¹ Ja̧u̧nu̧ o'ca'a topinösä isode huä̧mȩ querubines ttupiyä jo̧mȩ ka̧'a̧; I̧jȩcui̧na̧'a̧ Zafiro usäru ja̧'tu̧'u̧ jä̧'i̧nö̧'a̧nö̧ jua'amä ji̧na̧'a̧ ruhuo hue'ö pä̧cuä̧huo̧mȩ a̧'cua̧rö̧nä̧. ² Ja̧'hua̧nä̧ ja̧'ä̧, TU̧RU̧HUA̧ ucuocuinö ya̧tȩ ö̧'ca̧tä̧huä̧tä̧ lino pu̧jä̧ta̧ttö̧ 'ca̧tä̧u̧ru̧ pä'inö: " ' Querubines ttö̧jo̧cuobu ö̧'cä̧tȩ dȩa̧'a̧nä̧ 'cuä'opi, ja̧hua̧nö̧ 'chä̧nö̧ cu̧mu̧ to̧mu̧rȩnä̧ a̧ya̧ri̧ säröcänö cuoa'a ȩmu̧ Querubines ttö̧'ca̧tȩnä̧ pperetäjí ötahuiyä jacuä." Ja̧'hua̧nö̧tä̧ ja̧u̧mä̧ do'ächinö to̧chä̧ra̧'a̧nä̧. ³ Querubinemä ka̧cui̧nä̧tö̧ isodettömä ttu̧huo̧jua̧'a̧nä̧ ja̧u̧ doächi'omenamä, isoppa teoppa u̧mi̧'i̧nä̧ suädiönä ra̧mä̧di̧na̧'a̧. ⁴ TU̧RU̧HUA̧ öadihuämä querubinettö̧ 'chopina'a̧ ja̧'hua̧nö̧ 'chopa'attö isode huä̧mȩ huirochi'ina'a̧. Isoppa isode su'ädiönä ra̧ma̧di̧na̧'a̧, u̧mi̧'i̧nä̧ TU̧RU̧HUA̧ öadihuä usäru kä̧dȩpi̧na̧'a̧. ⁵ Querubines ttujuabiyättö oto rä̧mi̧pi̧na̧'a̧ u̧mi̧ra̧'a̧'i̧nä̧ ttä̧ju̧cu̧nä̧, TÖ̧Ä̧NÄ̧HUA̧ JU̧RU̧HUA̧ ucuocua'a jä̧'i̧jö̧'a̧nö̧ ucuocuina'a. ⁶ Ja̧u̧mä̧ 'cuäopina'a, TÖ̧Ä̧NÄ̧HUA̧ ya̧tȩ ttö̧ja̧sa̧ lino pö̧jä̧ta̧ 'ca̧tȩu̧rö̧ hue'omenä̧mä, pä'inö: "Ocurä ȩmi̧ käräu jähuä kä'cottö Querubí'inä ttö̧ja̧cuo̧mȩ kä'co päte'öttö," Ttö̧ja̧sa̧mä̧ do'ächi'inö ja̧'hua̧nö̧ do'ächi'ömä käräu jähuä peyänä kä̧mä̧di̧nö̧. ⁷ Ya̧tȩ Querubínmä umö te'ädinö korotö Querubín ttö̧'cä̧tȩ ocurä ko̧mȩcu̧, ja̧'hua̧nö̧ ja̧'a̧ cä'epö lino pö̧jä̧ta̧ 'ca̧tȩu̧ u̧mö̧pi̧yä̧ jacuä rötinö. Ttö̧ja̧sa̧mä̧ ȩmo̧po̧'ö̧ kärächi'ö rä'opächinö. ⁸ Ttömä Querubines ttujuabiyä dȩa̧'a̧nä̧mä̧ ttö̧ja̧sa̧ u̧mö̧ jä̧'i̧nö̧'a̧nö̧ jämö topinö̧sä̧. ⁹ Ja̧'hua̧nö̧ ja̧'a̧ttö̧ topinösä̧, pa̧ja̧cuä̧nö̧ käräu jähuämä Querubines pä̧ttä̧u̧cu̧ ka̧cui̧na̧'a̧, ji̧yȩtȩ käräu jähuämä ya̧tȩ querubín pönä ka̧cui̧na̧'a̧, ja̧'hua̧nö̧ ja̧'a̧ käräu jähuä a̧'cua̧juä̧mä̧ berilo ido'qui jä̧'i̧nö̧'a̧nö̧ ji̧na̧'a̧. ¹⁰ Pa̧ja̧cuä̧nö̧ käräu jähuä a̧'cua̧juä̧mä̧ yorätehuinö, käräu jä̧'i̧nö̧'a̧nö̧ jö̧mä̧ jacuänä todeunä 'chu̧huä̧ri̧na̧'a̧ koro käräu jähuämä. ¹¹ Jahuätö ttupporächi'omenä̧mä̧, ja̧'hua̧nö̧ ja̧'a̧ jahuätömä tti̧'cho̧mȩ pö̧nä̧mä̧ kara'acumä̧ huöttecuächoca'atä 'chi̧nä̧tö̧. Ja̧'hua̧ta̧'a̧nö̧ to̧pä̧rö̧ kä̧nö̧ tti̧'cho̧mȩ pönämä, jahuätö'inä 'chi̧nä̧tö̧. Jahuätö tti̧'cho̧mȩnä̧mä̧ kara'acumä huöttächi'oca'atä 'chi̧nä̧tö̧. ¹² Jättäpäyotö, ttabo'inä, ttumöpi̧yä̧'inä ja̧'hua̧ta̧'a̧nö̧ ttujuabiyä'inä tti'äriyämä ka̧cui̧na̧'a̧, juhua'atäcu käräu pa̧ja̧cuä̧nö̧ jähuä jäyänä'inä o'cajuiyötä ka̧cui̧na̧'a̧ i'äriyämä. ¹³ Ttö ji̧nä̧ chä̧ju̧cuä̧ra̧'a̧nä̧ käräu jähuämä kärähui pä'ö huoina'a. ¹⁴ Ja̧u̧ käräu ji̧yȩcu̧nä̧mä̧ i'ämä pa̧ja̧cuä̧nö̧ jo̧mȩnä̧ ki̧na̧'a̧; ä̧cuo̧mȩnä̧ käräu jähuämä Querubín i'ä ki̧na̧'a̧, todäre päi'önä käräu jähuämä ttö̧ja̧sa̧ i'ä ki̧na̧'a̧, huäbodäcuä päi'önämä mö yähui i'ä ki̧na̧'a̧ ja̧'hua̧ta̧'a̧nö̧ pa̧ja̧cuä̧nö̧ päi'önämä paré i'ä ki̧na̧'a̧. ¹⁵ Ja̧'hua̧nö̧ ja̧'a̧ Querubín pä̧ttä̧u̧, jahuätömä tta̧'cua̧rö̧ ku̧nä̧ri̧nä̧tö̧ Quebar ajettö tochinä̧u̧mä̧, cä'echinätö̧. ¹⁶ Querubines pä̧ttä̧u̧ ttupporächi'omenämä käräu juäi'inä jahuätucu 'chi̧na̧'a̧ ja̧'hua̧ta̧'a̧nö̧ querubines pä̧ttä̧u̧ rȩjȩttö̧ cättecuächa pä'ö ttujuabä cättepomenämä käräu jähuämä juorömä pporächi'oca'a ji̧na̧'a̧. Ja̧u̧ käräu jähuämä jahuätönätä̧ bä̧rö̧nä̧ ki̧na̧'a̧. ¹⁷ Querubines pä̧ttä̧u̧ u̧ni̧chä̧rö̧ ttö̧jo̧mȩnä̧mä̧ käräu jähuä'inä u̧ni̧chä̧rö̧ ki̧na̧'a̧ ja̧'hua̧ta̧'a̧nö̧ jahuätö cättecuächomenämä käräu'inä jahuätucutä cäecuächina̧'a̧, juhua'amä a̧'cua̧ru̧hua̧ a̧'cua̧rö̧mä̧ käräu jähuänä ö̧ja̧'a̧ttö̧. ¹⁸ Ja̧'hua̧nö̧ ja̧'a̧ TÖ̧Ä̧NÄ̧HUA̧ usärö isode öotorättö räopina'a, rä'o'ömä Querubines pä̧ttä̧u̧ ttu̧huä̧mȩ kä̧mä̧di̧na̧'a̧. ¹⁹ Querubines pä̧ttä̧u̧ ttujuabiyä cä'epinä̧tö̧, ja̧'hua̧nö̧ jahuätömä to̧chä̧ro̧mȩttö̧ rȩjȩttö̧ cä'ecuächö tti̧'cho̧mȩnä̧, käräu juäi'inä jitötäcu yo̧mȩtȩnä̧ 'chi̧na̧'a̧. Jahuätömä TÖ̧Ä̧NÄ̧HUA̧ ö̧jodettömä kä̧hua̧ räopa'acunä doächäcuähuome kä̧mä̧di̧nä̧tö̧, Israel ttö̧ja̧ TTÖ̧Ä̧NÄ̧HUA̧ usärömä ju'tojuttö jahuätö ttu̧huä̧mȩ kä̧mä̧di̧na̧'a̧. ²⁰ Pitä isotö a̧'cua̧rä̧tö̧ ji̧na̧'a̧ Israel ttö̧ja̧ TTÖ̧Ä̧NÄ̧HUA̧ idea'a Quebar ajettö tochinä̧u̧ pinä̧tö̧mä̧, ¡Ja̧'hua̧nö̧ ja̧'a̧ttö̧ ttömä jahuätömä Querubines ja̧'a̧ pä'ö huo̧jui̧nö̧sä̧! ²¹ Jahuätö yotucunä̧ tti'ämä pa̧ja̧cuä̧nö̧ jo̧mȩnä̧ ku̧nä̧ri̧nä̧tö̧ ja̧'hua̧ta̧'a̧nö̧ yotucunä̧ ttujuabämä pa̧ja̧cuä̧nö̧ jo̧mȩnä̧ ku̧nä̧ri̧nä̧tö̧, juhua'atäcu ttumö̧pi̧yä̧ ttujuabiyä ka̧cu̧ o̧mö̧mä̧ ttö̧ja̧sa̧ u̧mö̧ ja̧'i̧nö̧'a̧nö̧ huinä̧tö̧, ²² ja̧'hua̧ta̧'a̧nö̧ tti'ämä Quebar aje jäyotottö tti'ä i̧jȩcha̧'a̧ tochinö ji̧nö̧'a̧nö̧tä̧ huinätö̧, juhua'atäcu jahuätömä yotucupönämä ttä'cacutä jueönä 'chi̧nä̧tö̧.