá rugí, lo ke tá rekorré rereró, ku bukká aggun ri enú pa kumelo. ⁹ Lebandá kondlá éle. Kujé kutú endi fé. Enú ten ke sabé ke ma numano lo ke tá aí mundo tá aguanddá ma sufrimiendo ri enú. ¹⁰ Repué ke enú sufrí po un momendo, Rioso ri to nglasia, kiene lo ñama enú endi gloria po to tiembo endi Kristo, ta pefesioná enú, tán araigá enú i tán fottalesé enú. ¹¹ A Éle sendá dominio po to tiembo. Amen. ¹² I konsirerá numano Silbano kumo ombe onrao, I kribí enú po merio ri éle. I tá alendá enú i tetifiká ke lo I kribí sendá ri belalá en glasia ri Rioso. Rekanseno aí. ¹³ Lo ke tá aí Babilonia, lo ke sendá elegio po enú, saluro. ¹⁴ Salurá to enú ku beso ku gongorokó. Ke pá sendá ku to enú lo ke tá endi Kristo.