Juan_HRomeroC-pay_mat_text

Kapashkuá 10

¹ Jesúsma ukua pok araba'taleró karwãni añaha a'ka kawishki walak na warkua. Kakaspaskerpiró, chana warkuá yas karónche piró apã'na yãs chana wriha yas. ² Inkatama, pesh pinma ukua pok leró ima ña'lerii asma, simón (tõ'ke apin sama Pedro), Andrés a arkiri, Santiago, Zebedeo ayerwãri, Juan arkiri. ³ Felipe, Bartolomé, Tomas i Mateorí, plata kapa'ta Santiago Alfeo ayerwãri i Tadeori ⁴ Simón to Zeloteri i Judas Iscatioteri, tõ'ña amaspirii. ⁵ Ima i'ro ukua pok lero Jesúsma katúnhi, karchiwishki ti'kakii: "Akuanama nauwarú to gentiles chulerña, kã ãuya akuaro na tokawarú samaritanolerña. ⁶ Tõnama, ovejasña tõ'kriña naupiwá Israel. ⁷ Akaoña, ña Patatishta ta' kakupiwá: Piri reino ke erña tishkuá. ⁸ Chana na karónnuwá, wakuakauwa to ónniro, bras pelerma kaushkuwá to walak ña ara'na kakaspaskupiwa. Eñatishkuwá pipenlerpiwá Eñatishkuwá kawishkupiwá. ⁹ Oroma sukuhutihiwãwĩ, platochari, kuakuachãri to inkuewẽteña. ¹⁰ Pakuwarú to apaskichẽ pesh kaowachani, ta'kaochani, pen chani, to katun ishtama a ekape a a'pe. ¹¹ Kããuya a'kari i aye'ri tpkuñãwĩró eñapero prohupiwá, tõ'ña ta warkupiwa nachẽ ler tani. ¹² Kao tokima uña hupiwa "paz i kaoma" ¹³ I koroma eñama, toh paz ke te'kuma pi aaña te'piwa i paz warki paña te'piwá. ¹⁴ Aaña to ekalerña, talersa to pisukulerpiwai o aña'ro weshkupiwá ke naima to pia akurima kããuyaña pi'ta polvo a uskunaupiwá. ¹⁵ Akarõ yar ta'kakaawá to apistichẽma to amesh kẽ chẽma aye'ripé to Sodoma Gomorra kukñama i kããuyaké. ¹⁶ Chãuwã, tasña ovejaske katunhawá pakú awahara lerña arra katumpa, akarõ tõ'kema e bis kẽn wakuatishkuwã wĩ bu'tuku weshlerké. ¹⁷ ¡Wé arí pikachipiwa to pesh wrihaleryo!, Concilios pakawishkerpiwá, siki kaoña karpishkerpiwá. ¹⁸ Asã a'kaña kawakerpé reyesri taña haró aña' haké ekapeshe'ké Gentiles wá. ¹⁹ To ahí kawishkerchẽma wá aakutupiwá inkén kapashkerpikena, akarõ tõ'ke ti'kakilerpe tõ'chẽ. ²⁰ Akarõ pama kapashkutupiwá i'ka kẽsh pita tus akuansaripé tõ'ña kapashpiwa pa'rowá. ²¹ Arki asma kawishpé amaskerpiró, atusma ayer warõ Pesh yerwãma Pesh tusyo ta ishtakerpe toh rishki karmaskerpe ²² Pamawá chẽ picha en pikitipiwãwĩ ta pin rishkia tarõ a a'ken ishkuma tohro chipé. ²³ Ke ahí ke karachilerma kããwyaña trokupiwa asñama, inken tohkaró yar tapikapawá, pamawá toh'chẽ a'hupiwá to kããuya Israel ña arwã ayerwá te'kuachẽma. ²⁴ Aroba'ta asma ima chẽ eñatã'hi ke achiwishtaké, to amokẽ. ²⁵ Tokẽshripe to araba'tama achiwista amokrén. ¡To ekama achiwista apinyo arwãrima to aka aña, Beelzebú, inkashki ke akaorike! ²⁶ I'ka akema, aekaró akatiutiwãwĩ ekalero, ima akashkuá yas aûlerma ti'kakilertukerna, in chituwã û'riro. ²⁷ Tasró ta'kakaoma to sukuaña, kamaskiwãña, irõ weshkima maimainakenaña pi suntapa'ña, pikao awa'ña ñahupiwá. ²⁸ Akatiutiwãwĩ to apeshkao amaskeró, akarõ akuansama amaskertipé. Atamakema, akatiuwãwĩ taña amaskuaró pipesh kaoró pi kuansarí tenwãña. ²⁹ ¿Kuas aye pok lerma û'chẽlerpe plato aye'leró? Tõ'karó akema asnani to kukña ta entuwã atus ari'tutewá. ³⁰ Akashkuá tohkaro sã kri'roma kawechẽi. ³¹ Akatiutiwãwĩ pamawã krẽshriñawĩ ke kuas wêlerke. ³² Toh karõ, taña ta ishkikena arwã awa'lerña, taswá tohke ña'pawá ta tús awa'kiña to pirichuña; ³³ Tãro tarkasehuma arwã, taswa karkasa'pawa tatús awa'ña pata tús piri chuña. ³⁴ Ameshkuutiuwãwĩ tasma paz pe' te'tawã i kuk chaparña, akarõ ispararó. ³⁵ Tasma akarõ toh arwãro artapu' tu' te' kari atusyó, ayerkortarí akakiyo, akichuma awayo anu'kerpe. ³⁶ To pesh war kima arwã lerma akaoña a a'talerpe. ³⁷ Tãro a tus wê arakiuma tastama tohma in akachitipe tasñama, tãro ayerwaró i ayekortarí krésh ara en kiuma tohma taste e'lertipe. ³⁸ Tãro pen pra'pishma sukuhí tarachituma tohma taste e'taripe. ³⁹ Tãro apeshkaró prohuma õshpe; akarõ taña ken õshkuakẽ tasrohó pro'pe. ⁴⁰ Taña tohna sukuhuma pañawa ta sukuhúpiwá tasro, taña ta sukuhuma, tohwá sukupé taña ta tunhikena, ⁴¹ Tãña tohña sukuhuma profetakẽ, akarõ profetai taña ta sukuhuma to arwãro eña suku'pe to arwã wishkeró. ⁴² Taña i aye'ro wishkerma, tohkashki aso aka as wishkuma toh karõ, akarõ tohma ta raba'tai, yarta'kakapawá ke asnani ta wartipiwá kawishkerpiro.