¹ Pa̧'a̧nö̧ 'cuäopina̧'a̧ TU̧RU̧HUA̧ Dios u̧mö̧huä̧ya̧ Moisés 'corupäi'äji o'ca'a, TU̧RU̧HUA̧ Diosmä ucuocuinö Nun i̧tti̧ Josuerö, Moisés u̧mö̧huä̧ya̧ pä'ijörö pä'inö: ² "Ttö chu̧mö̧huä̧ya̧ Moisés täcö 'corupä'i'äji. Ja̧'hua̧nö̧ ja̧'a̧ttö̧ ä̧rä̧mi̧'ö̧ täi Jordán aje 'cuäcuopa, ucuru'inä Israel ttö̧ja̧rö̧'i̧nä̧ rȩjȩ chi̧yä̧jä̧ra̧'a̧. ³ O'cajuiyönä cui̧jä̧dä̧tö̧cuä̧cuo̧mȩmä̧ iyinösä ucuru. Moisésrö chi̧yä̧cua̧sä̧ pädinöta'anö. ⁴ Porö de'a jui̧yä̧jä̧ttö̧ ja̧'hua̧ta̧nö̧ libanottö̧ kä̧mä̧dö̧, aje röoto Eufrate jubö, o'cajuiyönä Hititas tti̧rȩjä̧'i̧nä̧ dä'ähuoto Mediterraneo jubö. Ka̧hua̧ mo̧ä̧cha̧'a̧cu̧ päte'ö ju̧huȩnȩ jubötä jä̧cua̧'a̧ ucu cui̧rȩjä̧mä̧. ⁵ Ya̧tȩ'i̧nä̧ rohuähuö ujuruhui̧yä̧cua̧ ucu cua̧'cua̧ro̧mȩ jubömä. Ttö ucutäcu chö̧jä̧cua̧sä̧ Moiséscu chö̧ji̧nö̧ ta̧'a̧nö̧. Jaropi'ö'inä jaropi'ocösä, icuipö'inä icuipocösä. ⁶ Yecuecuoca'a 'quiyönä kä̧nö̧ cujuruhuaja. Ucumä jȩcu̧'ä̧cua̧jä̧ pitö cuahuäröhuä tti̧rȩjä̧ ttȩmö̧nä̧ ttä̧do̧tö̧ mi̧nä̧rö̧ chi̧yä̧cua̧sä̧ pädinöta'anö. ⁷ Yecuecuoca'a 'quiyönä kä̧nö̧ yabonänö cujuruhuaja. Ttu̧'ȩpä̧rö̧nö̧ ucuotö kä̧hui̧ o'ca juiyönä hueähuä huȩnȩ, chö̧mö̧huä̧ya̧ Moisés ucuru hueinöta'anö. Ja̧u̧ttö̧mä̧ kara'acu'inä 'Cä̧cui̧'ä̧ cu̧huo̧jua̧'a̧cu̧'i̧nä̧, cu'ohue ja̧'a̧cu̧'i̧nä̧, cui̧'cho̧'o̧dö̧nä̧ adiunä cu̧jä̧cua̧'a̧nö̧. ⁸ 'Cuäopönä cucuocuaja pi'tä hueähuä huȩnȩ cuyärö'tä ötö'cömä. Cuamöcuädaja mo̧ro̧'i̧nä̧, yodo'inä ucuotö jȩ'cua̧ja o'cajuiyönä juä'tänä huȩyu̧tu̧ rötähuämä. Ja̧'hua̧nö̧ jȩcu̧'u̧ttö̧mä̧ eseu'inä cuesehua'anä, juruhuö'inä cu̧ju̧ru̧huä̧cua̧jä̧. ⁹ ¿Ja̧hua̧nö̧ jo̧ca̧'a̧ ji̧na̧'a̧ tä̧ji̧ ucuru huedina'amä? ¡Ja̧hua̧nö̧ jö̧ttö̧mä̧ yecuecuoca'a 'quiyönä kä̧nö̧ cujuruhuaja! yecuecuä. cuijiyuhuächi'ä. "CU̧RU̧HUA̧ Diosmä cui̧'chö̧ o̧dö̧nä̧ ucutäcu kö̧." ¹⁰ Ja̧hua̧nö̧ ja̧'a̧ttö̧ Josuémä chutä ippeye ruhuotörö hue'ö ku̧ni̧nö̧: ¹¹ "Ttä'ahuariyä pönä tätucui ttö̧ja̧rö̧ huecuätucua: cuäcuähuämä jo̧mȩnö̧ jȩpö̧ kö̧nä̧tu̧cui̧, täcö huäbodäcuä mo̧ro̧ päi'omenä 'cuäcuopäcuotöjä Jordán aje, docuächäcuotöjä CU̧RU̧HUA̧ Dios i̧yä̧jä̧ cui̧rȩjä̧tö̧cu̧ päi'önä cuȩmä̧tu̧cua̧ pä'ö." ¹² Ruben ahuaruhuättö'inä, Gad ahuaruhuättö'inä, Manasés ahuaruhuättömä jö'totörötä pä'inö Josuémä: ¹³ "Amöcuädätucui Moisés päinö ji̧nö̧, TU̧RU̧HUA̧ u̧mö̧huä̧ya̧mä̧, pa̧'a̧nö̧ pä'inö: CU̧RU̧HUA̧TU̧CU̧ Diosmä jareönä cua̧'cua̧rä̧tö̧cu̧ i̧yä̧u̧jä̧ pi̧jä̧ rȩjȩ iyomenämä." ¹⁴ Tti̧rȩcua̧mö̧'i̧nä̧, tti̧tti̧mö̧'i̧nä̧, tta̧ji̧mö̧ pä̧cä̧yö̧'i̧nä̧ ttö̧ji̧pä̧cuo̧tö̧ Jordán aje yabonänö Moisés iyinäjä̧ra̧'a̧. Ja̧'hua̧nö̧ ja̧'a̧nä̧ ucututtö curä rohuäcuähuä ttö̧ja̧mä̧ cui̧'chä̧cuo̧tö̧jä̧ cuahuaruhuätöcurö ppäcuädätucua pä'ö. ¹⁵ 'Cuäcuächi'ätöcuä CU̧RU̧HUA̧TÖ̧CU̧ Dios cuahuaruhuärö iyome jubö, ucuturö iyinöta'anö. Ja̧'hua̧nö̧ ja̧'a̧ttö̧ jahuätö'inä tti̧rȩjä̧ päi'önä ttȩmä̧cuo̧tö̧ CU̧RU̧HUA̧TÖ̧CU̧ Dios i̧yä̧jä̧mä̧. Ja̧u̧nu̧ o'ca ucutumä ppa̧cuä̧chä̧cuo̧tö̧jä̧ cui̧rȩjä̧tu̧cu̧ pö̧nä̧ hue'ö cu̧jä̧tö̧cua̧ pä'ö, TU̧RU̧HUA̧ Dios u̧mö̧huä̧ya̧ Moisés i̧yi̧nä̧jä̧ Jordán ajettömä ka̧hua̧ räopa'acu. ¹⁶ Ja̧'hua̧nö̧ päomenä adätö pä'inätö̧ Josuerö: O'ca juiyönä ujuturu huecuäjimä jȩtä̧cuo̧tö̧jä̧ ti̧'cha̧ pä'ö huecuomemä ti̧'chä̧cuo̧tö̧jä̧. ¹⁷ ucu päcu tesetäcuotöjä Moisés päö tesetinö ta'anö. CU̧RU̧HUA̧ Dios ucunätä̧ ö̧ja̧'a̧ttö̧, Moisésrö ö̧ji̧nö̧'a̧nö̧. ¹⁸ Ucu huecuäji esetoca'a ä̧dä̧tä̧rö̧mä̧ hua'ö i̧cuä̧cua̧. Ja̧'hua̧nö̧ ja̧'a̧ttö̧ Yecuecuoca'a 'quiyönä kä̧nö̧ cujuruhuaja.