¹ Tikirima Jesús chiiwá akrí toh Belen Judea ñá a chema asã'ta Herodes a êh rií, arwã wãtá tis te'borí Jerusalenñá ñehlerá: ² "¿Piâkisá Judíos pesã'taí toh chií? Piriwá as chãbrí orienteké akaró arñá te'barwá". ³ Akaró toh asã'ta Herodes weshkuamá ĩhí, ameshtawarkí ĩihka krí Jerusalénwá ekayó. ⁴ Herodesma krirró kauwẽchehí asã'ta peró paré rí, escribarí kaha uya chatalerí ĩhka karkapeí: "¿Piá chipisá toh Cristoí?" ⁵ Ekalermá ti'kirí: "Belén de Judea ña, ima ké kakosrkaró akrí toh profetañaá: ⁶ "ĩHKA PA, BELÉN, JUDA A KU'ÑÁ AMA AYE'TAHÍ TOH JUDEA CHAIÑAWIÑÁ, AKES ASÃ AS TE'PEK TOHÑA KACHAWĩSHPEK TA KAHA ISRAEL". ⁷ Akashkuá Herodesmá auhí suwatá ró karkapaenkakÍ piã apaski chẽrikena toh piriwá. ⁸ Ekañá tihkakií katunhí toh Belén ñá "Nauwá chaenkauwá prohuwawĩ toh yehró. Akesh prohlermá teh taishkupiwá taswá naâ arñatikparó". ⁹ Tiká ekamá toh rey weshkri na tahteshneri piriwá cheriña atenña kí tishneí ne teshaki toh ye akiñá ¹⁰ Akeshpiriwá chẽlerá araritishkri. ¹¹ Ekamá a kaôñá nerí yehró chẽrí toh akaki Maria yá. Ekamá tanashnelera arñerí yas mirrarí pehkerá aprirí, wishkerpiro sá sewá inciensari, ihká. ¹² Patastishtá tihkakiî a onyó toh herodesñá tehkerketipiro; tohkaró táh kuk akuaké nerí. ¹³ Ekamá tika nerí, Ángel as arapaski a Joseró on chẽumá tihkiî "Ishtakú piyé sukuhú akari Egipto ke trokú. tõhñá tawar kupé tas tapikatãní, toh Herodes má yehró prohpe amaspiró". ¹⁴ Toh kakañá chẽ José aye sukuhí a kakirí Egipto ke nerí. ¹⁵ Ekamá tõhñá tawarki Herodes onatãnia. Imá yartishkí Patatishta toh profeta tihkiîró, "EGIPTO ÑA TAYE ARWÃNARI". ¹⁶ Akashkuá to Herodes weshkí arkakonlerá yas tihkiri toh suwatá arwalerí ah katishki akaiî. Ekañá katunhí ye karmachelerpiró arwãpero kuí as, kui pokrí kakachuperó Belén ñá chulerperó kri aten ten, ikesh sawatá ã as ñerikesh. ¹⁷ Akashkuá yar tishki kri ekẽshñehikeña toh Profeta Jeremías: ¹⁸ "ÑÁ AS WESHKRI ASÃKÉ, WÃNIPÉ WÔHKILERI, RAQUELMA PESHYERÓ KARAKANI KE CHILETIPIRI ÑA EÑAPERO ÑEHI". ¹⁹ Akashkua Herodes onnaché, Patatishtá ángel as arapaski on chẽí Jeseró tihkiî toh Egiptoñá. ²⁰ "Ishtakú piyé sukuhú a kakiri toh kuk Israel kenaú, toh ye prohtamá amastamá ke onrí". ²¹ José ishtakí ye sukuhi toh akakiri warki tehki toh kuk Israel ñá. ²² Tohkaró Arquelao weshkumá ke pe sã tari toh Judea atusrishki pesãhtá akatií tohñá netiî tika. Patatishtá tehki on as chẽi tihkiî Galilea ke neí. ²³ Neí tohñá chiî kãa ayá apinmó Nazaretña. Ima yar tishki toh profeta ikesh ñehikeñá Ekamá opinma Nazareno ripé.