¹ Akashkuá ti'ká te'ki Jesús Galileaké neí, Judeanama totipirishkí judíana prohahishkrí amas kerpiró. ² Inkatama, judíos peshkatikarii, sikia'ká ke erñarii. ³ Tõ'karó pesh arki ti'kakiri: "Ña akurima Judeake naú, pape araba'tama chẽlermiro iró katún ishkikena. ⁴ Asnani ki'tipe auhía ekana aprihí kachiwishpé. Y yas ishkimá, karchiwishpini a kuk chaparñá." ⁵ A arkichani yar ñelertururí a ekaró. ⁶ Akashkuá Jesús ti'kakii: "Ta emá atewata te'bohtawã, tõ'karó ã as te'kma pamawá eñaripé. ⁷ Kukmá chaparma asnaní ñawarki a meshtipé parowá, tasñaró ñañe'wá, akaró tasñá ña hawá, pesh katunma warkuaí." ⁸ "Pamawá akatikañá tawehuwá; Akaró taema atewata te bohitawá." ⁹ Warki i yas ti'kakiuma, Galileañaperó tawarki. ¹⁰ Akashkuá ahí akatikaña ke pesh arki tawe'lerma, akuashkua ekawá tawehí, chẽlertururí auhí tawehí. ¹¹ To' judíoma to' wi'terña prolerurí ñe'rí: "¿Pia akisá Ekama? " ¹² Wé añapaskerurí a ekapé to' wrish akriñá a Ekaró. As chilerá ñe'lerurí: "Ekama arwã eñaí" akuama ñe'lerurí: "Jo' Eká ta' warkua kawakuá to' pesh wrishma." ¹³ Akashkuá, asnani kapashkertururí a ekaró judíosró karkatirí. ¹⁴ Ahí ara'ki wi'tipakerma, Jesús siki kaoñá tawehí karchiwishpiró. ¹⁵ Akashkuá judíosmá chokti tawarkrí ñe'rí: "¿Inkashki i arwãma wé ariwarsá? Ekama to'kenatarií." ¹⁶ Jesús karkawarki ti'kakii: "Ta achiwishkama taste e'taí, akema to'ñarí ekañá tatunhí. ¹⁷ Taró as chii ta ameshkaró ishpirishkuma ekama ke ariwá tas achiwishkaró, patatishtaño chii taspekama chiwishtawã. ¹⁸ Taró a ekape kapashkuma to' gloria ẽ ekapeka prowa,taña gloria prohuma tañá tunhikená to' arwã as eñaro ñe'wá in chituwá a ekañamaá. ¹⁹ ¿To'karishki Moisesña ley kawishtiri? Akashkuá, pani asnani i ishkuwãwĩ.¿Pamawá tamaskupirishkiñawĩ? ²⁰ Pesh wrihama karkawarkri: "i walash as akachuwá!¿Taña ta prowasá tarmaspiro?" ²¹ Jesús Karkawarki i ti'kakii: "katun as pesh ishkari, pamawá cho'titawarkiñawi iro hó. ²² Moises kawishki apirá kataskri (Moises tarii. pesh tusrii); Tõ'chema pamawá arwã as apirá tas kerwá. ²³ Arwã as apira taskerma to' akatikachẽ, Moisés ley krahatãi, ¿Inkén pamawá akayaishkiñawĩ tasya akatika chẽ arwã as aronnari? ²⁴ ñá ta'kakauru iró chaiñowĩkena, akaró ta'kakauwa yasti." ²⁵ Jerusalenña tish chilera ñe'ri: ¿Ima ña'tai to'amaskerpirishkeró? ²⁶ Chauwãwĩ, Ekamá aprihi kapashkuá, i ekama in tikilertuwã ¿pitasã'ta ari'riti ima cristo ti? ²⁷ Pitasma ke ari'parwa piã chi te'kuakena ima.ahi we tishki te'kuma,asnani arilertuwá piã chi te'kuakena. ²⁸ Jesús sikikaoñama wa'ni kapashki achiwishki ti'kakii pamawá tarihíñawĩ.akriki arihiñawĩ piã cha'te'kakena taspeka te'tarii taya tatunhikena to'ma yari.pamawa arihuwãwĩ. ²⁹ Tasma arihawá to'ña chite'kawá ékana tatunhi. ³⁰ Ekamá sukulerpirishri, asnani asawairó pentertiri a ayá to'karó a ema tewata te'bohtiri. ³¹ Akaskuá pesh wrihama yar ñe'ri cristo te'kuachema,Ekama yas kres ishpe i ishkikenaró? ³² Farioseosma weshkri pesh wriha a krima akayaishkri Jesús yas ishkiró,pitasa'tama pare'ma Fariseori asa'ta katunri sukulerpiró. ³³ Akaskua Jesusma ti'kakii."Tas ña akari akina tish apawá papawá tasma napa to' tatunhiriña. ³⁴ Pamawa taprohupiwa, tapaskutipiwá Tas piã naama pamawa nautupiwá. ³⁵ To' Judiosma akashkuá ekapé ñe'leruri: ¿I arwãma piã neumá prohatipé? ¿To' griegos nepirishkuani griegos karchiwishpa? ³⁶ Iña ñai kapashñehi ekaña ñehi: pamawá taprohupiwá, to'karó taprohutupiwá:¿Tas piã naama pamawá nautupiwá? ³⁷ Inkatama a é apistii, to' a'ka akatika wi'ta te'kuachẽ,Jesús, a aki, aña, Tapunyo ñehi: "Tãro tokishkiuma, tasña te'ki to'piró. ³⁸ Tãró tasña yar ñeuma.Kakorska ñe'waké,auyá wakuatishki musterá pita ishkiñá. ³⁹ Akaskuá eka ñeuma akuansarii,Tãró a ekaró yar ñerima te'kuñelerpiri: Atewata akuansama Jesúsma atewata chẽ araritishtii. ⁴⁰ Wrish as te'ki,Iña kapá'weshkerma,ñe'ri: "Ima yarma Profetai." ⁴¹ Akuama ñe'ri "¿Imá cristoi"Akashkuá as akerá ñe'leruri:"¿cristomá Galileaña chi te'pé? ⁴² ¿To' awikáwá kakorskamá ñe'tuwá to' cristoma david a inñalertipi belén kããuya ayema David chiiñarii?" ⁴³ Akesh krá tishri pesh wriharó ekarishkiá. ⁴⁴ As te'kerá sukulerpirishki, asnani pesawama tukertiri aañá. ⁴⁵ Akaskuá pitasa'tama warkera te'kri pitasa'tawá pare'reri to' farisesori,ta'ña ti'kirikena: "¿Irish pe'kertirisá?" ⁴⁶ To' pitasa'tamá karkawarkri: "Asnani imá akema kapashtuwá. ⁴⁷ To'kema to' fariseoma ñe'leruri: "¿pamawá karkaseri? ⁴⁸ ¿Akaró pitasa'ta as te'ki fariseo as chii yar ñeriti? ⁴⁹ I pesh.wrihama ley ari'lertuwã ekama ñalerwá." ⁵⁰ Nicodemo Fariseo as chii, a ekaró te'ki kekerima) ti'kakii: ⁵¹ ¿Ekaró ley pitaste e'ma arwã as ña ti'kiwá ki weshpra iró ishkikena? ⁵² Ekama karkawarkri: "¿Pama Galilea chataria?Chãuwá prohuwá profetá asnani Galileaña chii te'tuwá. ⁵³ Akashkuá aspe peshkao ekake neri.