¹ Akes, to' Angelma Aso wuaka ás tachawishki, Patatishta achi'waña apaskuaruri to' Corderoñari ² To' kãauya atah ulla na. Aso atenten aakuarii to' peh wakuai, ukua pok paski to' tishkuaro yawí asas paskua.̂ Peh aaama chana arpeshkai to' kã auyalerí. ³ Añahma ke warkua ĩ chitipé. Patatishta achihiñá a Cordero wa kãa uya ya chipé to' katu ishtama kawishkerpé. ⁴ Ekama awã tapunro chẽlerpé pesh pima kakoskaro achi'pé awak kiña. ⁵ Kakaña chani chitipé; añahma ké ĩ kakachitipé to' ã̃n kamaskuaró kama'skuachani ankró Patatishtama Eka aakriyá kamaspé. Akẽs ekama chi i teshkerpiwá akẽ. ⁶ To' Angelma ti' takii: "I añahma chẽ' yar arihbarwa. Toh Señorma, to' Patatishta akuansa profetaleri, eka a angelro tuhí pakachawĩshpiro a tu'techpií wãripe". ⁷ "¡Chau! ¡Tas te'kawa wãripe! Benditoí to' añaha weshkuaí awikawã a profeciaro". ⁸ Tas, Juan tasrawa a weshka yas chaari. Akashkua weshkama chaarí, taspe tachanyope chraakarí to' ángel atah awakiya arñehpiro, a angelma yas tachawĩkí. ⁹ Éka ti'takií: "¡Iro kauti! Tasma payó katu ishtarawá, pi arkiyowa to' profetari, to'yowa añah weshkera ĩ awikawayó. ¡Patatishtaro a nehlerí!". ¹⁰ É'kama ti'takií: "Ĩ profecía añahró sella kauti ĩ awikawa achihi, akaró ate' kuai ke te'piruwá. ¹¹ Tarõ warkuá ishkuama, tineí warkua ishpiró. Tarõ apesh kakina'ma wétamá, tunnau nepiró kakina' wepirá, tarõ en ishkuamã, tinei en ishpiró. Tarõ santoma, tineí santo ish wepiró". ¹² ¡Chau! Tasma ke te'paruwá. Ta recompensama tasyaí, asas kahtamihparó arihlerwa to' ishkiró. ¹³ Tasma Alfa Omegarawá, ki' Apistiri, ki' Finrawa". ¹⁴ Benditolera to' añahaen weshkeri en e'lerpiró to' peh wawakuaí kãauya kosapaña tokerpiró. ¹⁵ To' pakúmã arahnaña aakerpé to' warkua ishtaleri, ã sexualmente inmoralesri, pesh amastari, idolatrari, to' krihro ishkuama warkuaró ishkuá. ¹⁶ Tas, Jesús rawá, ta angelro tuharí ti'pikipiró yas erña achiro iglesia ña. Tasma David apisrawa a ilerima Piriwá kamaskuaké Kapahni". ¹⁷ To' akuansa a senwá ñelerwá: "¡Te'ku!" Taro weshkuama, ñehí: "¡Te'kú! Taro tokichkiwama, te'ku, taro kaichkiwama, ti' tunnauwa asô wakua torpiro en tawarpiro. ¹⁸ Tas krihro ñahawa taro a ñaha weshkerpiro profecía awikawãí: taro untukuama a ekaro, Patatishtama to'ro untukpé a peshwakua awikawã ñá achihí. ¹⁹ Tarõ arpeshkuama a ñah ĩ awikawã achihi to' profecía achihí, Patatishtaya artesukpe to' pen warkuaí to' kaã uyá santa í, akema í awikawãyá kakorskaí. ²⁰ Tarõ a ñah ñehwama yas ñehwa: "¡Akeí! Tasma uwãrí te'pá". ¡Akenaí! ¡Te'kú, Señor Jesús! ²¹ To' Señor Jesús kaparen ishkuama pa krihyó aakpé. Akenaí.