Juan_HRomeroC-pay_mat_text

Kapashkuá 28

¹ Ke tiskririh, ân bak tishkuha, akashkua ke arahkii péhkuahá ân aschẽ, Maria Magdalena i'ka as Mariari te'kera chẽri ã sâ tapakuaró. ² Akes, apán a'ka as chii i'ka Patatishta ã Ángel as chrei piriña chií, te'ki sâ minihí, akashkí achihí ã aña. ³ I'ka choi kena rií, akes a iñama anikena rií wanahká. ⁴ Akes toh chanalerima a kati'rá ôhnike tawarkrí. ⁵ I'ka toh Ángelma korta aâkrike neí akes ti'karií: "Akatiutihiwãwĩ, tasma ke arihawa Jesúsro prohiñawií, atâ peh prak pishkaña pehri. ⁶ Ekama ñama chituwã, ke wakatishki, toh eka ñehiké. Te' chauwãwĩ toh Jesús pishkariña. ⁷ Nauma wãripé na ta' kakauwãwĩ eka arbaktalerií, Ekama ke wakatishkí toh ôhri peshkeraña ke ki'tishki newa ã Galileake, Aña pawaí chaupiwa iña, ke ta'kakaârií" ⁸ Waripe toh korta lerima akasteshkera neríh ã sâ tapakuaro ati'yó akes ararih, ôlerá na kaishkerpiro eka arbatalerií. ⁹ Ekaken, Jesúsña kartapúksáh kakií akes ti'kakií: "Kaúnñehí". Ã karta lerma abriña tishkrí, ata'ña artabrikera, i'ka arñehri. ¹⁰ Akashkua Jesús ti'kakií: "Akatiutihí wãwĩ. Nauwa ta'kakauwãwĩ toh ta arkilerí nelerpiro Galileaké; to'ña tachaupiwa". ¹¹ Akes toh korta nelerí, i'ka, ani tish chanalerií nerí kahaké nera ti'kakiri asâ aâhta leró paréh lerií na kaishkri toh yas cherií. ¹² Akashkua toh parêhlerima atawéhri asken toh wãwã leryó i'ka kapashkera toh pehñeriró, ekalerma platoro weh kawishkri toh asãí. ¹³ I'ka ti'kirí: "Ta'kakauwãwĩ akuaro, Jesús arbakta lerií te'kera kakaña apeshro te untrokrí ôén aâbarirí". ¹⁴ I ñâhro weshkuama toh pata asã aâhta, pataña en weshpe tohkenama en patakanepé". ¹⁵ Akashkua toh asãma plato sukuhpi akes to'ke ishkri ã ti'kitike i'ka iñahma kaicheí toh Judios karihró inkatawa akenaí. ¹⁶ Ã ukua as arbakta lerima nerí Galileaké, toh waha Jesús ti'kakiiña. ¹⁷ Akashkua ekaro chelerií, i'ka arñehlerií, akes tis lerima chẽh añah weshkertihí. ¹⁸ Jesúsma te0ki eka aâkriña i'ka ti'kakií: "Autoridad karihro tasro tanhaí piriñarí i'ka i kúkñarí. ¹⁹ Akashkua nauwa, ishkuwãwĩ arbakta keña kaha chuña, kamahuwa api tusrí, i'ka aye'rí, akes Akusã Eña. ²⁰ Kachawishkuwa karihro en añah weshkerpiro tasma en kakarií, i'ka chauwa, tasma aâkarí payowa kapah kapah, akes pichẽhchẽ yâh tishpií".