Juan_HRomeroC-pay_rev_text

Kapashká 12

¹ Amaka a'ka as chãlori piriñá: Korta as ãn akaowayorií to yawí ata'ha awa'ña; corona as piriwa u kua pak yá asán aaya achihirií. ² Ekama bokinrií wã'ni aakirií apa''nayo, ameshkí a akirií arye' pirishki. ³ Akashkuá akuas as chẽí to piriñá: ¡chãuwá! dragón pawá a'ka as chii asãn tawa' akachirií a anhá ukuá akachururí. ⁴ Aparma kãrah pichrihí as maí ahrakí to piriwas piriwas piriña kukña katúnhi. To' dragónma korta awakiña ishtaki aaki ke aryepiishki, ke ahí ke aryewãma, aye'ró e'pirii. ⁵ Ekama yeas aryeí, arwã as, i'ñaí krih kããuyama pita sã'taripé bara as kuakuahnáyo. Ayerwãma Patatishtaña Pakií to' atronoña ⁶ to kortama kuk arshña troki, tõ'ñá Patatishtaya lugar as en kií to' ekae'ro tõña akén chẽlerpiró archa 1,260 ã wrish. ⁷ Inkatama, piriñama anu´ka ishkri. Miguel Pesh angelesrí dragónwa artapukera anu'krí; to' dragónma Pesh angelasma warkerá anu'rií. ⁸ Akaro. to' dragonma ima chẽ artapún akachitirii ganaishpiró. I'ka aken ma, i'ka ke lugarchaní akachitiri ekachaní Pesh ángeles chaní Piriña. ⁹ To' dragón a'kama ã pirakata'ma kekerií ake arwahní apinma amaisaraí taro ku' chata krih arkasewa sa ima kuk awa'ña tunrí Pesh angelesyó ekayó awa'ña katunri. ¹⁰ Akashkuá to' piriiñamá aña'ha ahtapunyo a'ka as wẽshkarii: "Inkatama salvacionro te'kuí to' Reino ahtapunyo Pitaste Patatishta Cristo, aña'ha a'ka. Inkén to ña'tikiuma pita arkileró awa'ña túnrií taña ña'tikakiiró Patatishta kiawaki a har i kakaña'ri. ¹¹ Ekalera achẽkakirí to' cordero a urirish añaha a eñarií, inken ima chẽ ahra enkilertitii Pepeshkaoró. Akén onlertãnia. ¹² I'ka, akenma, ahrarí tishkuwa, piri pawalerí to' krí ekaña chilero. Akaro to' ameshma kuk rí a take uya, inkẽn to' amaisarama Paña'rowá chreí. I'ma akaiwaró musti aakuaí. Inken ekama ke ari'wá ke ã ãs akinatish akatawarkuá. ¹³ Akashkua to' dragónmá ke weshkuma kuk awa' tunriró, ekama kortaró arachichí to aye arwã as pe'kiró. ¹⁴ Akarõ to' kartama kuas, aguila awĩshró pok wĩshki, ima ishtaki ñepiró piã aenkakiriñá eka e'ro to kuk arsña Ima ñaí tõ'ña chẽlerpiró ã asperó. Ã as araki ã asró ara'ña to' Pirakata'ma aruntuñá. ¹⁵ To' Pirakata'ma asoro boni asapaña apaskí aso uya kenarií, umustí ki'piró ekaró Pichihpiro. ¹⁶ Akarõ to kukma to' kortaró arwarki. To' asaparó aprihí asó uyaró ato'cheí to' dragónma asapa asó pe'kiró. ¹⁷ Akashkuá, to' kartaya akai í ima tishtawarkeiyó anu'neí to korta Pesh inñá eka e'riró, tarõ talerma Patatishta aña'ha yar kakorskañehleró ima añaha kapashma kus akerwá. Jesús ñehiró. ¹⁸ Akashkuá to' dragónma take ûûña abriña a akí.