Ulbi Baiki Sakanka Tara 6
1
Alba nani ba ai dawanka nani ra kasak kulkaia sa, bara upla kumi sin Dawan ninara bara wan smalkanka ba mapa ra sin saura aisabia apia.
2
Bara alba nani ba aidawanka lalukra nani brisa kaka, baha nani ba kasak lukan mapara ai muhni nani wisi witin nani mita bahki kulkaia apia sa. Sakuna, witin nani warka ba kau pain daukaia sa; kan baha nani aiwarka pain dauki ba wina hilp bri nani ba, lalukra nani sa bara ai muihni latwan kira nani sin. Naha nukia nani ba man upla nani ra smalki baha kat daukbia wiaia sma.
3
Upla kum kuni laka smalkbia kaka, bara witin ba wan Dawan Jisas Kraist smalkanka yamni bakat, bara Dawan ra luki kaia laka wan smalki bakat sin kasak lukras kaka.
4
Witin ba prautkira sa bara diara tanka briras, witin ba bila nani dukia ra baman aisi blahwaia sikniska alkisa; bara naha wina sika tuman laka, unsaban nani, uplara saura wiaia laka, upla bara diara kumi ra sin sip kasak lukras, kaia laka taki ba,
5
Upla nani sinska aihka takan ba tilara sin blahwan bahki nani baban takisa. Bara witin nani ba kasak tanka ba kakaira apaia sa. Witin nani luki sa Dawan ra luki kaia laka ba bak yuyakira takaia sip sa.
6
Dawan ra lukikaia laka ba mita upla ra yuya kira dauki sa.
7
Sakuna uplika ba baha bri ba wal ai auyapah sa kaka. Yawan na naha tasbara dia bri balan ki diara kumi sin bri balras, bara, tasba wina yawan dia brih waya sip sa ki. Diara kumi sin brih waras.
8
Baku bamna, yawan na plun pi ba bara kwala sin brisa kaka baha ba wal aitani sa lilia kaia.
9
Sakuna yuyakira takan dauki nani ba, traika kaikan ra kauhisa, bara brinka karna taniskira ailal, alki priski brisa, baha nani sika upla nani ra saura muni ba, bara sauhki tikaia laka bara tanisa tiwaia laka ra sin rungkisa.
10
Kan lalah ra latwan kaikaia ba sika saurka sat sat plamaika ba. Upla manis ba baha pali ba brindauki sa baha mita ailal kasak lukan laka wina tnaya ra tawi manhwan sa, bara witin ai rayaka nani ba, pat nani taki banhwan sa.
11
Sakuna man Dawan uplikasma ba, naha dukia sut wina sia bri plaps. kasak ka laka ba nina bliks, Dawan ra luki kaia laka ba, kasak lukan laka, latwan laka, ban bapi buaia laka, bara wan kupi swapni bri kaia laka ba sin.
12
kasak lukan laka aiklabanka yamni ba aiklabi bas, bara raya bankaia laka ba man dukiam brima; kan baha dukia ra sika Dawan mai paiwan ba, man ba kasak lukan laka tanka yamni ba witnis ailal mawan ra latan aisaram.
13
Nana ra Dawan mawan ra, witinka diara nani sut ra raya ka yabi ba, bara Jisas Kraist mawan ra, witin ka sin ai lukanka tanka aisi witnis sin takan ba Pontius Pailat mawan ra, yang bui mai smalki maiwisni.
14
La bila bakat wali dauki bas, bara baha ba sauhkpara bara pat apu sin alki bribas, wan Dawan Jisas Kraist balbia bakat.
15
Baha piua ba aimakbia bara, Dawan mita naha na daukbia, kan witin baman sika Dawan kumi baman ba, yamni kira bara karna kira, king nani Kinka bara, dawan nani Dawanka ba.
16
Witin baman sika sip pruras ba; witin ba upla sip lamara waras ingnika ra iwisa. Upla kumi sin witin ba kaikras sa bara sin sip kaikbia apia. Prana ba bara karnika ba sin bankaia ra, witin dukia kabia! baku kabia.
17
Naha tasbara yuya ailal bri nani bara smalki wis, witin nani kwalhwi kabiara, yuyakat kaiki aikaina ra diara briaia sin luki banhbiara, kan baha nani dukia ba luwaiki ra sa. Sakuna, witin nani Dawan ra luki aikaina ra diara briaia luki bankabia, kan witin ka baman sika diara ailal wankisa ban yawan lilia takbia dukia ra.
18
Witin nani ra smalki wis, diara pain ba daukbia, bara wark yamni kira nani ba mapara yuyakira taki kabia, bara wilin kabia dia bri nani ba upla wala nani aikuki yui briaia.
19
Baku lika witin nani aikaina dukiara yuya nani suni bri kabia, sin walpa bapan kum baku. Bara witin nani sip kabia raya bankaia bara kasakkira ba win takaia.
20
Timoti, dia mihtam ra mankan ba pain main kaiks. tasba laka bila nani, bahki baman ba tanis bara sins laka wi ba, sakuna kunin aisi ba man bila walpara.
21
Kan upla tila nani nahmuna sinska laka nina blikan ba sut, ai kasak lukan laka yabalka ba, tiki banhwan. Dawan mita ai yamnika man nani puram ra laikbia.