¹ Asina ke, pokke Cristo a akongojá endi kanne, enú ten ke ammase ku e memo intesió kiene a pasá akongojamiento a palá ri peká. ² E gende tá bibí po resco ri umanirá nú, poro pa boluntá ri RIoso, po reto ri mbilia sí. ³ Pokke a pasá un tiembo pa asé kusa ke gutá a ma gentile: Sensualirá, lujuria, chapetera, bakanirá, orgías, oriki simarrona i irolatría abominables. ⁴ Ané kreé ke enú sendá raro ke enú sabé asé kusa ku ane nú, asina ke ané sabá chitiá mal ri enú. ⁵ Ané tan ndá kuenda a aké ke tá preparao pa juggá a ma bibo i a ma lungao. ⁶ Ku e proposito ma abangelio jueba prerikao pa aké kiene a lungá, ke aunke ané jueba, juggao endi kueppo komo gende, polé bibi ri akueddo ku Rioso endi epiritú. ⁷ Ma finá ri to ma kusa tá miní. Asina ke, enú ten ke sendá ri mente freko, i sendá sobrio endi pensamiento si po ma biene ri ma orasione sí. ⁸ Ante to kusa, enú ten ke sendá febbesiente endi ngongorokó uno ku uto, pokke ma ngongorokó tá buká jayá ma pekuo ri uto sin rabia. ⁹ Motrá asettamiento uno ku uto sin rabia. ¹⁰ Kumo ka kiene ri enú a resibí un don, enú ten ke usaló pa sibbí a uto, kuno kaiko moso ri ma regalo Rioso. ¹¹ Si agguno chitiá, ten ke chitiá kumo RIoso sabé aselo, si agguno ta afresé un kusa, ten ke sendá kumo fottalesa ri Rioso, asina ke endi to kusa, Rioso ten ke sendá glorifikao po merio ri Jesús, Ma ngloria i ma kutú sendá ri ele po to tiembo. Amén. ¹² Amao, konsiererá nú ma juisio addiente ke tá miní kumo kusa rara, tá pasá ané. ¹³ Poro kuanto enú pasa má akongojamiendo ri Cristo, enú ten ke sendá jarocho, pa ke asina enú polé ta jarocho lande ma rebelasió n ma ngloria ri ele. ¹⁴ Si enú sendá injuriau po ñamao ri Cristo enú sendá bendesio pokke ma epiritu ri ngloria i ma epiritu ri Rioso tá po ribo ri to enú. ¹⁵ Poro ke ninguno ri enú sendá akongojao kumo un kitambila, un jutaró, un malaseró o un akasuinao. ¹⁶ Ku embagogo nú si agguno tá akongojá kumo kritiano ten fe sindi abeggonsao nú sino fe enú ten fe ke rejá ele ndá ngloria a rioso endi e ñamao. ¹⁷ Pokke e sendá ma tiembo ri ma juisio komensá endi posá ri Rioso. ¹⁸ i si tá komensá ku suto, ¿Kuá sendá ma resuttao pa aké kiene a asé kaso nú a ma abangelio ri Rioso? i si ma kompaombrito juto sendá sabbao po merio ri rifikuttare ¿ke kusa tá miní pa gende pekarona? ¹⁹ Po tanto, aké kiené sé akongojá po boluntad ri Rioso ten ke konfía amma sí a ma fié krearó, kuando ané asé to kusa kaiko.